بعض البشر لـو يطلب الروح تفداه
نرخص غـلانا في غلا شخص نغليه
لان الوفاء و الطيب و الصدق مبداه
وكل الصفات الطيبة تنوصف فـيــه
-
الصباح امتلى البيت بريحة القهوه حطت الصحن الي فيه الفطور وصينية القهوه قدامهن بإبتسامه:يازين هالصبح يوم انا نتصبح بهالوجيه السمحه
الجده:ياالله يسعدتس يام صقر
بعد الفطور حلفت عليه مايطلع من البيت الا وهو قايل الي عنده
تنهد وهو يجلس بجنبها ويخبرها بوصول سياف وزواجه وقفت بهدوء ترتكز على عصاها وهي تنادي على هبوب:مشينا يم بيتنا
لافي وقف على طول ومسك يدها برجاء:يمه اجلسي
ابعدت يده ومشت طالعه واسرعت وراها العمه هبوب ناسيه بنتها نايمه عندهم :يمه الله يهديتس اصبري
طنشتها وهي تمشي وصلت البيت وفتحته متجهه لغرفته قبل تطقها التفتت لسياف الي كان وراها وباس راسها:ياحي هالوجه شحالتس ياكل الدنيا
ناظرته بعتب ومشت لغرفتها بضيق كان بيلحقها لكن مسكته عمته وعينها على امها:اتركها الحين
سياف بحزن:بس ياعمه
قاطعته:عتبانه عليك بالحييل اتركها الحين لاتزعلك وتزعل روحها
تنهد ونزل راسه بضيق كان يحميهم من اي شي يضايقهم والحين صار ضيقهم الواضح هو سببه
العمه:تزوجتها صدق ؟
اكتفى بهز راسه تنهدت ماباليد حيله: افطرت
سياف:من له نفس ياعمه
العمه هبوب:الله ييسرها كل شي له حل بهالدنيا لاتهم صحتك شوف وجهك كيف شاحب ونحفان
سحبته معها للمطبخ
:
الظهر من سمعت ان سياف رجع نست كل شي بس تبي تشوفه كيف حاله دخل وهي تلبس عباتها مستعجله:وين رايحه؟
هبوب وهي تلف طرحتها بعشوائيه:سياف رجع بروح له
بان الضيق بوجهه ماانتبهت له من كثر شوقها لاخوها مشت من جنبه مسرعه دخلت للبيت استغربت لاعمتها ولاجدتها موجودين
فتحت باب غرفته بسرعه وفرحه :سياف
بلعت ريقها بصدمه من شافت فاتن جالسه على السرير بدون اي غطى وسياف مقابل لها رجعت قفلت الباب بقوه وهي تتنفس نست فاتن تماماً التفتت لسياف الي يرحب فيها من طلع
ابتسمت تتأمل وجهه الذابل بدت عيونها تدمع من قرب وحضنها:كيف حالتس يابهجة سياف
ابتعدت عنه وعيونها بعيونه:طافيه من بعده
ماقدر حتى يبتسم لها ويطمنها انه بيظل جنبها وبيكون عزوتها الي ماينحني يناظرها بضيق وحزن اعتلى صدره
شهقت وهي ترجع تحضنه:تكفى يااخوي لايضق خاطرك
تنهد بقوه ابعدها وباس راسها:انا بخير ياهبوب انتِ شخبارتس
مسحت وجهها وابتسمت بقوه:هبوب وضناها بخير
ناظرها ينتظرها تفسر كلمتها حطت يدها على بطنها
:بتصير خال انا حامل
باس راسها مره ثانيه بفرحه:مبرووك الله يجعله من الصالحين
هبوب:الله يبارك فيك
سكتت ثواني ثم اشرت براسها للغرفه:فاتن
سياف:صارت زوجتي وعن حملها اجهضته
اختفت الإبتسامه وبدهشه:تزوجتها
مسح على شعرها بحنان اخوي وغصته تتزاحم بحلقه وده يقولها على كبر حزنه وضيقه لكن فرحاان انه هزم هالبعد وصارت قريبه منه هالقد لكنه ماقدر ينطق اخذ نفس وهو يسئلها طبعه الي يخبي حزنه اكبر منه:شخباره
نزلت عينها للارض:مايسرك حاله
التفتوا على فتحت باب الجده الي مطنشتهم وراحت تمشي للحوش ناظرت هبوب بسياف:زعلانه منك صح
اكتفى بهز راسه:روحي لها
مشت ووصلت لجدتها الي تمشي بشرود مسكت كتفها:ياجده بشويش ولاتبيني اركض
ماتقدر على هبوب ابتسمت سحبت يدها باستها:اشوفتس احسن اليوم
هبوب:ايه الحمدلله ونشطانه بعد
الجده:الله يديمها عليتس
