مرت ايام الاجازه بفرحها وحزنها وكلن يحمل بقلبه مشاعر مختلفه مرت على بيت ام لافي بسعادة تبان بوجيه اهل بيتها سوت عشاء كبير وكل اهل الديره حضر وكانت هي بنفسها على رأس هالعشاء من تجهيزات العشاء للترحيب للقهوه كانت فرحتها ماتوسع هالكون برجعت بنتها الوحيده وفرحتها كبرت لما رجع بيتها تضج فيه الحياة ولدها لافي وبناته وبنتها وعيالها واكيد عيال محمد
باقي يومين وتبدأ الدوامات لافي رجع مع اهله
وابو سحاب رفض يمشي ويخليهم بالديرة
الجده : حلفت عليك بنتي وعيالها اتركهم عندي
ابو سحاب:مااصبر عنهم ياعمه
وقف سياف بقهر من زوج عمته وصوت جدته كله رجاء لكنه سكت من وقف ابوه وقال: اختي بتجلس عندنا ماشبعنا منها وانت دوامك كله اربع ايام وتعال بابنا مفتوح لك
ابتسم ابو سحاب ووافق من شاف نظرات سياف له
سحاب كانت مقدمه على تمديد لإجازتها بطلب من امها قبل يجون للديرة فجلست هي وزايد مع امهم
الكل سلم عليه وودعه ودخلوا البيت الا سياف الي وقف عند الباب وانظاره بمكان اختفاء سيارة زوج عمته يحرك مسبحته ( والله اني حاس بنظراتتس يافاتن بس وش بيدي وانتِ اخترتي غيري تنهد ، تمنيتتس اول الحاضرين بعشاء عمتي لكنتس قطعتِ خطوتتس لبيتنا وبعتي )
رد السلام على الي وقف قدامه: أنت سياف إذا ماخاب ظني
سياف: ايه بالله انا سياف امرني
:قد شفتك يم بيت العم عبدالله بسألك عنهم لي ايام اجيهم ماهم فيه عندك خبر متى راجعين
سياف: لاوالله ماعندي خبر ، بس ماقلتلي وش معرفتك فيهم
ابتسم له: معك نواف المصعب صاحب ايمن ولدهم
: والنعم شكلك مو من الديرة
:صح عليك تعرفنا على بعض بإستراحة واحد من الشباب جيته قبل فتره وتبي الصراحه ديرتكم تأسر القلب بخضارها فكرت اسكن هنا
ضحك سياف بخفيف: ياهلا ومرحبا
طلت براسها من ورا اختها:ياعجايب الدنيا سياف يسولف ويضحك واضح مبسوط بعمته
قفلت طرف الستاره ولفت لاختها وبكت كعادتها لما تشوفه :تكفين ياافنان مابيه ماابيه ليش يغصبوني ماابيه ولااحبه
مسحت دموع اختها: لاتبكين حلفت لتس من قبل مماراح يااخذتس واقص يده لو حاول يمس شعره منتس الفرج قريب بإذن الله بس انتِ لاتضعفين
وهذي هي حالة فاتن من بكى لبكى لين خط الدمع على خدودها والهالات وذبول وجهها اكبر دليل على الي تعيشه
يوم الجمعة بعد الصلاةكان يتمشى شاف بقالة ايمن مفتوحه استغرب لانه من شوي مر جنب بيتهم ماشاف سياراتهم دخل :ايمن !
