*#في~مهب~الريح《04》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*
المهم يوم الأحد و الإتنين ما مشيت المدرسه ، و تاني ما ح أمشي إلا الأحد الجاي و ناس البيت ما عارفين لأنو أبوي بطلع بعد شراب الشاي طوالي أما ناس رغد ف بقول ليهم ما بمشي إلا اغسل كبابي الشاي و أرتب المطبخ ، كل مره بقول ليهم أطلعوا انتوا أنا بطلع وراكم ، موضوع الفصل دا كان ومؤثر علي لأني ما إتوقعت إنو يجي يوم و اتهان و انضرب كدا و ما اقدر أثبت صحة كلامي ، ما إتوقعت في يوم اني أدخل مكتب المديره بسبب مشكله ، طول فترة الأساس ما حصل زول شكاني لأستاذ أو شكيتو ، ايوه لقيت أنواع كتيره مؤذيه من الناس في الأساس بس لئامتهم كان حده كلمة يا حيوانه و لوية خشم و مكاوة ، بس زي لين دي أنا خالص ما قابلت زيها في حياتي كلها....
المهم في يوم التلاتاء بعد ما ناس رغد جوا من المدرسه ، رغد قالت لي انتي اليوم ما مشيتي المدرسه صح ؟؟
قلت ليها كيف يعني ما مشيت ؟؟ مالي ما ح أمشي ؟؟
قالت لي ملابسك مكويه و قاعده جوه الدولاب ، قلت ليها لأني من جيت طبقتها و دخلتها الدولاب طوالي ، قالت لي كمان بقيتي تجي بدري ، قلت ليها أعمل شنو إذا هم بقوا ما بدونا آخر حصص ؟؟
قالت لي لمن تكذبي عايني للزول في عيونو عشان يصدقك و على فكره الملابس لمن تتلبس و ترجع تطبق تاني حتى لو كانت مكويه ما بتكون زي ما كانت ...
ما إتكلمت معاها ، قالت لي مالك بقيتي ما بتمشي ؟؟؟
حسيت حلقي إتقفل من شدة الزعل ، كل ما أتذكر الحصل قلبي بيوجعني...
قالت لي ما تسكتي ، الواحد أحسن يشارك مشاكلو مع الناس ، يعني حتى لو ما قدرنا نساعدك على الأقل تكوني فضفضتي و شاركتينا الحاصل عليك و تكوني عارفه اننا حاسين بيك ، هسي أنا و براءه و ياسر أول ما تحصل معانا حاجه بنجي نقول ليك طوالي ، حتى مرات ما بنكلم أبوي بس ما حصل دسينا منك شي ، بنحكي ليك الكبيره و الصغيره ف ليه لمن يجي دورك بتسكتي و بتفضلي انك تبكي و تزعلي براك ؟؟!
عيوني إتملت دموع ، حاولت أتكلم بس صوتي كان رايح ، لمن دمعتي نزلت مسحتها طوالي ، رغد قالت لي انتي بتخجلي تبكي قدامنا يعني ؟؟
بتخافي تقولي لينا انك زعلانه و بتبكي بسبب الحاجه الفلانيه ؟؟
نحنا أعداءك ولا ناس غرباء عنك ؟ لو أنا ما وقفت جنبك منو متوقعاهو يقيف معاك و يواسيك !؟
المره دي دموعي نزلت و ما حاولت أمنعهم ، براءه جات و قالت لي مها بتبكي ليه و طوالي مسحت لي دموعي و قعدت تبكي لمن شافتني ببكي ، يعني براءه دي إسم على مسمى ، بريئه و حنينه ، هي أصغرنا بس ما بتتحمل تشوف زول فينا ببكي ، رغد شالتها و قعدتها في رجلينها و قالت لينا هسي أسكت منو فيكم. ؟؟
مسحت ل براءه دموعها و ختت يدها على كتفي و قالت لي قولي لي مالك ؟؟
طوالي حكيت ليها الحصل و دموعي دي كانت عشره عشره ، قالت شوف بت الكلب دي عليك الله ! كنتي تتمي المقصر و تضربيها في المكتب قدامهم كلهم بما إنو هم على كل الأحوال ما صدقوك ، ياخ حريقه تحرقهم كلهم الما نافعين ، الكلاب ، المعفنين ال....ال.... الخ ....رغد إنفعلت شديد و قعدت تجوط ، قالت لي ليه لحد اللحظه دي ساكته و ما كلمتي زول فينا ولا حتى أبوي ، بعدين طوالي ح أكلمو عشان يمشي يتكلم مع مديرتكم الزفته الحيوانه دي ، المهم المساء لمن أبوي جا رغد مشت كلمتو ناداني و عاين لجبيني و قال لي الحصل شنو ؟؟
وريتو الحصل بالتفصيل ، قال لي مشاكل البنات دي ما عندها حد ، انتي بس كنتي تعملي حسابك و تكوني بعيده عن المشاكل دي لأنو حسب كلامك ديل ناس ما هينين و عادي يدخلوك البحر و يطلعوك ناشف ، ناس زي ديل نحنا ما بنقدر عليهم يا بتي ، حسبي الله و نعم الوكيل فيهم بس....
