ကောင်းကင်တမျှ (Completed)

Episode 136

နောက်ပြီး အလုပ်ထဲမှာဆို တခြားလူတွေထက် လိုတနဲ့ ဟန်က ပိုခင်သည်။ အသက်မတိမ်းမယိမ်းဆိုတာထက် ဟန်က ကိုယ့်မောင်လေးလို ကြည်ရှုစောင့်ရှောက်ပေးလို့ဖြစ်မည်။ လိုတက တစ်ခုခုဆို ဟန့်ကို အရင်ပြေးပြောတတ်သည်သာ။ အခုလည်း ဘာအခက်တွေ့နေသည်မသိ။ ခေါင်းကုတ်ရင်း မျက်နှာက ရှုံ့ရှုံ့မဲ့မဲ့။

ဟန်က သက်ပြင်းရှိုက်သည်။ ထိုင်နေတဲ့လူ ထမလာမှတော့ သူလည်း ကြမ်းပြင်ပေါ်ပဲ လိုက်ထိုင်ရသည်။ သန့်မသန့်တော့ စိုးရိမ်စရာမလို။ အပေါ်ဆုံးထပ်၏ သန့်ရှင်းရေးက ကျောက်ကျောပေါ် လမ်းလျှောက်ရသည်လို့ ထင်ရလောက်အောင် ပြောင်ပြောင်လက်လက်တိုက်ချွတ်ထားတာဖြစ်သည်။

"ပြောစမ်းပါဦး ဘာဖြစ်လို့လဲ။ ဖိအားတွေပိလို့လား"

ဟန်က လိုတဘက်စောင်းငဲ့လိုက်ရင်း သူ ထင်တာ ထုတ်ပြောသည်။ အခုအချိန် သူ့ခေါင်းထဲကထွက်သည့်အကြံဥာဏ်ဟူ၍ ထိုတစ်ခုပဲရှိသည်။ လိုတကတော့ ပြင်းပြင်းထန်ထန်ခေါင်းရမ်းပါ၏။

"မဟုတ်ပါဘူး အစ်မဟန်ရာ ကျွန်တော် တကယ် စိတ်ညစ်တော့တာပဲ။ ဒီတလော ဘာလို့များ ကံကအဲ့လောက် မကောင်းဘူးဖြစ်နေရတာလဲ"

"ဟင်... ကံမကောင်းတာလား"

ဟန်က လိုတကို စုန်ချီဆန်ချီကြည့်သည်။ ဆွေးနွေးပွဲက တော်တော်ကြီးကို လျောလျောလျူလျူပြီးသွားခဲ့တာ ဖြစ်သည်။ ကံမကောင်းဘူးဟု ပြောရအောင်လည်း လိုတက လူရှေ့သူရှေ့မှာ ဘာအမှားမှမလုပ်ခဲ့ပါ။ သူလုပ်ခဲ့တာဆိုလို့ သန့်စင်ခန်းသွားရုံသာ။ ဒါတောင် သိပ်ပြီး ကိစ္စရှိတာ မဟုတ်ပေ။ အကယ်၍ လိုတသာ မိန်းကလေးဆိုပါက လူရှေ့သူရှေ့မှာ ဟိုဟာလာလို့လားဟူ၍ ဟန် တွေးလိုက်မိမည်ဖြစ်သည်။

"ကံက တော်တော်ကို မကောင်းတာပါ အစ်မဟန်ရေ အရမ်းကိုမကောင်းနေတာ။ ဘယ်လိုလုပ်ပြီး ထပ်ခါထပ်ခါ ဒီလောက်တောင် မကောင်းနိုင်ရတာလဲ ကျစ်"

လိုတက သူ့စိတ်ထဲရှိတာတွေ ပြောပစ်လိုက်ချင်သည်။ သို့သော် အစ်မဟန်က ဘာမှသိသူမဟုတ်။ သူမကို ရှင်းပြရတာနဲ့တင် တစ်လုပ်ဖြစ်ဦးမည်။ စိတ်ညစ်လွန်းလို့ လိုတ တိုက်အောက်သာ ခုန်ဆင်းပစ်လိုက်ချင်တော့သည်။