:
المغرب ببيت العم لافي
سحاب استنفرت عليهن:اييش وليش ماصحتيني
جنى ضحكت:والله ماادري وشجاهن طلعن مسرعات
سحاب بقهر:امي نستني
فطست ضحك سجى عليها قالت جنى:كبرتي السالفه ياخبيله الي يشوفنس يقول امتس هاجرت كلها خطوتين وانتس بحضنها
ام صقر فتحت الباب:يلا يابنات العشاء جاهز
سحاب وقفت تلبس عباتها بزعل واضح بوجههاللان ماتأقلمت زين عليهن وتستحي من امهن وابوهن
ام صقر:وين بتروحين
سحاب:لامي
ام صقر:والله ماتمشين وانتِ ماتعشيتي بيزعل خالتس
جنى سحبت عباتها:يلا نتعشى اتركي عنتس الدلع الزايد
سحاب اضطرت تجلس وتتعشى مارضى خالها تروح لحالها جلست للصلاه ووصلها معه وراح للمسجد
دخلت ابتسمت من شافتهم بالحوش يتقهوون نست زعلها جاتهم مسرعه باست راس جدتها بإستعجال وضمت امها وتكرر بوستها على يدها دفتها امها بشويش عنها:بس اتركي هالعاده
ضحكت وجلست بجنب هبوب ابتسمت لها:وشعندتس جايه
هبوب:سياف رجع وجيت اسلم عليه
ميلت راسها لسحاب:واشتقت لسهرات السطح
سحاب بفرحه:بتسهرين اخيراً يالعجيز
ضحكت هبوب وهزت راسها:نوسع الصدر شوي
حضنتها بضحكه وهمست:للحين ماخلصت الخرابيط على قولتس نسمر عليها
العمه هبوب:وشعندكن تتضاحكن
سحاب ترقص حواجبها:اسرار
سمعت تنحنح سياف ومناداته لهبوب تغطت على طول وهي بنفسها ياسبحان الله حتى صوته صار جداً عادي رفعت راسها من شافته اقبل عليهن ميلت فمها ايمن يتفوق عليه من ناحية الطول والوجه البشوش عقدت حواجبه من مقارنتها
هبوب:تعال
سلم على راس جدته الي مطنشته وطلع
هبوب برجاء:جده
ماردت عليها كملت تتقهوى وهي من داخلها مسامحته وراضيه عليه لكن تبيه يصحصح على تصرفاته الي وضحت بملامح وجهه نحف لدرجة عظام فكه وضحت بشكل مخيف والهالات الواضحه للكل
-
بالليل
بالمطبخ تهمس لها:يلا بسرعه حطيه بالصحن قبل لاتحس امتس علينا
هبوب بإستعجال وتفتح الدوالاليب :الله يهديها امي ماادري وش مشكلتها مع الشبسات من زمان ادسدس عنها وهذا بعد وينه
هبوب:وش تدورين
سحاب تأففت:شكلي نسيته بالبيت
هبوب ترتب الصينيه:وشهو
سحاب:المارشملو
هبوب شالت الصينيه ومشت:مالت عليتس
لحقتها مع الاغراض الباقي ضبطن ججلستهن بالسطح
ابتسمت ونظرها لبطن هبوب:تحرك
ضحكت هبوب وهي تمسح على بطنها:توي بالشهر الثالث
قربت منها:ايش احساسكِ وانتِ بتصيرين ام
اخذت نفس:مااقدر اوصف لتس شعوري ياسحاب خوف وفرحه ماادري مشاعر متلخبطه
ابتسمت لها لكن انمحت ابتسامتها من قالت سحاب:يارب ياحبيبي سحاب تجرب هالشعور باقرب وقت
رجعت مكانها بهدوء صبت لها شاهي لكن هبوب سحبت الكاسه من يدها الي ترجف:والله انتس موعلى بعضتس من ايام علامتس
رفعت عيونها لها تحاول تبتسم:وش الي موعلى بعضي يازيني ويازين حالي انتي موسوسه
ماحبت تضغط عليها فسكتت عنها رجعت الكاسه قدامها :افكر اسوي لبس نونو بالصوف تساعديني
ابتسمت لها:اكييد بس مااعرف
هبوب وقفت:اجل بروح اجيب الصوف نبدأ من الحين واعلمتس
تنهدت سحاب انسدحت تتأمل السماء بنجومها لدقايق
حطت يدها الي ترجف على عيونها مثل كل مره حست بالدموع
مدت كفوفها قدام عينها قالت بصوت مسموع:بكرهه تأمل السماء والسبب انت
جلست هبوب الي سمعتها وهي داخله:والله انتس فاقدته وبالحييل بعد
مسحت وجهها بسرعه وجلست سحبت الصوف تشغل نفسها فيه مطنشتها:الله لونه حلو
