Uljhe Dor

9. Ek Mahine Mein Shaadi?!

  "Achhi baat hai ab wo theek hain. Tumhein chhutti mil jayegi lekin sirf kuchh dino ke liye. Schedula bohot hectic hai, is mahine kai shaadiyan hain."

  "Hamein thodi lambi chhutti nahi mil sakti? Kuchh din aur?"

  "I'm sorry, Bela, aisa nahi ho sakta hai. Lekin contract ke hisab se tumhe advance payment mil sakti hai, par sirf in do mahino ka, kyunki hamein pata nahi hai ki do mahino ke baad tumhare aur Kavya mein se hamare saath aage kaun jayega."

  "Advance payment?" Zaroorat pad sakti hai paison ki. Ek baar yahan ham insurance ka dekhle phir wahan jakar paison ka dekh lenge. "Advance ka ham aapko baad mein batayenge. Ham chhutti ke liye kaise apply kar sakte hain?"

  "Uske liye email likhna hoga. Main tumhe text kardungi kis- kisko address karna hai 5 minute mein."

  "Theek hai, thank you ma'am."

  "No worries, Bela. Tum bas apne papa ka dhyan rakho. Hope to see you at work soon."

---☆---

  Mehrotra mansion ke living room mein sab baithe hain. "Ronit ji, achanak aane ki koi wajah?" Raj puchhta hai.

  "Haan, ek bohot zaroori baat discuss karni thi."

  "Kya baat hai? Sab theek to hai?" Dadi puchhti hai.

  "Chinta ki baat nahi hai, Ma ji. In fact, khush khabar hai, lekin uske wajah se shaadi mein kuchh changes karna padega. Adhij ne bohot bada German deal crack kar liya hai."

  "Yeh to bohot achhi baat hai," Maya kehti hai aur sabke chehre pe garv aur muskan aa jati hai.

  "Wakayi. Adhij ko opputunity mil rahi hai company ko Germany mein expand karne ka. Ab meri do betiyan hain yahan, mera jana mumkin nahi hai, to Adhij ko hi jana hoga deal sign karne. Phir project shuru ho jayega. Wahan ka saara kaam dekhna aur shuru karna hoga. Do saal tak wahin rehna hoga usko wahan."

  "Aapne kitni badi khush khabari sunayi hai, Randhawa sahab. Aarohi, meri beti Germany jayegi, ham sab se door. Lekin koi nahi, aadat pad jayegi. Waise bhi use kaun sa hamesha ke liye jana hai? Pehle shaadi to ho hi rahi thi, ab ek aur khush khabar. Muh meetha hona chahiye."

  "Ruk jaiye, Sonia bhabhi. Pehle puri baat sun lijiye, kya pata aapka man na kare meetha khane ka."

  "Aisa kya khabar hai? Abhi to aapne kaha sab theek hai."

  "Baat yeh hai ki Adhij ko deal sign karne ke liye agle mahine nikalna hoga. Agle do saal tak wapas aana mushkil hai."

  "To shaadi?" Maya puchhti hai.

  "Ham chahenge ki shaadi isi mahine ho jaye. Adhij Aarohi ko saath le jayega. Aarohi ka passport to hai na?"

  "Passport to hai, lekin itni jaldi?" Sonia puchhti hai. "Aarohi itni jaldi chale jayegi, wo bhi itna door, achanak se, ham sab iske liye prepared nahi hain. Usse do mahino tak milna bhi nahi ho payega."

  "Aur waise bhi saari tayyari itni jaldi kaise hogi?" Maya kehti hai.

  "Ab kya kar sakte hain, Bhabhi ji? Main aapko sirf itna keh sakta hoon ki Adhij Aarohi ka achha dhyan rakhega to chinta mat kariye. Waise bhi, bacche hamesha ke liye thodi ja rahi hain. Rahi baat tayyari ki, to Glam Events bohot established hai. Thoda advance denge to apne connections laga ke sab ho jayega."

  "Hamein thoda wakt do, beta," Dadi kehti hai. "Thoda soch- vichar kar lene do. Warna shaadi do saal baad bhi ho sakta hai."

  Uske baad koi kuchh nahi kehta hai. Dadi ki baat kabhi bhi koi nahi taalta hai. Dadi bhale hi sabki pyaari aur sabko samajhne wali hain, lekin sabko pata hai pariwar ko saath jode rakhne ke liye, bhale hi apas mein bohot pyaar kyun na ho, Dadi ka sakht hona zaroori hai aur sab Dadi ka adar karte hain.