مر اسبوع .. اسبوعين
و ثلاث اسابيع..
رجعنا لـ نقطة الصفر..
مانتكلم زي قبل ولا نلعب بلايستيشن سوا ولا نتساعد بالبيت مايسوي الفطور ويناديني ولا يسوي لي شوفان ويغصبني اكل
مانتقابل ولا اشوفه الا الصبح..
دوامي صرت اروح له بـ اوبر واذا خلصت ارجع البيت ولا القاه..
يخلص تمارين ولا اعرف وين يروح..
انتظره دايم بالصاله واغفى على الاريكه ولا يرجع..
اصحى ولا القاه..
حسيت بشعور غربه مؤلم..
يرجع وجه الفجر او على الشروق ولا اقدر اسأله وين كان ولا اكل ولا لا ولا كيف تمارينه ولا مبارياته..
^^^^^^^^^^^^
رجعت البيت متأخر على أمل اني ما اشوفها و يلين قلبي عليها..
هي رافضتني اغصبها علي يعني؟
رجعت وهي نايمه بالصاله واضح نامت وهي جالسه تنتظرني الساعه 2 الفجر و الشاشه طافيه..
شفت شاشة جوالها كانت تسمع اغنيه
اخذت اسم الاغنيه عشان اسمعها بعدين
ماشلتها لـ سريرها كالعاده كنت فعلا معصب وزعلان منها ومن تصرفاتها مره احسبها تحبني وخجلانه وخايفه ومره احسها ماتبغاني!
غطيتها بـ اللحاف و طفيت الانوار و صعدت لـ غرفتي
كان اسم الاغنيه "أنا حنيت" ماجد المهندس
إرجع لي أتوسل حبيبي بيك
أنا مشتاق، يكفي فراق
كل شي بيّ يسألني حبيبي عليك
..
عيوني تشتهي تشوفك
وأذوب بلمسة كفوفك
حبيبي من البعد صدقني، أنا مليت
..
تعالي لحضني دفيني
وعوض عمري وسنيني
أموت من الحزن بعدك، إذا ما جيت
سمعتها كانت كلماتها توصفني و اكيد توصفها..
نامت و هي تسمعها واضح مشاعر الاغنيه توصف شعورها
اخ بس..
^^^^^^^^^^^^^^
سافر لـ قطر ولا قال لي ولا ودعني صحيت مالقيته بالبيت وكمل يوم ماجا شيكت على تويتر الهلال فعلًا هم بـ قطر بسبب مباريات دوري ابطال اسيا..
شفت صورته بالطياره! ، كان على جواله ما ابتسم للكاميرا حتى..
اشتقت له ولا بيدي شيء..
حتى ماعندي جراءه ادخل غرفته واشم ريحته اللي اشتقت لها..
ولا عندي جراءه اكلمه او اتطمن عنه
حالنا من سيء الى اسوء..
بعد اسبوع زواجنا واخر مره كلمته قبل 4 ايام
وحتى كلامنا سطحي جدًا
جو اهلي من ميلانو عشان زواجي اللي بعد اسبوع بس هالمره اقنعتهم ياخذوا جناح في فندق
ما ابيهم يجون البيت وتتكرر السالفه اللي صارت قبل..
..
ماكنت مجهزه ولاشيء لـ زواجي
لان ماتوقعت بنستمر لهذا الوقت!
ولا قدرت اخذ قرض من من البنك بسبب اني ماكملت 6 اشهر من تثبت بـ دوامي..
..
صالح بـ قطر واهلي بالرياض و يوميا طالعين ماما واختي ياخذوني اجهز لـ زواجي
انصدموا مني اساسا زواجي بعد اسبوع ولا مجهزه ولاشيء!
..
بالليل قبل انام فتحت سناب الهلال و شفتهم راجعين!
فزيت من مكاني وانبسطت
اشتقت له مره ولو اننا مو زي قبل لكن شوفته بالبيت ولو لـ دقايق ترضيني..
من قطر للرياض ساعه مارح يطول يعني
انتظرته وعلى الساعه 1 الفجر سمعت صوت باب البيت
رغم اني متضايقه مقدر انزل واشوفه بس انبسطت بـ رجعته..
