"اسيرة_لعبة_الماضي "باللهجة الجزائرية

الفصل48

ماهر:"ايه راني معاها"

كمل ووقف خرج لغرفة الاجتماعات لقا ليكيب كامل ملمومين يستناو فيه

دخل وقعد على رأس الطاولة

ماهر:صباح الخير ليكيب كي راكم؟

كامل:صفا مسيو ماهر الحمد الله

ماهر تبسم:الحمد الله..باه نكون صريح معاكم والله متوقعتش نعاودو نتلمو هنا بالساهل لوكان ماشي شريكي جان ...مي كيما علابالكم التهمة اللي فاتت على شركتنا واعرة ومزلنا فالأزمة وبلاك مطولين شوي باه نفوتوها ورانا على حافة الافلاس بيسك علابالي المستثمرين كامل رايحين يسحبو مشاريعهم اللي عندنا يعني تقريبا الخلصة تاعكم رايحة تحبس وقيتة...واكيد علابالي كاين منكم اللي يصرف على ودار وولاد ووالدين يعني لهنا وضك رايح نتفهم اللي حاب يحبس ويحوس وين يخدم ويسقات ويقدر يرجع كي تتنحا الأزمة بيسك منرضاش يتقطع رزقكم بسبتي

هبط راسو يستناهم يردو عليه مي هزو مع صوت تصفاق شاف فيهم يشوفو فيه يتبسمو ويصفقو

ريماس:مسيو ماهر حنا بدينا معاك من أول ما فتحت الشركة وضك وهي فالأزمة موحال نخليوها

آدم:مسيو ماهر منسيناش باللي كنت تعطينا خلاص مليح واي واحد يكون عندو ظرف تعاونو وتعطيه الزايد ودرنا حسابنا وخبينا لهاد الأوقات العصيبة

نور:يعني ضك مراحش نخليوك بيسك كيما تبنات الشركة من اللول وحنا كيف كيف رايحين نبقاو معاك للخر ونردوها كيما كانت وأحسن

رائد:صح مبديتش عندي بزاف مي والفتها وعرفتكم سيرتو فالرحلة كنا عايلة وحدة ونتمنى تتعاود قريبا وباش تتعاود لازم نديرو اليد فاليد ونكملو

///:خلاصة القول مع مسيو ماهر عمراني فالسراء والضراء صح الشركة باسمك مي تعنيلنا بزاااف

ماهر بقا غير يتبسم ويتدارك دموعو متوقعش هكا موقف كانو صح دعم وسند ليه وهو فهاد الحالة سبحان الله الناس البرانية يوقفو معاك والقراب ليك يدمروك بلا حساب كيما دارلو الربيع اللي هو راجل خالتو و بنتو طول عمرها عايشة فخير عايلتو تبسملهم بفخر

ماهر:الكلمات هربولي ومعرفتش نعبر والله...وقفتكم هادي ليها معنى كبيييير

نور:ههههه معليش وكمكافأة ليك مسيو ماهر تواصلنا لبارح كيف كيف وحطينا فرضيات يقدرو يعاونونا منا وجاي ونحاربو بيهم الافلاس

ماهر:ههههه والله ياليكيب يعطيكم الصحة جامي ننسى خيركم

ريماس:بلا مزية مسيو ماهر خيرك سبق ومناش اللي ينكرو شكون وكلهم الخبزة كي كانو والو(ولهنا تعرفو خاوتي المعنى تاع دير الخير تلقاه اي تصرف تديرو بنية قلب صافية وبلاما تستنى فوائد عليها رايحة ترجعلك بالخير مرة أخرى مين تطيح بيك بيسك الدنيا هادي دوارة مرة ليك ومرة عليك مالا نقولكم امشيو ديما بالمثل تاع"دير الخير وانساه ودير الشر واتفكرو"واللي كلا ملحك ودار عليك وكيلو ربي المهم نيتك كانت صافية مع مولاك مالا مجازاتك عندو)