عصبت هبوب منها:تراتس واضحه لاتنكرين
سحاب:اممم شرايتس نحط الاصفر بالطرف
هبوب رمت عليها الكيس كامل بقهر منها ماتدري ليش صايره كذا ولاكأنها تكلمها
سحاب:شبلاتس
هبوب بقهر:بلاي انتِ دامتس تحبينه وتفقدينه ليش مصره على الطلاق
سحاب بهدوء ماتدري وش جاها من قوة نبض قلبها تحس جسمها كل يهتز :ومن قالتس اني احبه لاتتوهمين ياهبوب تعبت اقولكِ
هبوب وهي تأشر عليها:اتوهم هاا ودموعتس ووسرحانتس من ينطري اسمه ومن غاب وانتي موسحاب الي اعرفها
وقفت بسرعه صرخت ببكيه:ايه احبه وودي بقربه ابيه وماابيه لكن وش بيفيدني هالحب فيه إذا طلاقنا قريب
وقفت هبوب قبالها:لارجع تفاهموا بهدوء صدقيني بيتراجع عن الطلاق لاجاء الود منتس
التفتوا على العمه هبوب عند الباب ويدها على صدرها بشهقه:طلاق
جاتها مسرعه:ناويه على الطلاق ياسحاب وتقولين مابينكم شي والله اني حسيت من جيتي بعفشتس هنيا
سحاب بحده وبقهر المشاعر المتناقضه بصدرها:ايه وانا الي طالبه الطلاق وهذي نتيجة غلطتكِ يمه وغصيبتكِ لي من البداية قلت لكم ماابيه ليه ترميني عليه
من كلامها الي قهرها وزود الضيق بصدرها ضربتها كف ترك دموعها تنزل تتسابق على خدها ابتسمت لامها بحزن وركضت للغرفه ماعد عرفت لنفسها قلبها تملكته مشاعر لهفه لشوفته لكن عقلها يدفعها للبُعد بجنون
كانت بتلحقها لكن هبوب مسكتها ودموعها بعينها من الي صار قدامها:تكفين ياعمه اتركيها الي فيها يكفيها
العمه بغضب نفضت يدها:وشفيها مافيها الا طولت اللسان والعناد وصغر العقل اجل غلطتي يوم اني اخترت لها سيد الرجال ارخيت لها الحبل لين صار هذا حالها هذي لازم يجي ابوها يتفاهم معها
شدت على يد عمتها برجاء:تكفين ياعمه اجلسي وانا اقنعها تكفيين اتركيها الحين
نفضت يد هبوب والدموع بعيونها وتركتها معصبه
زفرت هبوب نزلت خربت هالسهره الي ببدايتها شافت جدتها واقفه عند الباب تناظر للحوش وصلت عندها:جده مانمتي
الجده:وين يجي النوم وهذا حال اخوتس
حضنتها على جنب حطت راسها على كتف جدتها:تعالي نامي ودي انام بحضنتس
الجده بضيق زفرت:مالي نومه هنا امشي لبيت لافي
اعتدلت بوقفتها:هالحين بنص الليل والناس نايمه
الجده: مااقدر اصبر للصبح الضيق كاتم على صدري بهالبيت
تعدتها الجده للباب الرئيسي استوعبت ان جدتها لابسه العباه يعني لو ماجات وشافتها روحت لحالها وبيدها شنطه صغيره ركضت بسرعه توقفها:جده صادقه
شافت نظراتها كملت:انتظريني بروح معتس
لبست عباتها بإستعجال الي تركتها بالصاله ومشت مع جدتها
تحمد ربها بيت عمها موبعيد الحي هادي وبنص الليل مافيه احد خافت لكن ارتاحت من فتح عمها الباب مصدوم من جيتهن:يمه هبوب شبلاكن
الجده تعدته للداخل هبوب تنهدت رفعت اكتافها:مادري شبلاها فجاءه تبي تجيكم وحالفه ماتجلس بالبيت
هز راسه العم لافي خوف انها متمشكله مع سياف الي متغير عليهم ومزعلها :لاحول ولاقوة إلا بالله، ادخلي يابنتي
ESTÁS LEYENDO
كل مخلص في الهوى واعزتي له...لوتروح سنين عمره ينتظرها
De Todoرواية كل مخلص بالهواء واعزتي له ... لو تروح سنين عمره ينتظرها الكاتبة: آمان القلب الرواية كتبتها سنة 2019 لكن مانشرتها وقررت انشرها الان تم التعديل على فصولها وبعض الأحداث ** نزول البارتات حسب الوقت الي اكون فاضيه فيه اتمنى تدعموني بتعليقاتكم وات...
