كل مخلص في الهوى واعزتي له...لوتروح سنين عمره ينتظرها

بارت24

حطت صينية الحلا بالثلاجة :ياعمه ارتاحي انا بزين القهوة 
العمه هبوب الي واضح الضيق بوجهها:لاوالله بزينها انا انتِ روحي لخويتس عقليها
زفرت وراحت لسحاب الي تغيرت عليهم ماتداني كلمة ودايم معصبه وكل ليل تبكي فتحت باب الغرفه ظلام الا من الضوء الي جاي من الشباك وسحاب منسدحه عنده
اول ماسمعت الباب لفت جسمها جهة الجدار: بنام
هبوب قفلت الباب وجلست عند راسها:قومي ياسحاب
تاففت:وشتبين مورايقه لك
وقفت هبوب وشغلت الانوار كلها وسحبت عنها الحاف
فزت بعصبيه:خيير وشعندتس انتِ بعد
كتفت يدها:يرضيتس الضيق الي مرسوم بوجه امتس
صدت بوجهها وماتكلمت
هبوب:رضى امتس فووق كل شي
سحاب:وانا رضاي ينضرب بالجدار
هبوب لفت وجهها لها:سحاب ايمن مافيه منه وعارفه ليش رافضته تنتظرين سياف عزالله بتنتظرينه طول عمرتس
صارت عيونها تدمع بدون صوت كملت هبوب: كيف افهمتس ان سياف بقلبه وحده ولاراح يبدلها اعرفه من عيونه فلاتضيعين حياتتس عيشي حاولي تودين ايمن ماتدرين يمكن يكون هو الخير كله بحياتتس انتي حاولي وإذا ماقدرتي كلن يروح بطريقه
جلست وهي تضم رجلها لصدرها حطت يدها على وجهها وهي تنهار بكي حزنت عليها هبوب قربت منها وضمتها
:تذكرين يوم خطبني حمد وكنت رافضته نهائياً حتى تفكير محيته تذكرين كلمتس لي فكري ليش تكرهينه وفكري بمواقفه ورجولته كان كرهي له مجرد غيره لانه ملازم سياف دايم وكانت مفتاح للحياة الحلوه الي اعيشها الحين وبرجع اكررها عليتس ياسحاب ايمن رجال ونعرفه بطيبه ووصله الدايم لنا فكري ياسحاب فكري والله انه ينشرى
هزت راسها رافضه لكل كلام هبوب ابتعدت عنها بتنهيده ورجعت لجدتها والعمه
:
جلست بتعب على الكرسي بعد مارتبت جميع الملفات
الدكتورة هناء:الله يعطيتس العافيه
ابتسمت لها:الله يعافيتس
اعتدلت وقدمت بجسمها العلوي لجهة الدكتورة:بقولتس شي
الدكتورة هناء بإهتمام:عساه خير
اخذت نفس:قبل امس جاني نزيف وهدت حيل ولما رحت للدكتورة مها وفحصت عندها تقولي كنت حامل وسقط الجنين
الدكتورة جات لعندها وحضنت راسها: ياروحي معوضه خير والحمدلله على سلامتتس
افنان والغصه بحلقها:كل يوم يقولي ربي يرزقنا بطفل
ميت على مايجيه ولد يشيل اسمه ويعيشه كل الي فقده هو ايش بقوله الحين والله يتكدر خاطره
الدكتورة تمسح على راسها:الله يعوضكم بالولد الصالح لازم رجلتس يدري بيضيق كم يوم لاتخبين عنه شي
افنان هزت راسها والدكتورة توقفها:ارجعي لبيتتس وبعطيتس اجازة اسبوع
افنان:بس ا
قاطعتها:يلايلا على بيتتس ارتاحي ولابزعل منتس
ابتسمت لها:عاد مااقدر ازعلتس
راقبتها وهي تشيل شنطتها وتطلع وهي تدعي لها تحب افنان وتعتبرها بنتها ودايم تنصحها وتوجهها للشي الصح بحكم كبر سنها ومعرفتها لام افنان
اما افنان شافت سيارته واقفه بجنب البيت زاد الضيق بقلبها
دخلت وعيونها تبحث عنه سمعت صوت بالغرفة دخلت بسرعه
ماامداه يغير بدلته الا افنان مداهمته التفت بسرعه عليها وبيده حزام سلاحه شاف كيف تغيرت ملامحه وشهقتها الخايفه تأشر عليه على طول رجع السلاح لورا ظهره يخبيه
كيف بيفهمها الحين :سلاح الي معك سلاح صح
غمض عيونه وهو ياخذ نفس وفتحها نزل السلاح بالارض واتجهه لها: لاتخافين
رفعت عيونها لعيونه وهي ترجف وهي للان ماانتبهت لبدلته همها السلاح الي كان بيده والف فكره سيئه براسها
