قصص الأنبياء بالعاميه

63 سيدنا عيسى عليه السلام 6

فالملك بعت جنوده يدوروا عن سيدنا عيسى ..
فلما كان الجنود في الطريق،،
ربنا أوحى لسيدنا عيسى  إنه هينيمه ويرفعه للسماء يقعد فيها لحد ما ييجي الوقت إللي هينزل فيه تاني عشان يكمل حياته على الأرض ويموت زي باقي البشر .،

""إذْ قَالَ اللَّهُ يَا عِيسَى إِنِّي مُتَوَفِّيكَ وَرَافِعُكَ إِلَيَّ وَمُطَهِّرُكَ مِنَ الَّذِينَ كَفَرُواْ "

وكان سيدنا عيسي فين !؟🤔

كان في بيته وعنده الحواريين،،
وخرج عليهم بعد ما اغتسل وراسه لسه بتنزّل مية،
وحكالهم إن الجنود عايزين يقتلوه وإنهم جايين في الطريق خلاص !!!
وقالهم إن ربنا هيرفعه عنده،،
وان بني إسرائيل هيقتلوا واحد تاني بداله ربنا هيخليه شبهه مش هيقتلوه هو ،،
فسألهم:
مين فيكم ربنا يخليه شَبَهِي ويُقتل مكاني ويكون رفيقي في الجنة؟!!

فشاب صغير قال :
انااااااا..😊

فسيدنا عيسي أشفق عليه وصعب عليه إنهم يقتلوا شاب صغير ..
لأنه كان عارف إنهم مش هيقتلوه قتلة عادية وسريعة..
ده قتل عن طريق الصلب،،

يعني أية صلب 🤔!؟
يعني يحطوا الراجل على صليب وبعدين يدقوا المسامير في جسم الراجل من عند إيده ورجله عشان يثبّتوه في الصليب،،!!!!
فيموت بعد يوم أو أكثر بسبب النزيف وفقدان كل حاجة من جسمه ،،
لإنه هيكون اتخنق بسبب نقص الأوكسجين في دمه😒

فسيدنا عيسي سأل مرة ثانية:
مين ربنا يخليه شبهي ويكون رفيقي في الجنة؟!!

فنفس الشاب قال أنا يا نبي الله.. أنا😕!

فسيدنا عيسي سأل مرة ثالثة وهو بيبص للباقيين،،

فنفس الشاب قال : أنا! أنا ..!!

فسيدنا عيسي قاله:
خلاص.. انت إللي هتكون مكاني..😊

وفعلا ربنا غيّر شكل الشاب وخلاه نفس شكل عيسى بالضبط!!

توضيح
🛑 في روايه أخرى....
إن اللي اتصلب مكان سيدنا عيسى كان واحد خاين وهو اللي بلغ عن مكانه.. فأنزل الشبه عليه والجنود مسكوه وصلبوه.. ولكن دي روايه أضعف نسبيا... والله أعلم 👌

كان في بقي فتحة في سقف بيت سيدنا عيسي ..
فربنا رفعه منها إلى السماء..
والرفع كان رفع كامل من الأرض بالجسد والروح،،

يعني هو لسه عايش لحد دلوقتي وهينزل آخر الزمان ونزوله من علامات الساعة الكبرى ..

وهي دي عقيدتنا كمسلمين في عيسى بن مريم،
إنه نبي وعبد لله، ولم يُصلب أو يُقتل ، بل رفعه الله إليه😊
و أي كلام تاني غير ده في أي عقيدة تانية هو تكذيب لله عز وجل
وسيدنا عيسى حاليا في السماء التانية مع ابن خالته سيدنا يحيى عليهما السلام 😊

وبكده تنتهي سلسله قصص الأنبياء ❤️

وبعد كده ييجي نبي اخر الزمان خاتم النبيين سيدنا ورسولنا وشفيعنا الحبيب المصطفى محمد صلى الله عليه وسلم... ❤️ وهيبقي في سلسله مستقله إن شاء الله

والشكر موصول لصاحبه هذه السلسله المباركه
هبة الله محمد

كل عام وانتم بخير رمضان مبارك عليكم الشهر وتنعاد علينا الايام بخير
اللهم تقبل منا إنك أنت السميع العليم وتوب علينا انك انت التواب الرحيم