وتيرة الاعرج

الوتيرة الثامن عشر

ابتعد عني وكعت بالكاع اكح واشهك بالنفس مصدومه من تصرفه اله شوي جان متت بايده ..

لا مستحيل انتَ فعلاً شيطان

- صرت افرك بصدري الهواء ضاك عليه وانه اشهكه شهك رد عليه وهُوَ يمشي بمستوى واحد ..

- لا تحشرين نفسج باشياء أكبر منج احسن مما نعقد الاتفاق الي اتفقنه عليه

رديت بصوت كوه الاحرف تطلع مني ..

- عديم الرحمه

رجع دار وجهه وكل جسمه بناحيتي وهُوَ يأشر بأبهام اصبعه رافع حاجبه ..

- انه

رغم الي صار والتوتر الي صابني من تصرفه بس ماشفت نفسي انسحبت رديت بكل ثقه ..

- اي انتَ

هز براسه يتوعدلي راح عيوني وراء طلع من البيت وكفت مستنده بالحايط امسح على مكان ركبتي مشيت بخطوات ثقيله مبعثرة احس جبال على اكتافي ليش مكتوبلي هل التعب والعذاب طلعت مفاتيح البيت فتحت الباب وانه داخله صارت بوجهي حنين طالعه من المطبخ باوعتلي وكانما حست بتعبي قويت نفسي ماريد احد يحس بشي ..

-حنين: ليش هيج تعبانه ورجعتي من وكت

حجيت وانه أشرلها بايدي ..

-غياهب: شويه تعبت بالطريق ومارحنه بعيد هنا بالجادريه

باوعتلي بنضرات مبينه عدم تصديق بس ماناقشت عبرتها وصعدت لغرفتي قفلتها ماريد احد يدخلي كعدت بالكاع مرجعه جسمي على الكنتور مغمضه عيوني اعصابي تلفت وانه متحمله هل الشيطان نمت بالكاع حاضنه نفسي اكثر شي يتعبني الماضي ..

مديت ايدي على طولها سحبت ردن الفستان صارت عيني مركزه عليهن كل حرك بيهن يشهد ألمي بالطفوله كلشي بيه انه اليوم بسببها انه صرت انسانه انطوائيه قوية اكثر من للازم وهل القوة اتأذي من تكون اكثر من للازم من كد ماجنت اكتم وجهي والالامي اليوم انه انسانه تكتم كلشي بداخلها ..

بطفولتنا جانت تستفرد بينه حنين مقسومها الضرب وانه مقسومي هل الاثار واضعاف عذابها لان جنت اعاندها وما احب قربها الي بسبب افعالها شكلت عندي نوبه من افقد اعصابي جنت بعمر صغير بس اكدر اميز ملامح حقدها ..

هم يجي يوم وانسه الي مريت بيه ماتوقع يجي شنسى عذابها لو عذاب عمامي الي حالهم من حالها من ابويه يلتحق الدوامه قبل لا ينقله جنا ننضرب ومحد بحالنه تمشيط محد يمشطنا اله نروح لبيت خالي عمران او جابر جانو يستغلون غيابه اتبهذلنا وانهانينا واحنا اطفال بسببهم انزرعت بيه شخصية قوية مؤذيه لنفسي وهيج قوة ماتأذي غير راعيها نزلت دموعي بهدوء عكس العواصف الي بداخلي ..

لثاني يوم كعدت جان يوم جمعة كوه سحلت نفسي حتى الصلاة فايتتني مال الفجر صليتها قضاء احس راسي يريد ينفجر من كمية الألم الي بيه نزلت شفت حنين كاعدة وحاطه ايدها جوه خدها صافنه ..