6️⃣0️⃣
الحمدلله اخيراً اتأكدت إن السيده مريم هي اخت سيدنا هارون 😊
فضلت أدور لحد ما لقيت آية في القرآن بتقول :
""يَا أُخْتَ هَارُونَ مَا كَانَ أَبُوكِ امْرَأَ سَوْءٍ وَمَا كَانَتْ أُمُّكِ بَغِيًّا""
ودة أكتر دليل اهو يقول أنها أخته !!
= أنت تعرف أية تفسير الآية دي ؟؟!
لأ..!
= طب تعرف ليه بني إسرائيل قالوا للسيده مريم يا اخت هارون ؟!!
لأ برضو .!
= يبقي دة مش دليل ان السيده مريم أخت سيدنا هارون !!
مينفعش تاخد ايه من القرآن وتفسرها علي مزاجك !،، لازم تدور علي تفاسير الآيه ،،
وليه ربنا ذكرلنا الآية ،،
وأية القصه اللي حصلت وراء الآية دي ، عشان أقدر أوصل لتدبر وفهم أيات ربنا بالشكل الصحيح ❤
طب اية بقي اللي حصل ورا قصه الآيه دي وهل فعلا هي اخت هارون ولالا !!؟
= راحت السيده مريم رضي الله عنها تواجهه بني إسرائيل بالطفل اللي علي ايديها ..
فبني إسرائيل اتصدموا فيها بقي 😏
مع انهم عارفينها بعفتها وطهارتها ،،
وعارفين هي بنت مين واتربت إزاي ،،
لكن قالولها اييييييه !!!:
إيه يا مريم اللي انتِ عملتيه ده!!
تقعي في الزنا يا مريم!!!!!😱
"قَالُوا يَا مَرْيَمُ لَقَدْ جِئْتِ شَيْئًا فَرِيًّا"
وبعدين يا أخت هارون،، أبوكي عمره ما كان رجل سيء السمعة أو فاسق،،
ولا أمك كانت بغي من البغايا.. فإزاي إنتيِ تعملي عملة زي دي😒😠
"يَا أُخْتَ هَارُونَ مَا كَانَ أَبُوكِ امْرَأَ سَوْءٍ وَمَا كَانَتْ أُمُّكِ بَغِيًّا"
اهو قالولها يا أخت هارون اهو ..!
= اة قالولها كدة ليه بقي 🤔!؟
لأنها كانت شديدة العبادة زي سيدنا هارون بالظبط ..
وكان من شدة عبادتها بيشبهوها بعبادة هارون عليه السلام-
فالمقصود يا شبيهة هارون في العفة والحياء؛❤
مش أخته خالص!!
#وفي تفسير تاني ان هارون المقصود ده رجل صالح في زمانها بالفعل. وانه اخوها (غير شقيق)..والله أعلم
بس المهم انه ليس المقصود النبي هارون اخو سيدنا موسى.
قال يعني شمتانين فيها ،، فكأنهم بيقولوها ايه اللي عملتيه دة يا صاحبة العفة والحياء !!!!
السيده مريم فضلت منفذة أمر ربنا بالصيام ومبتتكلمش ولا بترد عليهم..
فربنا ألهمها إنها تشاور على ابنها الصغير إللي بين إيديها ،،
إنهم يسألوا الطفل دة ويوجهوله الكلام مش ليها هي!!
"فَأَشَارَتْ إِلَيْهِ"
فبدأوا يسخروا منها وهما مستغربين اوي ،،فقالولها:
إيه ده...إزاي نكلم طفل رضيع يعني 😏
" قَالُوا كَيْفَ نُكَلِّمُ مَن كَانَ فِي الْمَهْدِ صَبِيًّا"
فلقوا صوت طالع من بين إيديها وبيكلمهم،، 😱
وبيقول..
أنا مش إله ولا ابن إله ولا أي حاجة من دي خالص،، أنا مجرد عبد لله❤
"قَالَ إِنِّي عَبْدُ اللَّهِ "
ربنا عطاني الإنجيل والنبوة وده هيكون في المستقبل لما اكبر ..
آتَانِيَ الْكِتَابَ..
وربنا جعلني كمان نبي ليكم ..
وَجَعَلَنِي نَبِيًّا"
وربنا جعلني مبارك ومُعلم الخير للناس وداعيا إليه عز وجل ومُحَبِّبِ الناس في طاعة الله..
"وَجَعَلَنِي مُبَارَكًا أَيْنَ مَا كُنتُ وَأَوْصَانِي بِالصَّلاةِ وَالزَّكَاةِ مَا دُمْتُ حَيًّا"
ووصاني بالصلاة والزكاة طول ما أنا حي ..
"وَأَوْصَانِي بِالصَّلاةِ وَالزَّكَاةِ مَا دُمْتُ حَيًّا"
و ربنا جعلني كمان بار بوالدتي ،،
وعصمني من إني أكون متكبر على أوامره ولا أكون عاصيا له ،،
وعصمني من إني أكون متكبر على البشر وأقتلهم وأضربهم وأقهرهم ..!!!
"وَبَرًّا بِوَالِدَتِي وَلَمْ يَجْعَلْنِي جَبَّارًا شَقِيًّا"
هو لية قالهم كل دة !!؟🤔
عشان يدافع عن أمه .. ويعرف بني إسرائيل إنه نبي ..
وأنه وعبد لله...
وأنه اتولد بمعجزة، مش من الزنا..
لأن بني إسرائيل عارفين إن الأنبياء بيكونوا من أشراف قومهم المعروف عنهم النزاهة وكل الأخلاق الطيبة عشان محدش يطعن في عِرضهم وشرفهم ..
وفي الاخر قالهم :
إن يوم ما اتولدت ، ربنا عصمني من الشيطان ..
وأمني كمان يوم البعث،،
ربنا عطاني الأمان والسلامة زيادة فضل ونعمة منه عز وجل❤
"والسلام عليَّ يومَ وُلِدتُّ ويوم أموتُ ويوم أُبعَثُ حَيًّا"
يا تري بقي بني إسرائيل آمنوا وصدقوا وبرؤوا مريم عليها السلام ولا لأ 🤔!!!!؟
.......... يتبع إن شاء الله ❤️
كل عام وانتم بخير
رمضان مبارك
YOU ARE READING
قصص الأنبياء بالعاميه
Spiritualكتير مننا ميعرفش قصص الأنبياء او يسمع عنها وينساها.. دلوقتي هنستعرض مع بعض يوميا قصص الأنبياء من البدايه مع سيدنا وأبونا آدم.. ونستمر بالترتيب ان شاء الله.. القصص هتكون باللغه العاميه السهله اللي تناسب الجميع وتفهم بسهوله ان شاء الله.. اعداد أ/هبة...
