قصص الأنبياء بالعاميه

7 نوح عليه السلام

7️⃣
يا تري أية اللي هيحصل لقوم نوح ؟؟

وقت عقاب قوم نوح قرب..
ربنا خلي سيدنا نوح يبقي عارف ان مافيش حد تاني هيبقي مؤمن غير اللي آمن خلاص ،، وأمره انه يبني سفينة في مدينتهم

سفينة ؟  وسط المدينة ؟
اة ده كان أمر ربنا.

بدأ سيدنا نوح يصنع السفينة ومعاه المؤمنين
سفينة ضخمة جداااااااا..
وقوم نوح كل لما يعدوا عليه يفضلوا يتريقوا ويضحكوا.
أية دة انتم بتعملوا ايه ؟ هتعوم فين دي ؟ ههههه..

سيدنا نوح قالهم انتم بتسخروا منا لاننا مصدقين أمر ربنا ؟ احنا هنسخر منكم ومن كفركم بربنا.❤

الكفار يقولوا يلا احنا مستنين العذاب ،، يلا هاته.، ويتريقوا!!
الكفار يبصوا لنفسهم وفلوسهم واولادهم ويقولوا احنا اكيد الصح ،، احنا اغنيا واقويا .
ويبصوا علي سيدنا نوح والضعفاء المؤمنين اللي معاه ويقولوا دول اكيد غلط ..
شوفوا ضعفا ومساكين ازاي ..!

سيدنا نوح فضل يكمل بناء السفينة وفضل الكفار يتريقوا عليه ويقولوا يا نوح يلا هاتلنا العذاب ..احنا مستنيينه ..

وبرضو سيدنا نوح يرد :
مش انا اللي هجيبه ربنا بس اللي يقدر يجيبه ..
بس ساعة لما ربنا يجيبه مش هتبقوا عاملين اقويا زي دلوقتي ..

سيدنا نوح والمؤمنين اللي معاه صابرين علي كلام الكفار

فربنا قاله يحط جواها من كل نوع من المخلوقات اثنين ذكر وانثي..
يعني ولد وبنت ويركب اهله المؤمنين بس ،، ويركب باقي المؤمنين اللي آمنوا معاه.

طب مين أهل سيدنا نوح؟؟
زوجة سيدنا نوح كانت من الكفار .!
وكانت بتقول للناس سيبكم منه ماحدش يسمع كلامه ..ده واحد مجنون .. 😠
ولما حد يبقي مؤمن مع سيدنا نوح كانت تروح تقول للكفار الاقويا عليه عشان يؤذوه ..😠
فزوجة سيدنا نوح مش من اهله اللي هيركبوا معاه السفينة..

وكان عنده 4 أبناء .

اسمهم أية ؟؟
سام وحام ويافث .. دول ال3 مؤمنين
والرابع فين ؟
الرابع  كان كافر ..

طب هيركبوا السفينة امتي ؟
ربنا عرف سيدنا نوح ان فيه علامة اول لما تحصل يركبوا السفينة..

  ايه العلامة دي؟
كان فيه تنور..
تنور يعني فرن مصنوع في الارض...
أول لما يلاقوا ماية بتخرج منه. كل المؤمنين وسيدنا نوح معاهم يركبوا السفينة فورا..

وفعلا سيدنا نوح لقي ماية بتخرج من التنور...
فجمع المؤمنين و وجمع اهله وركبوا السفينة علي طول..

المطر بدأ ينزل بشدة من السماء.
مطر مش عادي.. مطر شديد جدا... والارض كمان بدأت تفور بماية..
الماية بتخرج من كل مكان!!
البيوت بدأت تغرق !!

والكفار فين ؟؟
الكفار بدؤوا يهربوا ويطلعوا علي الأماكن العالية والجبال .. فاكرين انها هتحميهم من الماية..😁