حضنها بسرعه من شاف رجفتها:افنان
هي للان مصدومة دايم افكارها تتمحور عن كل شي سلبي بسبب حياتها الي عاشتها بخوف ابعدته عنها وهي تناظر للسلاح الي بالارض:ليش معك سلاح وشمسوي
ادرك انها ماانتبهت للبدله واستنتجت وظيفته همها السلاح
ابتسم بحنيه:ناظريني
هزت راسها بلا وعيونها مركزه بمكان واحد
حاوط وجهها ورفعه له غصب عنها:ناظريني ياافنان
رفعت عينها له تنتظره يبرر السلاح وقلبها يدق بسرعه
ابتسم باس جبهتهاثم فلت وجهها:شوفي وش لابس بتعرفين ليش معي سلاح
ناظرت وش لابس عقدت حواجبها وهي تقول:عسكري
ضحك وهو يأشر على كتفه ثم لبسه:كل ذا وتقولين عسكري
ناظرته بعدم فهم
رجع حضنها بحنيه:مباحث عامه ياعين نواف
شهقت وكانت هالشهقه طريق لشهقات وبكي
باس كتفها: ليش البكي
افنان وهي تضربه على ظهره:خفت خفت كل فكره سيئه جات ببالي
بعدها ويده على اكتافها:وش قلنا على هالافكار ننساها
مسح وجهها من الدموع وقالت:مااقدر ماافكر كذا وبعدين ليش ماقلت لي انك بالمباحث
حك راسه:اممم ممنوع اعلمتس هالفتره لكن هذا انتِ دريتي
وقال بتحذير :لاحد يدري عشان مااروح فيها
هزت راسها بطيب واشرت بيدها على السلاح وعينها بعين نواف: لااشوفه شلع قليبي شلع
نواف حط كفه على قلبها:بسم الله على قليبتس ياقليب نواف انتِ
حضنته وهي تخبي وجهها المحمر من البكي بصدره وهي تقول بنفسها {بتكسرين هالبسمه وبضيقين على قليبه الحنين}
:
فتح سيارته ودس فيها شنطته الي فيها هويته واوراقه الجديده للقضيه تنهد ودخل بيته ابتسم اول ماشاف امه طالعه من المطبخ اسرع لها:ياهالزول الي وحشني
ابتسمت وفتحت يدها له مرحبه:ياهلا ياهلا بروح امه
حضنها ثم باس يدها وراسها:شحالتس يالغالية
ضربته بكتفه:بخير دامني اشوفك قبالي وشهالغيبه
رجع باس يدها بقوه:وشنسوي نركض ورا الارزاق
امه:الله يرزقك من واسع فضله الرزق المبارك
ايمن وهو يرفع يده:اللهم امييين
سحبته للمطبخ:شوف سوينا مطبخ الي حايسه حوس
شيع المطبخ الصغير بسرعه ثم باس راس امه على جنب:جعلكم تسلمون ويطولي باعماركم يمه تعبتكم
امه ببسمه حلوه:يوم الهناء الي اتعب عشان عرسك
ايمن يقرب منها ويهمس:يمه رحتي يم العروس شلونها
ضحكت امه وهي تدفه برا المطبخ:لاجات عندك اسألها شلونها
ايمن بزعل:افاا يمه ماتبيني اعرف اخبارها
مشت لبيتها مطنشته اما هو اخذ نفس كبييير يحبها قليل فيها الا يعشق مواطيها مايدري كيف تمكنت من قلبه غصب وتربعت فيه ابتسم وهو يستذكر وجهها الاسمر حط يده على قلبه:تشمت بسياف والله بلاني بهالحب
:
الجده وهي تتوجع من ضرسها:شيليه عني ابليتيني بهالضرس
هبوب بزعل تسحب الصينيه يمها:افا ياجده انتِ الي اكلتي ماغصبتتس عليه
الجده اعطتها نظره ثم مدت عصاها تبي تضربها لكنها ابعدت بسرعه:ارجعي لبيتتس
هبوب وقفت والصينيه بيدها:وشسويت الحين تطرديني
ضحكت العمه وهي جايه لابسه ثقيل ثم جلست
هبوب بإستغراب:عمه شبلاتس مثقله الجو موبارد
العمه هبوب تضم الجكت عليها:من صحيت والبرد يحوفني
الجده بخوف مدت كفها:اقربي اشوف شكلتس سخنانه
قربت من امها الي تتحسس جبهتها:ايه بالله حويره هبوب اركضي جيبي لعمتتس شي يخفف عنها
العمه:لالايمه توي مااخذه هبوب ماكانتس طولتي عندنا
هبوب:حتى انتِ ياعمه ماتبوني