انا كلام أبوي وجعني أكتر من الحصل ، متمنيه يوم واحد بس يدق صدرو و يمشي يجيب لينا حقنا ، متمنيه يقيف معانا و لو لمره واحده بس ، متمنيه يحسسنا يوم اننا ما برانا و إنو معانا زول ساندنا و واقف ورانا ...
سكوت أبوي هو من أبرز الأسباب البتخليني ساكته دائماً لمن زول يغلط علي لأني عارفه إنو لو فتحت خشمي و رديت على الزول البتطاول علي دا و الموضوع كبر ما ح ألقى زول يقيف معاي و ح أواجه كميه من اللوم و الأذى براي و من جهتين ، من جهة الزول الإتشاكلت معاهو و من جهة أبوي ، يعني اتخيل فوق ما انت مظلوم برا البيت تجي تنظلم كمان جوه البيت و لنفس السبب ....
لمن دخلنا الأوضه كنت متضايقه و بقيت اقلب في القنوات ، رغد جات داخله ، كانت ساكته و ما قالت حاجه ، قلت ليها تاني ما أسمعك تقولي لي أحكي و فضفضي و نحنا معاك و شنو ما بعرف من الكلام الما منو فايده دا ، الشكوى و الفضفضه في البيت دا أحسن منها الكتمان 💔
سكتت ما ردت علي بس كانت متأثره أكتر مني ، المهم الأيام عدت ، يوم السبت ب ليل ، كنا راقدين في الحوش بعد ما جات رشه خفيفه و السحب اتفرقت ، كنت بتقلب ساي و لسه قلبي واجعني ، الظلم حار والله ، قعدت أعاين فوق في السما و اتذكر في كل المشاكل الواجهتنا كلنا و الواجهتني أنا خاصة ، قلت أنا البحدد عايزا أكون شنو و مفروض أدافع عن نفسي و ما أرضى بأي ظلم حتى لو أبوي ما وقف معاي ، عزة النفس و احترام الذات ديل أهم حاجتين لو خسرتهم معناها خسرت شخصيتي و البخسر شخصيتو معناها خسر نفسو و بقى تحت الجزمه و ملطشه لكل الناس ....تاني يوم طوالي جهزت نفسي عشان أمشي المدرسه ، أبوي أدانا القروش و قبل ما يطلع قال لي لمن تمشي المدرسه امشي اتصالحي مع البت و أبدوا صفحه جديده ، قلت ليهو كويس يا أبوي ، بعد ما أبوي مشى رغد جات و قالت لي أوعك تسمعي كلامو ، نحنا ما معاك في المدرسه ولا ح نعرف البتمري بيهو شنو هناك بالتفصيل ، انتي أدرى بكل البحصل معاك و انتي البتتحملي نتيجتو و ماف زول ح يجرب إحساسك بالظبط زي ما انتي حاسه بيهو عشان كدا ح أقول ليك أوعى تسكتي و دافعي عن نفسك حتى لو اضطريتي تواجهي المعلمين و المديره ، طول ما إنتي صح إياك تخافي و قولي الحق في وش كل الناس و امشي و انتي رافعه راسك ، صدقيني الخوف و التردد اكتر حاجتين ممكن يضعفو شخصيتك و يخلوك فريسه سهله للبسوى و ما بسوى ، في ناس تحسي انهم مخلوقين بس عشان