أسيرة الشيطان الجزء الأول + الجزء الثاني+ الثالث

الفصل السادس عشر الجزء الثالث

ابتسمت طرب تغمغم بنبرة مهذبة قدر الامكان:
- عندهم حق أكل حضرتك حلو جداا اصلا
ابتسمت رؤى لتقترب منها وضعت يدها على كتفها تزيح خصلات شعرها بيدها الأخرى تضعها خلف أذنيها تحادثها بحنو :
- قلبي بيقولي أنك نقية ونضيفة وعمرك ما هتأذي إبني ، أنا مش عيزاكِ تزعلي من كلاك عمك جاسر ... صدقيني والله دا طيب أوي ، على طول يقولي رعد طالع طيب زيك وهو والله طالعه هو ، بس هو بيقلق وبيخاف بزيادة
بالكاد ابتسمت طرب ، حركت رأسها للجانبين تنظر للفراغ شاردة تهمس بنبرة حزينة متخاذلة :
- هو عنده حق ، مين يقبل ابنه يتجوز رقاصة حتى لو بترقص غصب عنها .. حضرتك عارفة جاسر باشا بيفكرني بوالدي الله يرحمه هو بردوا كان بيخاف علينا أوي وبيقلق جامد من أقل حاجة
وأرادت أن تبدل دفة الحديث حتى لا تتذكر أبيها وتنهار باكية كطفلة في الخامسة ، نظرت صوب رؤى تسألها :
- هو حضرتك اتعرفتي على جاسر باشا إزاي

ضحكت رؤى ما أن نطقت طرب تلك الكلمات لتمسك بيدها تجذبها معها لتجذبها معها تجلس أمامها على طاولة المطبخ تغمغم ضاحكة :
- هحكيلك ، بصي يا ستي الحكاية بدأت من ملف مهم لشغل بابا نسيه في البيت وأنا روحت شركته ادهوله وعينك ما تشوف إلا النور
وبدأت رؤى تقص عليها ما حدث وتقتص الكثير من التفاصيل الخاصة تعلق على ما حدث في حياتها ساخرة :
- وفضل بقى يقولي أنا جاسر مهران ، أنا الشيطان ، والحلم مع جاسر مهران حقيقة ، ومع تايد الغسيل ما فيش مستحيل

ضحكت طرب عاليا على ما تقول ورؤى تكمل قص ما حدث قديما وتعلق عليه :
- ويهدد عاصم لو تشوفيه هو وعاصم دلوقتي تقولي اتنين أخوات تؤام ، ويهدد والدي الله يرحمه لو تشوفيه بقى بعد كدة ما كنش قشور بم قدامه

- الله يرحمه كانت ايده تقيلة أوي
التفت رؤى وطرب معا ينظران لمصدر الصوت هناك عند باب المطبخ كان يقف جاسر ، توترت طرب ما أن رأته لتقف من مكانها في حين ابتسمت رؤى تغمغم ضاحكة :
- كنت لسه بحكيلها قصة حبنا الملحمية الغريبة ، بس إنت جيت قطعتني ، فاكر لما نرمين كانت بتقول عليك هادم اللذات

ضحك عاليا في حين ضمت طرب شفتيها حتى لا تضحك ويغضب ، اقترب جاسر من رؤى يغمغم :
- شغل الحموات بدأ بقى وواخدها تعمل شغل المطبخ
توسعت حدقتي رؤى تغمغم سريعا :
- لا والله العظيم ابدا حتى اسألها ، هي اللي جت قالتلي عاوزة اساعدك ، مش كدة يا طرب.

حركت رأسها بالإيجاب تنظر أرضا تفرك يديها متوترة ، ليضحك جاسر عاليا يشاكس زوجته
لتحمحم هي تستأذن منهم لخارج المطبخ لتلتفت رؤى إلى جاسر تغمغم تستعطفه :
- والله طيبة وغلبانة يا جاسر ، على فكرة بتخاف منك أوي ... اعتبرها زي چوري ومريم
ابتسم لها يقرص ذقنها بخفة يغمغم عابثا :
- وحياتك ما في طيب وغلبان وعسل وسكر غيرك

ضحكت تصدمه على صدره بخفة ليجذبها نحو صدره يقبل قمة رأسها تنهد يهمس لها :
- ما تقلقيش خير ، أنا هحلها
ابتسمت سعيدة لينزل بيديه يكوب وجهها بهما يلاعب حاجبيه يغمغم عابثا :
- فاكرة زمان ، بابا الحق يا بابا عمو جاسر بيبوس رؤى في المطبخ بوسة عيب
ضحكت رؤى عاليا تومأ برأسها قبل أن تختفي ابتسامتها تدريجيا تهمس حزينة :
- ياريتها فضلت صغيرة الدنيا جت عليها أوي وهي ما استحملتش ، تعرف أنا انبسطت اوي لما عاصم قالي أنها قاعدة مع خالة صفاء ، دي ست زي العسل وفاطمة بتحبها أوي ، وأنا بسبب اللغبطة اللي حصلت ما عرفتش أروح اشوفها خالص ، ايه رأيك أخد طرب معايا ونروحلها