ضحكت العمه:ياعيني مااقصد شي بس الساعه بتجي وحده اكيد رجلتس بالبيت مايصير يمه تتركينه بروحه
بوزت هبوب كل ماجات تسهر عندهم يقولون رجلتس ورجلتس
الجده بنص عين:ايه بوزت هذا الصح الوحده ماتترك رجلها بروحه لكن بنات هالايام مابهن طب
ابتسمت لهن بزعلها وسلمت عليهن:اجل مع السلامه
الجده تشرب الشاهي:مري على اخيتس ياعيني هو ماغير يسأل عنتس
هبوب مشت بصينيتها:ابشري
حطت الصينيه بالصاله بتشوف سحاب لقتها نايمه رجعت شالت عباتها بيدها وصينيتها اتجهت للمجلس دقت الباب ثم فتحته اتسعت ابتسامتها من شافته لابس نظارته ويقرأ
ترك الكتاب ويرحب فيها جلست قباله:شلونك ياعزوة هبوب
تأمل ملامحها المبسوطه:دام بهجته مرتاحه وبخير هو بخير
ضحكت من لقبها الي تحبه من صغرها وهذا لقبها عنده ولاقاله تعرف انه يغليها بالحييل وفاقدها :ايه بالله مرتاحه
قال بجديه:شلون حمد معتس عسى مايزعلتس
ابتسمت ونزلت عيونها:حمد مافيه منه حاطني بعيونه
ارتكى على المركى بذراعه:حمد لومنه اثنين كان الدنيا بخير
ابتسمت بخجل مدت الصينيه له تضيع الحكي عن حمد تستحي من طاريه عند سياف:هذا نصيبك من الحلا
اعتدل وذاقه:الله ياهبوب فقدنا حلوياتس بعد مااعرستي
هبوب وقفت تلبس عباتها:متى ماطرى لك قولي وتبشر به لو اخر الليول
وقف معها:اجل ببتعبتس كل يوم
ضحكت عارفه مايحب الحلويات بس ياك عشانها:يوم الهناء
حاوطها بكتفها ويمشيها معه وهي حضنته على جنب:قول تم
سياف فتح الباب الازرق الخلفي:امري
هبوب بإصرار:قول تم اول
ابتسم لها مايبي يزعلها:تم
قالت بهدوء:تزوج
اختفت إبتسامته تحت انظارها وقف ابعد يده عنها:هبوب ا
قبل يكمل قالت:عارفه وشبتقول لاتعيش على ذكرى الكل حولك اعرس ودنا بالبشت على كتفك ونشوف عيالك ياسياف ا
رفع يده يسكتها:خلاص ياهبوب قلت لكم من قبل لاطرى ببالي جيتكم لاتضيقونها علي اكثر ماهي ضايقه
تقوس فمها تحت الغطاء ببدايت بكيه عارف انهها بتصيح لكن مايبي احد يتدخل حتى لو هم اقرب الناس له
هبوب بصوت مخنوق:ضايق ؟
تغصب الإبتسامه:لايابهجتي ماطرالي الضيق تطمني يلا ادخلي 
فتحت الباب والتفتت له:فمان الله
لوح بيده:بحفظ الرحمن
اول مادخلت اختفت إبتسامته رجع قفل الباب وجلس على عتبته
اما هبوب دخلت البيت هادي الكل نايم دخلت غرفتها شافته واقف وبيده جواله ابتسم لها
نزلت عباتها وغطاها وعلى طول توسدت صدره تبكي
انفجع حاول يبعدها عنه لكنها متشبثه فيه تصيح من قلبها مسكتها قدام سياف ماقدرت تتحمل اكثر حضنها يهديها:شبلاتس تصبحين مين زعلتس
ماردت عليه رجع قال:الجده قالت لتس شي
هزت راسها بلا
حمد:العمه او بنتها
هزت راسها بلا
تنرفز وبعدها غصب عنه:اجل من
هبوب وصوتها انبح من بكيتها القويه:سياف
عقد حواجبه:سياف مزعلتس
هزت راسها ورجعت حضنته مسح على شعرها:شقال لتس عشان اعرف وش اسوي له
شهقت وقالت بصوت متقطع:ما...مايبي يعرس للحين بقلبه يقول لاتضيقونها اكثر ماهي ضايقه
غمض عيونه وتنهد حتى هو ينقهر من يشوفه يسرح وعارف ومتأكد فكره كله يمها وعيونه الي تبين الضيق كل ماشاف خالد لكن وش بيدهم:ادعيله ياهبوب الله يرمم قليبه
ظل حاضنها لين هدت وابعدت عنه مسك انفها:اخيراً هديتي
مسحت على وجهها بتنهيده:مالي حيله غيرهالدموع
حمد:اتوضي وصلي لتس ركعتين لاتنامين وتوتس صايحه
هزت راسها وراحت للحمام امه هو تنهد وانسدح فكره انشغل عليه اكثر