يأذوا و يفرضوا نفسهم و فيهم البفتش على ريحة الخوف في كل الحوليهو عشان يكون ليهو فريسه سهله يقدر من خلالها يرضي غرورو و يحس بالعظمه قدام الناس من خلال إستضعافو للإنسان المسكين دا ، عشان كدا ما تدي زول فرصه فيك و ما مهم البت دي أبوها منو أو بقدر يعمل شنو ، طول ما انتي صح خليك واثقه من نفسك و ما تتهاوني مع زول و اقول ليك حاجه ما تحترمي المعلمين ذاتهم لأنو معظمهم كلاب قروش ، قلت ليها أساساً دا المفكره أعملو ، قالت لي يلا بالتوفيق و ربنا معاك ، بعدين لمن نرجع أحكي لي البحصل ، قلت ليها تمام ، لمن طلعنا و قفلنا البيت و افترقنا في الطريق بقيت ماشه و بفكر في كلام رغد !! انا ما مستغربه في الكلام أنا مستغربه في رغد نفسها لأنها هي القالتو! ، حسيتها بقت واعيه شديد و كلامها دا خلاصه لتجارب كتيره ، و كأنو هي الكبيره ما أنا ، صح نحنا بجمعنا بيت واحد و بنواجه نفس الظروف بس لكل واحد مننا حرب خارج البيت لازم يخوضها براهو ، مواقف كتيره لازم يقيف فيها براهو و يمكن رغد بسبب البتواجهو براها قررت انها ما تكون الطرف الأضعف ، قررت انها لو ما بقت المفترس ما تكون الفريسه ....
بقيت افكر كدا لحد ما وصلت المدرسه ، وقفت جنب الباب و بقيت أعاين فيهو بتحدي ، كأني داخله حرب ما داخله مدرسه ، قلت لازم أرجع لنفسي القديمه الما كانت بتخاف من زول أو بتراعي لزول ، لازم أرجع لنفسي المحتها لي مشاكل الحياة و ضغوطاتها ، لنفسي العزيزه و المكرمه القيدها أبوي بكلامو و قوانينو البتمنعنا نرد إعتبارنا و نرفض الظلم ، دخلت المدرسه و طوالي إتجهت على فصلنا عشان أخت شنطتي لمن جيت داخله كانوا في زي خمس بنات كدا في الفصل ، لا سلمت عليهم ولا عاينت ليهم حتى و أصلاً أنا من أول يوم جيت فيهو المدرسه دي ما قاعده اسلم على زول ، طبعاً البنات قعدوا يتهامسوا ، ختيت شنطتي و إتلفت عليهم قلت ليهم أرفعوا صوتكم شويه لأني ما سامعه حاجه ، طبعاً من جواي كنت مهزوزه بس حاولت أظهر عكس كدا ، سكتوا و قعدوا يعاينوا لبعض ، قلت ليهم غيتو انتوا غير القطيعه ما بتعرفوا شي ، وحده منهم اسمها ريما و دي القاعده جنبي قالت لي ما كنا بنقطع فيك ، شروق قالت لي كنا بنقول انو انتي انفصلتي من المدرسه اسبوع في حين إنو لين ما إنفصلت و أبوها جا إتكلم مع المديره و طوالي خلوها .... طبعاً النار ولعت جواي !!
ما قادره استوعبت كمية الأنانيه و عدم الضمير دا !!!