رفع راسه من الطاولة ثم وقف:سياف ياهلا شخبارك
:الحمدلله نشكره ونحمده ، متى رجعتوا
:هااه قبل امس
عقد حاجبه: قبل امس وحمد وينه ماشفته وبعدين تعال سياراتكم وينها
نزل راسه وسكت مارد
وضح الخوف بوجهه: اهلك فيهم شي
هز راسه بلا ورجع سأل ونبرته ترتفع اكثر: ايمن ارفع راسك
رفع راسه وانصدم من عيونه الذبلانه : ايمن حمد وينه فيه شي
ايمن جلس وسحب الكرسي الثاني:اجلس اول
جلس ينتظره يتكلم
:بمجلس خالي فهد طلب حمد يتزوج بنته وكان هالحكي على مسمع خوالي كلهم وعيالهم لكن حمد رفض وقالهم ان هذا زواج وعمر وانه بياخذ من ديرة ابوي واحتد بالنقاش مع خالي لين تدخلوا اخوانها وتهاوشوا ووصلت لطرد حمد لحقته ومشيت معه خفت عليه يسوق وهو يتنافض من العصبيه لكن حلفني مااقولك شي والسيارة مركونه ورا المزرعه
وقف بقهر :وهو وينه الحين
:مادري من امس العشاء ماشفته دورته بكل مكان ياخوفي رايح لدوامه وهو كذا صدقني بيرجع بدون وظيفه
وصلت معه من خوالهم الي بكل مره تنتهي بهواش ومن حمد وتخبيته عنه والحين اختفائه فتشوا الديره شبر شبر لين تعبوا اذن عليهم المغرب صلوا ورجعوا جلسوا عند الباب الازرق :وين تظنه راح اول مره يسويها
:علمي علمك دايم تهججه عصبيته لكن موللحد الي مانلقاه
مسح وجهه ووقف: قم ادخل خلنا نتعشى
:ايوالله من الصباح على لحم بطني
دخله للمجلس الصغير بخلف الحوش ووقف عند الباب فتحه بشويش وينادي هبوب لكنها ماردت عليه
الي ردت هبوب عمته:هلا ياعمه فيه احد ولاادخل
: ادخل ياسياف مافيه احد
(الله واكبر ياسياف حتى ببيتك صرت تستأذن تدخل) سلم على عمته :ماشاءالله ياعمه تقرين
ناظرت للكتاب وابتسمت:ايوالله اقراء دام الكل قرر ينام
:هبوب نايمه مااخبر تحب تنام هالوقت
ضحكت: ايوالله نامت بعد سوالف سحاب وزايد
:وجدتي وينها
:ياروحي ياامي تقراء قران بغرفتها
سكت مارد: تبي شي ضروري من هبوب
: كنت ابيها تحطلي عشاء
وقفت: افاا وانا عمتك جوعان الحين اسويلك احلى عشاء
ابتسم :لاتكلفين على روحتس ياعمه بشوفلي اي اكل بالمطبخ يكفيني
:لاوالله اليوم تذوق طبخي
:تسلمين لي ياعمه
راحت للمطبخ بفرحه وهو اتجهه لغرفته
واخذ الاوراق الي بدرجه شيع الغرفه بنظراته
فيه احد داخل غرفته من متى وشباك غرفته مقفل ومسدوله الستاره عليه واغراضه مرتبه على التسريحه (هبوب ولاعمرها رتبت غرفتها عشان ترتب غرفتي) طلع وهو يقفلها انفتح الباب الي بجنبه وطلعت ببجامتها الورديه وهي تتثاوب وتمسح تهجد شعرها انفجع لما شهقت ورجعت دخلت اما هو هز راسه بضيق:استغفرالله العظيم
رجع للمجلس شافه سرحان والضيق بوجهه
جلس جنبه ربت على كتفه : هونها وتهون
مد عليه الاوراق: امسك
:وشذا
:هذي اوراقك قدمت لك على شركة... ووافقوا مبدئياً
:يعني
:يعني الله يسلمك تمشي لهم بكره يختبرونك مده معينه وبعدها تتثبت ولا لا على حسب شغلك
حط الاوراق بحضن سياف:والله انك فاضي اقولك اخوي مختفي من امس تقول وظيفه ماكانك خويه وتخاف عليه
