လူသည် စိတ်ကဦးဆောင်သော သတ္တဝါဖြစ်ရာ စိတ်ကို တသသနှင့် လက်သပ်မွေးထားမှသာ အရာရာ အဆင်ပြေမည့်ပုံပင်။ ဒီတော့လည်း လိုတမှာ လေ့ကျင့်ခန်း မလုပ်လို့မရတော့။ အစားက မမှန်၊ အလုပ်ကပင်ပန်းနဲ့ နေမကောင်းဖြစ်ရင် ကိုယ်ပဲ ခံရဦးမည်။ အစကတော့ တိုက်ခန်းဝေးလို့မို့ အချိန်မရခဲ့သော်ငြား အခုတော့ နာရီအနည်းငယ် ပိုထွက်လာပြီမို့ လေ့ကျင့်ခန်းက မလုပ်လို့မဖြစ်ပေ။
ဖျာပေါ်ထိုင်ချရင်း သက်သောင့်သက်သာဖြစ်သော အခြေခံလေ့ကျင့်ခန်းအနည်းငယ်ကို လုပ်သည်။ ချွေးအနည်းငယ်စို့လာသောအခါမှ အကြောလျှော့ရင်း လေ့ကျင့်ခန်းလုပ်ခြင်းကို အဆုံးသတ်လိုက်တော့သည်။ ထိုအချိန်ကျ မီးဖိုထဲက ရေနွေးအိုးက တဖူးဖူးမှုတ်နေပြီဖြစ်သည်။ လိုတ ပလပ်ကို ကမန်းကတန်းဖြုတ်ရင်း ခေါက်ဆွဲပြုတ်ထုပ်ကို ဖောက်ထည့်ထားလိုက်သည်။
ချက်ချင်းတော့ စားလို့မရသေး။ ရေချိုးရဦးမည်။ ဒါမှ အလုပ်လုပ်ရတာ လန်းလန်းဆန်းဆန်းရှိမည်မို့ ကျောင်းသားဘဝတုန်းကလို ပျင်းတယ်ဆိုပြီး မချိုးလို့မဖြစ်။
တဘက်တစ်ထည်နှင့် ရေချိုးခန်းဝင်ကာ ပြန်ထွက်လာတော့ ခေါက်ဆွဲချောင်းလေးတွေ ပျော့သွားပေပြီ။ ရေနွေးကတော့ နွေးရုံသာရှိတော့သည်။ လိုတက ခေါက်ဆွဲဖတ်တွေကို ဆယ်ထုတ်လိုက်ကာ ပန်းကန်အသစ်ထဲခွဲ၍ အရသာမှုန်တွေကို ဖောက်ထည့်လိုက်သည်။ ပြီးတော့မှ ဟင်းရည်အဖြစ် ရေနွေးအသစ်ကို နည်းနည်းလေးပဲ ထပ်ထည့်သည်။ သူက ဟင်းရည်များများသောက်တတ်သူမဟုတ်တော့ အများကြီး မလိုပေ။
Shirtလက်ရှည်ကို သေသေချာချာ ကြယ်သီးတပ်ကာ မနေ့ညက ကြိုထုတ်ထားသည့် ပုဆိုးကို တစ်ပါတည်းဝတ်သည်။ ဆံပင်ကို သပ်ရပ်အောင် အနည်းငယ်ဖြီးလိုက်လျှင် သူ့ပြင်ဆင်မှုက ပြီးဆုံးသွားပြီဖြစ်သည်။ ရုံးယူသွားမည့် စာရွက်စာတမ်းအနည်းငယ်ကို လွယ်အိတ်ထဲထည့်ရင်း ဖုန်းကိုပါ မမေ့မလျော့ထည့်ထားရသည်။ ဖုန်းမေ့ကျန်ခဲ့လျှင် ဘယ်လိုမှ အဆင်မပြေ။
အားလုံးပြင်ဆင်ပြီးမှ ဧည့်ခန်းကစားပွဲမှာ ခေါက်ဆွဲပန်းကန်တင်ရသည်။ အဖုံးဖွင့်လိုက်သည်နှင့် မွှေးပျံ့လာသော ခေါက်ဆွဲက တခြား ဘယ်အရာနဲ့မှ မတူ။ လိုတကတော့ အသင့်စား စားစရာတွေထဲမှာ ခေါက်ဆွဲပြုတ်တီထွင်တဲ့လူကို တော်တော်ကျေးဇူးတင်မိသည်။
![](https://img.wattpad.com/cover/299256738-288-k930308.jpg)
YOU ARE READING
ကောင်းကင်တမျှ (Completed)
Romanceနှစ်ပေါင်းများစွာ တစ်ဖက်သတ် ချစ်ခဲ့ရပြီးတဲ့နောက် ကံကြမ္မာက သူ့ကို မျက်နှာသာပေးနိုင်ပါ့မလား။ သူ့အဖြစ်က ငယ်သူငယ်ချင်းကိုမှ တည့်တည့်ကြီး ချစ်မိတဲ့ အဖြစ်မျိုး ႏွစ္ေပါင္းမ်ားစြာ တစ္ဖက္သတ္ ခ်စ္ခဲ့ရၿပီးတဲ့ေနာက္ ကံၾကမၼာက သူ႔ကို မ်က္ႏွာသာေပးႏိုင္ပါ့မလား။ သူ႔...
Episode 116
Start from the beginning