سكته بس و طلعت لمن جرس الطابور رن ، مشيت وقفت قدام و أنا مربعه يديني و عيني على المديره لدرجة إنها لمحتني بعاين ليها كذا مره ....المهم دخلنا الفصل و جاتنا أستاذة الرياضيات ، بقت شغاله تشرح لينا ، بعدها كتبت مسأله و قالت وحده تجي تحلها لي ، طبعاً استعجلت و رفعت يدي ، قلت قبل ما لين تشوفها من الكتاب و تجي تحلها ، الأستاذة قالت لي تعالي ، مشيت على السبوره ، شلت الطباشيره و قعدت أحل في المسألة لحد ما وصلت نهايتها ، قالت لي ممتازه و قالت ليهم صفقوا ليها ، طبعاً لين و صحباتها كانوا مربعين يدينهم بس ، عاينت ليها جوه عيونها و قعدت ، سامعه شيماء قالت ليها بصوت واطي المسأله دي ما موجوده في الكتاب ، المهم لمن أستاذة الرياضيات خلصت حصتها أدتنا تمرين و طلعت ،، فتحت كتابي و قعدت احاول أحل في المسائل ، ريما برضو كانت بتحل ، في مسأله غلبتها هي و شروق ف قامت سألتني عنها ، لمن وريتها الحل قالت لي شكراً ، هزيت ليها راسي بس و رجعت أحل في باقي المسائل ، قالت لي بالمناسبه ، أستاذ أحمد الأسبوع الفات وزع لينا ورق الإختبار و انتي جايبه تاني أكبر درجه ، قلت ليها أكبر درجه جابتها منو و كم ؟؟
قالت لي أكبر درجه كانت 45 من 50 جابتها القاعده وراك دي ، عرفتها قاصده لين ، في سري قلت بعد دا كلو كانت فاتحه الكتاب مفروض تقفل الإمتحان عديل ، ريما قالت لي بصوت واطي حالتها كانت فاتحه الكتاب...
المهم طلعنا فسحة الفطور ، مشيت البوفيه أشتريت سندوتش و مشيت قعدت بيهو في كرسي تحت الشجره ، ريما و شروق برضو كانوا قاعدين هناك و بتونسوا ، بعدها بقوا يتغالطوا في قانون الرياضيات مع إني ما بحب أتحشر ساي بس لمن غلاطهم كتر ، إتدخلت و قلت ليهم القانون الصحيح ، ريما قالت ل شروق مش قلت ليك دا القانون الصح ! شروق قالت لينا خلاص انتوا الإتنين كلامكم صح ، المهم أنا سكته خليتهم و هم بقوا يتكلموا و مره مره بسألوني و بحاولوا يدخلوني في ونستهم ، المهم بعدها الجرس رن ، ريما و شروق مشوا و أنا مشيت الحمامات ، بعدها مشيت شربت مويه و مشيت على الفصل ، أول ما وصلت الباب لقيت أستاذ أحمد دخل ، دقيت الباب بس و دخلت طوالي من دون ما أنتظرو يقول لي خشي ، قعدت في مكاني و ربعت يديني ، كان بعاين لي جوه عيوني ، زي كأنو مستغرب فيني ، قبل ما يبدا قعد يسألنا عن الحصه الفاتت و أنا بما إني ما كنت حاضره معاهم ف كنت ساكته و ما عرفت أجاوب ، بعد ما خلص حصصو و طلع مشيت لحقتو في المكتب ، قلت ليهو عايزا ورقتي ، قال لي ورقة شنو ؟!
غياظ خلاص ، قلت ليهو ورقة إختبار الفيزياء ، قال لي سنه كم انتي و بقى يفتش في ورقو!....ما عارفه ليه بستهبل كدا ! قبل شويه مش كان معانا و كنت قاعده قدامو !!
قلت ليهو أولى ، طلع ورقو كلو و ختاهو قدامو و قال لي إسمك منو ؟!...عيني وقعت على ورقتي ، قلت ليهو دي ورقتي ، عاين للدرجه و قال لي المره الجايه شدي حيلك و بطلوا إهمال ، شلت ورقتي و قلت ليهو بإهمالي دا جايبه 40 من 50 قال لي في غيرك جايب 45 ☺️
قلت ليهو ياريت لو غيري ديل اجتهدوا ليها و ما فتحوا الكتاب ، قال لي قصدك شنو ، قلت ليهو ولا شي يا أستاذ و طوالي طلعت من المكتب و أنا بقول في نفسي تاني لا ح أخاف من أستاذ لا غيرو و الحقيقه دي ح أقولها سواء بطريقه مباشره أو غير مباشره ...
