قصص الأنبياء بالعاميه

55 سيدنا ذكريا

5️⃣5️⃣
يارب ولد يااااااارب 🤲

= هتفرق معاك ولد ولا بنت !!

طبعاً!
الولد عبادته لربنا مش بتنقطع ابدا !!
إنما البنت بيجيلها وقت وتنقطع عبادتها بسبب فترة حيض يعني ..

= طيب تعالي بقي هحكيلك حاجة جميلة أوي عشان توضحلك رزق وجمال وحلاوة البنات ❤

كان في ناس من بني إسرائيل صالحين أوي ..

أهل البيت ده كانوا معروفين أنهم أهل التقوى من كتر عبادتهم لربنا ..

= وكان اسمهم إيه!؟
_ عمران ، وزوجته حَنّة..

حَنّة كانت كبيرة في السن ويقال انها كانت لاتنجب ، فدعت ربنا إنه يرزقها بطفل،،
ونذرت إن إللي في بطنها ده هيكون لله،،
  يعبد ربنا عشان ينصر الدين ،،
واتمنت إن الطفل ده يكون ولد.

"إِذْ قَالَتِ امْرَأَةُ عِمْرَانَ رَبِّ إِنِّي نَذَرْتُ لَكَ مَا فِي بَطْنِي مُحَرَّرًا فَتَقَبَّلْ مِنِّي إِنَّكَ أَنتَ السَّمِيعُ الْعَلِيمُ"

حَنّة حملت وولدت ، لكن لما ولدت لقت المولود بنت!!
فقالت يارب دي طلعت بنت ، والولد مش زي البنت في العبادة!

"فَلَمَّا وَضَعَتْهَا قَالَتْ رَبِّ إِنِّي وَضَعْتُهَا أُنثَى وَاللَّهُ أَعْلَمُ بِمَا وَضَعَتْ وَلَيْسَ الذَّكَرُ كَالأُنثَى "

هى طبعا استغربت ان نيتها كانت حلوة ،، لكن ربنا مااستجابش لدعوتها !!

حَنّة سمت البنت مريم،،

= أيوة اشمعني بقي مريم !؟
_ عشان مريم معناه العابدة ..
يعني يارب ولد ولّا بنت بقي خلاص إللي انت رزقتني بيه وهستغله ومش هضيعه ،،

ودعت ربنا إنه يعصمها من الشيطان هي وذريتها.

مقلتش بقي خلاص يارب هعمل إيه يعني!؟
هرجع في النّذر بتاعي لأن كنت ناوية لولد مش لبنت!!

"وَإِنِّي سَمَّيْتُهَا مَرْيَمَ وَإِنِّي أُعِيذُهَا بِكَ وَذُرِّيَّتَهَا مِنَ الشَّيْطَانِ الرَّجِيمِ"

وعشان نيتها الحلوة دي فضلت زي ماهي ومفرقتش بين ولد وبنت ..
فربنا تقبل منها النذر بتاعها ،،
وكمان أنبت مريم نباتا حسنا ومُبارك فيه.. 

يعني بتكبر في اليوم الواحد إللي كان بيكبره باقي الأطفال في سنة..
وكان شكلها جميل جداا ، ومنظرها مُبهج لكل اللي يشوفها..

"فَتَقَبَّلَهَا رَبُّهَا بِقَبُولٍ حَسَنٍ وَأَنبَتَهَا نَبَاتًا حَسَنًا"

بعد ما مريم أتمت سنتين من عمرها أبوها مات.!

حَنة أخدت مريم في بيت المقدس عشان تقعد هناك وتنقطع للعبادة بس!!

كِبار العلماء بقي ،، فضلوا يتجادلوا إن مين إللي ياخد باله من مريم ويراعيها، ويتكفل بيها ،،

بس كان من ضمن العلماء دول " نبي"  ،، هو كمان عايز يتكفل بمريم ..

لكن العلماء رفضوا إن النبي يتكفل بيها !!!
وقالوا لأ هما اللي هيتكفلوا بيها ..

فالنبي قالهم إن هو إللي هيكفلها لأنه زوج خالتها !!

بس برضو العلماء رفضوا ..

فقالوا خلاص بدل فيه خلاف احنا نعمل قرعة ..

نرمي أقلامنا في المياة ، وإللي قلمه يمشي عكس التيار هو إللي يكفل مريم،،

فلما كلهم رموا أقلامهم كان قلم النبي هو إللي مشي عكس التيار فهو إللي تكفّل برعاية مريم،،

و هيكون مسؤول عن تربيتها وتعليمها الدين والمسؤول عن رعياتها،

"وَمَا كُنتَ لَدَيْهِمْ إِذْ يُلْقُون أَقْلامَهُمْ أَيُّهُمْ يَكْفُلُ مَرْيَمَ وَمَا كُنتَ لَدَيْهِمْ إِذْ يَخْتَصِمُونَ"

= ومين النبي ده !؟
زكريا ، " سيدنا زكريا "

حنة كان ليها أخت اسمها أَشْيَاع ..
" ويقال ان اشياع دى بنتها "

زوج اشياع بقي كان سيدنا زكريا،،،

سيدنا زكريا كان بيعلم مريم الدين ،،
فكانت مريم بتتعبد في بيت المقدس في حتة في المسجد اسمها المحراب،،

= إيه المحراب ده !؟
والمحراب ده اللي هو الجزء المبني المرتفع في المسجد،،
اللي عامل زى قُبه كدة ..

= اشمعني المكان ده!؟
_ عشان دة المكان المنعزل عن الناس اللي كانوا بيناموا ويتعبدوا فيه ،،

  مريم كانت معروفة بين الناس بعبادتها وتضرعها وقنوتها وخشوعها لله على الرغم من سنها الصغير،،

وربنا وهب لها كرامات،،
زى معجزات الأنبياء والرسل كدة ..

= زي إيه !؟
_  زى إن كان عندها فاكهة الصيف في وقت الشتاء ، وفاكهة الشتاء في وقت الصيف!

فكان سيدنا زكريا كل ما يدخل عليها في المحراب عشان يطمن عليها يلاقي عندها الفاكهة دي فيستغرب أوي !

ويسألها يامريم الفاكهة دي بتيجي منين !؟

"كُلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِندَهَا رِزْقًا قَالَ يَا مَرْيَمُ أَنَّى لَكِ هَذَا"

فكانت مريم عليها السلام بتقول له :
من عند ربنا، هو في حد بيرزق عباده غيره ،،

"قَالَتْ هُوَ مِنْ عِندِ اللَّهِ إِنَّ اللَّهَ يَرْزُقُ مَن يَشَاء بِغَيْرِ حِسَابٍ"

فسيدنا زكريا انتبه لمعنى عظيم جداااا ،،
  إن ربنا بيرزق الطفلة الصغيرة دى في محرابها بالرزق العجيب وإللي من غير أسباب دنيوية،،

أومال أنا بقى لو دعيت ربنا هيحصل إيه!؟

يا تري فعلا لو سيدنا زكريا دعي ربنا هيحصل إيه 🤔!؟
وياتري سيدنا زكريا هيدعي بإيه!؟

.......... يتبع إن شاء الله ❤️

كل عام وانتم بخير
رمضان مبارك