المتمردة وزعيم المافيا (باللهجة الجزائرية)

البارت 29

غمضت مايا عينيها ورجعت حلتهم تشيرلها بلي فهمت  عدلت لميس قعدتها   وجبدت الماكلة من الساشي اللي جابتها مدت ليار بقا زاكي يشوف فيها يستني فيه تمدلو بصح هي بدات طول توكل

زاكي : وانا مامحلي من الاعراب 

لميس : انت لامحل لك من الاعراب ماعجبكش الحال الصوارد في جيبك روح اشري وش تحب نوغمالمون نتا اللي تشري نتا الراجل ماشي انا ولا وش قال يارا 

يارا : ههههه وش مالا الفايدة تاعو كي عاد راجل لازم عليه يصرف

تبسم معاهم  اصلا موالف بمزح لميس هاذا 

يارا : لميس خلاص حبسي  حرام علينا نوكلو متوال مايا 

لميس : اييييي هاذا اللي عاجبني اني ندير وش نحب وهي ماتقدر تديرلي والو خلي هكذا باش تتحفز ترتاح  اصلا هي ماتفلح غار في الضرب خلي جلدي يرتاح شوي 

ضحكو كامل  ومايا ظهرت على مالامحها الضحك وهاذا فرح لميس بزاااف خلت ماكلتها وشافت فيها متحمسة 

لميس :  ياااا عندي حكاية ليكم 

يارا : خير؟؟

لميس : رايحة ندير دار ووليدات نتزوج ونكمل نصف ديني

فرحت مايا وميش مصدقة الللي تسمع فيه وحتى زاكي كان اكثر من مصدوم 

زاكي : نتي ؟؟؟ رايحة تتزوجي ؟؟؟؟ امبوسي  منقدرش نأمن ضك نتي تاع مسؤولية ؟ كون يخليوك في الدار تحرقيها  شكون مسود السعد هاذا اللي رايح يتبلا بيك خخخ اني نيماجيني فيك تربي في الصغار ونتي مزلتي محتاجة لرعاية

لميس : كلب ماتحشمش راك تقلل من قيمتي ديجا نتا وش دخلك يخي الزوج الكريم هو اللي راح يتزوج بيا ماشي نتا  

قلبت عينيها عليه وكملت تهدر تهدر تهدر تهدر ماسكتتش ماروحتش حتان طمنت على مايا ورقدت خرجو كامل كيفكيف ياارا لقات الطومبيل تستنى فيها ركبت  ولميس كملت مع زاكي 

زاكي : لميس كيفاش قبلتي تتزوجي؟؟ شكون هو ؟؟؟

لميس : شنهي هاذي كيفاش قبلت راني في عمر الزواج الطفلة اخرتها دار راجلها 

زاكي : اووووهووووو شكون راه يهدر 

لميس : ههههههه اسكت عيشك 

زاكي : والله اني سيريو  لميس مكيش من النوع اللي يحب يرتبط نتي طفلة تحبي الحرية تحبي كلشي يمشي برايك والزواج على بالك مسؤولية وراح تتقيدي بالراجل و ......

لميس : زاكي ماتخممش فيا علاباللي وش راني ندير مام وتزوجت ميش رايحة نسمح للزواج هاذا يقيدلي احلامي تعرفني مهبولة ومتهورة ورايي نديرو نديرو

زاكي : انتي ادرى علابالي منخافش عليك قادرة على شقاك .... مقتيليش شكون  ؟؟ 

لميس : نهار العرس تشوفو