و أنا ماشه على الفصل لاقتني أستاذة الدراسات الإسلاميه ، قالت لي طالعه من فصلك ليه مش قلنا ممنوع الطلوع بين الحصص ؟؟
قلت ليها الأستاذ قال يجمعوا ليهو الكراسات و يجيبوهم ليهو ، عاينت لي بس و مشت ، المهم رجعت الفصل و طوالي أستاذ الإنجليزي جا داخل علينا ، بعد ما سلم ، عاين يمين و شمال و قال لين وين الليله ؟؟
جانا صوتها من نهاية الفصل و هي بتقول ليهو I,m here teacher , قال ليها قاعده ورا ليه ؟؟
قالت ليهو شغالين نحل في تمرين ، قال ليها تعالي راجعه لمكانك ... طبعاً كنا بنعاين ليهم ساي ، لين جات راجعه مكانها و طوالي بدا حصتو و هي الوحيده الكانت بتشارك و بتتخاطب معاهو بالإنجليزي و طبعاً هو كأنو كان بشرح ليها هي بس ، وحده من البنات القاعدين ورا ، إسمها وصال ، بت عامله زي الأولاد كدا و دائماً عامله شغب في الفصل هي و شلتها المسمنهم شلة يخسي ، طبعاً هي جنها مشاكل مع المعلمين و كل يوم بتكون في مكتب المديره ، طقطقت ليهو يدها و قالت ليهو هييي هييي يا أستاذ نحنا شايفنا أصنام ولا شنو ؟؟ لين دي براها القاعده في الفصل !
قال ليها اول شي نزلي أكمام لبسك دا و إتكلمي بإحترام ما في سوق انتي عشان تتكلمي بالطريقه دي و فعلاً انتوا أصنام و لو ما كدا كان فتحتوا خشوكم دي و قلتوا حاجه ، قالت ليهو نحنا ولدونا في بلد خواجه عشان نعرفك بتقول في شنو ؟؟؟
الأستاذ إتلفت على لين و قال ليها انتي مولوده وين يا لين؟؟
قالت ليهو مولوده في السعوديه بس سنواتي الدراسيه كلها كانت في السودان ، قال ليها طيب ممكن تقيفي يا لين و تقولي للأصنام ديل كيف اكتسبتي مهارة التخاطب باللغه الإنجليزية ؟
قالت ليهو أكيد يا أستاذ ...
وقفت على حيلها و قالت ليهم أصلاً نحنا من لمن كنا صغار كانوا ماما و بابا حريصين على إنهم يعلمونا حاجات ح تفيدنا لقدام و من الحاجات الحثونا عليها تعلم اللغه الإنجليزيه ف من حب ماما و بابا للغه الإنجليزيه و إجادتهم ليها بقيت احبها و دخلت كورسات كتيره و إتعلمتها ، وصال كانت بتحاكي فيها بصوت واطي ، قالت للأستاذ و نحنا ما عندنا قروش للكورسات دي ، لين قالت ليها معاك جوال ؟؟
وصال لوت خشمها و قالت ليها ااااي ، لين قالت ليها الجوال كفايه ، بتقدري من خلالو تدخلي مواقع كتيره تتعلمي منها الإنجليزيه ، قالت ليها ما عندنا حق الرصيد ، الأستاذ قال ليها انتي أصلاً طالبه قليلة أدب و مستهبله ساي و ما عندك موضوع ، قالت ليهو قليلة أدب عشان قلت ليك ما فاهمين انت بتقول في شنو ؟؟ لين قالت ليها الفيس الواااحد دا لو داخلاهو حتى بالمجان حتلقي قروبات مفيده بتعلم الإنجليزيه على شكل بوستات ....كمان قولي ما عندك قروش للوضع المجاني 😒
وصال قالت بصوت واطي اي ما عندي بس نحنا سمعناها لين قالت ليها ما مشكله أنا بديك حق الرصيد ، من الحاجات العلمونا ليها ماما و بابا اننا نساعد غيرنا و نتصدق عليهم 😏👏
طبعاً كلنا اتفاجأنا من كلامها! البت حست بالإحراج و في نفس الوقت قربت تتطرشق من الزعل ! انا المحيرني انو كيف لين بتقول كدا قدام الأستاذ !! لمن إتلفتنا عليهو لقيناهو مبتسم ف عرفت انو منحاز ليها و عشان هو مدي لين وش و عامل ليها استثناء و بعاملها معامله خاصه ماخده راحتها في الكلام و كمان بتحرج و بتسيئ للناس قدامو و هو عامل رايح !! وين واجبو ك أستاذ لمن طالبه تسيئ و تعاير طالبه قدامو و قدام الفصل كلو سواء بطريقه مباشره أو غير مباشره !!؟ ....
