မမဝေက ရယ်ရင်း ခေါင်းငြိမ့်သည်။
"အဲလောက်လည်း Pressure မများပါနဲ့ကွာ၊ကေသီ အောင်မှာ မမသိတယ်၊မမဖြေတုန်းက ကြည့်တဲ့စာအုပ်တွေရှိတယ်၊ကေသီလိုရင် လာယူလှည့်"
"ကျေးဇူးပဲမမရယ်"
ကျွန်မ လှိုက်လှဲစွာ ပြောမိသည်။တစ်ခါတစ်ခါကျတော့ အခုလိုအားပေးစကားလေးတွေကြားချင်နေတဲ့အချိန်လည်း ရှိတတ်တာပဲနော်။ကျွန်မ စိတ်ထဲကပြောမိသည်။
ညနေ၆ နာရီလောက်တွင်တော့ ၉လမ်းက ဆိုင်တစ်ခုတွင် ကျွန်မတို့ရောက်ရှိနေပြီ။ကျွန်မတို့ ခွဲစိတ်ဆောင်တွင် တာဝန်ကျသော အလုပ်သင်ဆရာဝန်ကလေးများပြောင်းရွှေ့ရတော့မည်ဖြစ်၍ နှုတ်ဆက်ပွဲလုပ်ပေးခြင်းပါ။မိန်းကလေး နှစ်ယောက်၊ယောကျ်ားလေးသုံးယောက်၊အားလုံးငါးယောက်ဖြစ်သည်။ပညာလည်းလိုချင်ကြပြီး အလုပ်ကြိုးစားကြကာ အကြီးတွေနှင့်လည်း အဆင်ပြေကြသောကြောင့် ပြောင်းရတော့မည်ဆိုတော့ စိတ်မကောင်းကြ။ဒါပေမယ့် ဒါ မျိုးက ဖြစ်နေကျ၊၊နောက်အသစ်ရောက်လာလျှင်လည်း သုံးလပြည့်လျှင် ထပ်ပြောင်းရဦးမည်ပင်။အခုချိန်တွင်တော့ ရာထူးတွေကြီးငယ်တွေဘေးချိတ်၊ဝဒ်ထဲမှာရခဲ့တဲ့အတွေ့အကြုံတွေ တစ်ယောက်တလှည့်ပြောကြ၊သီချင်းအတူတူဆိုကြ၊ပျော်ကြ၊စနောက်ကြသည်။
ထိုအချိန်တွင် ကျွန်မအိပ်ကပ်ထဲမှ ဖုန်းမြည်လာသည်။ vibrate လုပ်ထား၍ တော်ပါသေးသည်။အခန်းအပြင်သို့မသိမသာ ထွက်လာခဲ့၏။ဖုန်းဆက်လာသူက ပိုင်ပိုင်။အချိန်က ကိုးနာရီ။
"ပိုင်ပိုင်၊ဘာဖြစ်လို့လဲ"
"မမရယ်၊မေမေ တစ်ခုခုဖြစ်နေပြီလားမသိဘူး"
ပိုင်ပိုင့်အသံက ငိုချင်ချင်။" မမကိုရှင်းအောင်ပြောပြဦးလေပိုင်ပိုင်၊မငိုနဲ့"
"ရှစ်နာရီလောက်က မေမေဖုန်းဆက်တယ်၊ 19 လမ်းစျေးမှာရောက်နေတုန်း ဘာဝယ်လာခဲ့ရမလဲတဲ့၊ပိုင်ပိုင် ဂဏန်းကော်ကြော် မှာလိုက်တယ်၊ဝယ်ခဲ့မယ်ပြောပြီး ရှစ်နာရီခွဲကျော်ကျော်လောက်က ဖုန်းထပ်ဆက်လာလို့ ကိုင်လိုက်တော့ ဘာမှမပြောဘဲကျသွားတယ် ၊ပိုင်ပိုင်ထပ်ဆက်တော့ စက်ပိတ်သွားတာအခုထိပဲ၊ပြန်လည်းမရောက်ဘူးမမရယ်"
YOU ARE READING
To Cathy With Love
General Fictionတစ်သက်နှင့်တစ်ကိုယ်မရောက်ဖူးသည့် အရက်ဘားတစ်ခုတွင် မြနန္ဒာဟူသော အမျိုးသမီးတစ်ဦးကို ကျွန်မ ရှာဖွေနေကြောင်း သူငယ်ချင်းတွေမြင်ခဲ့လျှင် "ကေသီ၊နင်ရူးသွားပြီလား" ဟုအမေးခံရပါလိမ့်မည်။ *** ဇာတ်လမ်းထဲမှာပါတဲ့ အဖြစ်အပျက်၊အကြောင်းအရာနဲ့ ဇာတ်ကောင်တွေကို စာရေးသူ...
Episode 7
Start from the beginning