:حمد ماهو طفل ينخاف عليه مااختفى الا لانه مايبي يضر احد بعصبيته وانت اكثر واحد يعرفه لاعصب يحرق الي حوله بس يهدء بيرجع انت تطمن ولاتشيل هم
تنهد بقوه: فرصتك ياايمن سعيت بدالك لانك أخوي لاتردني
رجع مد الاوراق عليه واخذها يقرائها
اندق الباب قام وفتحه لقى عمته حاطه صينية العشاء
اخذها وتعشوا سوا
سياف: اهلك متى راجعين
:ماراح يطولون اكييد يوم يومين
ارخى جسمه :يلا قوم نام عشان تصحى الفجر وتمشي
مارد عليه وقف ومشى لبيتهم
مر الليل و سياف على نفس سدحته غاب عنه النوم يفكر بحمد ناظر بساعته مابقي الا قليل ويأذن الفجر
توضى واتجهه للمسجد بعد الصلاه شاف حمد جالس عند الباب جلس بجنبه :عساك هديت
التفت عليه: ماكلمت أختك ؟
:لا ، لاتمر هالسنه وخوالك زعلانين منك
وقف بغضب:مين المفروض يراضي الثاني انا ماغلطت ياسياف حتى رفضي ماسمعه غير خالي فهد احترام للبنت قبل احترام ابوها والله مابغيتها توصل لهدرجة لكن الخال رفع صوته يهاوش مالهم اي حق يربطوني فيها هذي حياتي مال اي احد دخل بزواجي
سحبه من يده جلسه:قصر صوتك
زفر بقوه يحس صدره يضيق عليه وصار يمسده عله يخف الالم الي يكتمه
التفت له: كلمها اليوم
:ليش رفضتها
:يشهد الله مارفضتها لشي يعيبها بنت خالي على عيني وراسي لكني طالب أختك قبل وأمي تدر...
قطع كلامه من شاف سيارة ابوه وقفت وناظرته امه بزعل ودخلت تقدم ابوه وهو شايل ترف النايمه
:السلام عليكم ورحمة الله وبركاته
ردوا عليه السلام وجه كلامه لولده:الحق امك وراضها مهما كان هذولا اخونها
توجهوا للبيت وسياف يناظرهم اسرع لسيارته ياخذ علاجه مايبي احد يداريه ويخاف عليه صار يتحمل الالم الي تداهمه عشان مايشوف الضيق بعيونهم عليه
وصلها لحد باب المستوصف وطبعاً بدون ماتدري جاي لهديرة لشي وصار بشي ثاني اتكى على الجدار ونظراته للمستوصف (ايش الي جاك يانواف مانت صاحي تراقب بنت الناس من بيتها لدوامها) مسح على وجهه(صحصح صحصح ) تنهد ورجع دربه الا يتقابل مع سياف الي واقف عند سيارته يشرب ماء
ابتسم وتقدم له:صبحك الله بالخير ياسياف شخبارك
اعتدل بوقفته: ياهلا ومسهلا نشكره ونحمد
: الحمدلله
:بشر عسى بييت النيه بالسكن عندنا
ابتسم:يشهد الله ان اهل ديرتكم يردون الروح
واحوس ادورلي بيت صغيرون على قدي
ابتسم بخفه والتعب واضح بعيونه ضرب على صدره:ابشر بالبيت
مسك يده بدراميه:تكفى قول ان عندك بيت جاهز
ضحك عليه:عز الله انك خوي ايمن، ايه عندي
رد له الضحكه:من عاشر قوم اربعين يوم صار منهم
:على طاري ايمن تراه ببيته
التفت على بيتهم:جد اخيراً متى رجع
:امس
سكتوا دقايق سياف: تامرني بشي
ابتسم له:لا تسلم ياسياف
YOU ARE READING
كل مخلص في الهوى واعزتي له...لوتروح سنين عمره ينتظرها
Randomرواية كل مخلص بالهواء واعزتي له ... لو تروح سنين عمره ينتظرها الكاتبة: آمان القلب الرواية كتبتها سنة 2019 لكن مانشرتها وقررت انشرها الان تم التعديل على فصولها وبعض الأحداث ** نزول البارتات حسب الوقت الي اكون فاضيه فيه اتمنى تدعموني بتعليقاتكم وات...