المهم بعد ما لين قعدت هو طوالي واصل حصتو ، بعد ما خلص و طلع وصال جات هي و شلتها و إتلموا في لين ، ضربوا ليها الكنبه و بقوا يكوركوا فيها ، قالت ليهم لو سمحتوا خليكم بعيدين عني شويه لأنو ريحة نفسكم سيئه جداً و ريحة العرق كمان ، ما بتستخدمو مزيلات عرق انتوا ولا شنو ؟!!
طبعاً إستفزتهم ، وصال رفعت أكمام قميصها و جرتها من طرحتها و قالت ليها إحترمي نفسك يا جربوعه ، لين لزتها و وقفت على حيلها و قالت ليها جربوعه انتي دي ! بالله شوفي شكلك و لبسك المشرط دا و الطرحه التقول ماكلاها ماعز دي يع يع ، زحوا من وشي يا قرف انتوا ، لزتهم و طلعت من الفصل ، خلتهم زي الطير و كل وحده تعاين ل لبس التانيه....
وصال دي بت كعبه و عنيفه و كل الناس بتشهد على الحاجه دي بس بعد كلام لين حسيت لسانها إتربط ، كأنو في حاجه جواها إهتزت و دا شي طبيعي الإنسان مهما كان عامل فيها قوي و نافخ ريشو و جرئ و ماف زول بقدر عليهو بس مواقف و كلام زي دا أكيد ح يهزو مهما اشتدت حدتو و قوتو و طول لسانو ، حقيقة يعني الإنسان بكون ضعيف شديد قدام الكلام الجارح خاصة البكون عباره عن تنمر سواء على الشكل أو اللون أو الوضع المادي ، التنمر و السخريه و المعايره أقوى سلاح و في نفس الوقت اسوأ سلاح 💔
قلت أنا مالي و مالهم الإتنين ما هينات أحسن ما أركز معاهم لأنهم زي بعض ، شويه كدا جا أستاذ الإنجليزي و معاهو أم الفصل ، جوا شاكلوا وصال و شلتها و ساقوهم مكتب المديره ، صحبات لين قالوا دي نهاية أي زول بتطاول علينا....
ريما قالت لي والله دي حرب العمالقه ذاتا ، هزيت ليها راسي من دون ما أعاين ليها ، شكلها إتحسست ف خلتني و إتلفتت على شروق و بقت تتونس معاها ، طبعاً نحنا 5 في الكنبه و أنا قاعده بالطرف كلهم ما عندي شغله بيهم و لو اتكلمت مع زول ف بكونوا شروق و ريما و دا طبعاً لمن هم اليبدوا كلام معاي ، غير كدا ما بتكلم خالص ، المهم البنات بقوا يمشوا يتشمروا و يجوا ، سامعاهم قالوا المشكله بقت كبيره و انو وصال إتشاكلت عديل مع المديره و في إحتمال كبير انها تتفصل نهائياً....
الفصل بقى جايط شديد و كلهم بتكلموا عن الحاصل و صدعوا بي عشان كدا شلت كتبي و كراساتي و طلعت برا الفصل ، مشيت قعدت تحت شجره و بقيت أحل في الرياضيات و بعدها طوالي فكرت أحاول اقرا الإنجليزي دا ....و أنا منزله راسي كدا و عيوني على الكتاب فجأه حسيت بزول واقف قدامي ، لمن رفعت راسي لقيتو أستاذ أحمد ، قال لي مجتهده شديد !....ما رديت عليهو ، قال لي شكلك مستهونه بالفيزياء عشان كدا ما شايف الكتاب معاك ، قلت ليهو لو كنت مستهونه بيها ما كان جبت فيها 40 من دون ما أعرف إنو في إختبار ، قال لي ال40 دي شكلي ح أسمعها كتير...
ما رديت..
قال لي بالمناسبه قصدك شنو لمن قلت ليك إنو في غيرك جايب 45 و قلتي انهم ما جايبنها بإجتهادهم و انهم كانوا فاتحين الكتاب ؟؟
قلت ليهو قلت كدا ساي ☺️
قال لي ماف حاجه اسمها قلت كدا ساي ، لو ما متأكده من حاجه ما تقوليها ، قلت ليهو تمام ، سكت مسافه بعدها قال لي أنا جادي في سؤالي ! القلتيهو حصل ولا ما حصل ؟؟
قلت ليهو انت أدرى مني لأنك كنت واقف و لافي حولينا و أنت الكنت مراقبنا ما زول غيرك ، قال لي ما عايز معاك لف و دوران يا طالبه ....سألتك ف جاوبي...
قلت ليهو أنا جاوبتك يا أستاذ و قلت ليك ساي قلت كدا ، قال لي أنا بمقدوري أوديك المكتب و أشكيك للمديره و أخليها تتصرف معاك عشان تاني ما تلمحي لحاجه انتي ما متأكدة منها ☺️
قال كدا و مشى طوالي ، في سري قلت ليهو عاد ما لين دي حبيبة قلبكم كلكم عشان كدا ما رضيت اني ألمح لإنها كانت فاتحه الكتاب عشان كدا جابت 45.....قلت الليله شكلو بالجد ماشي يشتكيني للمديره ، يمكن المره دي تفصلني خالص ، بقيت أعاين ليهو لحد ما دخل مكتب المديره ، قعدت حكاية دقيقتين كدا بعاين في المكتب ، طبعاً ماف زول دخل علينا لأنو معظم المعلمين في مكتب المديره بسبب الشكله الحصلت بين لين و وصال ....بعد شويه كدا أستاذ أحمد طلع من مكتب المديره ، قلبي انقبض ، بقى ماشي علي و بعاين لي بكل ثقه ، بقيت مخلوعه و مبحلقه عيوني فيهو لحد ما جا ماري بجنبي و اتجاوزني و مشى ، أخيراً اتنفست ، فجأه إتلفت علي و قال لي المره الجايه اعملي حسابك لأنو ممكن أمشي و اشتكيك أو ممكن براي أعاقبك زي مثلاً اخصم منك درجات و كدا ...
طبعاً خفت بالجد ، كل شي ولا درجاتي ....بعد ما مشى قلت واااي دا كلو عشان لين !!
قعدت أفكر بيني و بين نفسي و لمتها شديد و قلت الأستاذ دا لو شالها معاي ح يسقط حجري والله ....بعد صراع شلت حاجاتي و مشيت على مكتب المعلمين ، كنت متردده ، فجأه جاني صوت أستاذ بكري و هو بقول إنو ماشي يصلي و طوالي جا طالع قال لي كيفك تمام ، قلت ليهو تمام الحمدلله و طوالي مشى ، غصبت نفسي و دخلت المكتب بس اتفاجأت انو ماف زول غير أستاذ أحمد قلت أحسن ذاتو عشان ما أعتذر منو قدام المعلمين ، طبعاً هو كان مشغول بتلفونو رفع عينو عاين لي و قال لي اهاا ؟؟
مشيت على تربيزتو و أنا متردده ! لمن وقفت قدامو قلت ليهو أنا جايه أعتذر.....
