*#في~مهب~الريح《02》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*
في اليوم البعدو أبوي صحانا الصباح بدري ، لمن طلعنا لقينا الحوش مليان مويه ، رغد قالت هسي دا طين يمشوا فيهو المدرسه !!
المهم جهزنا و طلعنا كلنا سوا و أبوي أدى كل واحد قروشو ، قلت ل رغد : براءه دي انتبهي عليها ما تخليها تمشي ساي و الشوارع كلها مليانه مويه و حفر و كمان إياكم تمشوا بالحيط لأنها بتكون لينه و إحتمال تقع ، قالت لي والله انا لو علي أرجع البيت بس ، ياخ الشوارع مقرفه شديد و أنا بكره أدخل في الطين و المويه الوسخانه دي ! قلت ليها معليش معليش بس انتي مولوده في السودان ، المهم هم مشوا على مدرستهم و أنا مشيت مدرستي ، المره دي وصلت قبل الطابور ، مشيت قعدت في الفصل لحد ما جرس الطابور دقه ، الطابور كان على ناس سنه تالته ، طلعوا بتين و بدوا يقدموا في طابورهم و ندهو وحده عشان تطلع و تقول قصيده ف البت رفضت و حلفت ما تطلع ، المديره جات وقفت في نص الطابور و قالت ليها بهرشه تعالي هنا سرعه ، البت قالت ليها يا استاذه أنا من أمبارح كلمتهم و قلت ليهم ما عايزا ، أشطبوا اسمي ، المديره قالت ليها ما بعرف طوالي تطلعي و تقدمي ، يعني كل مره الطابور دا إلا يحنسوكم عليهو تحنيس!! أطلعي بس و قولي العندك....البت طلعت و هي متوتره ، بقت تتلفت و واضح إنها خجلانه من الناس ، الإستاذ بتاع الفيزياء داك قال ليها ماف شي بخوف يا إحسان ، ديل كلهم زميلاتك و دي مديرتكم و نحنا الأساتذه المعاكم على طول ، ماف زول جديد ! في استاذه تانيه قالت ليها خليك شجاعه يا إحسان و أساساً انتوا بعد دا خلاص بإعتباركم ناس جامعه لأنو دي آخر سنه ليكم و المفروض الشجاعه الأدبيه دي تجونا بيها من الأساس....المهم البت بعد مسافه فتحت خشمها و قالت قصيدتها و صوتها كان مليان خوف ...لمن خلصت كل الناس صفقوا ليها إلا البنات الكانوا واقفين جنبي ، أساساً من أول ما بدت تقول في قصيدتها هم كانوا بضحكوا و بعلقوا عليها بصوت واطي ...المهم لمن الطابور خلص المديره إتلفتت علينا و قالت يا أولى قبل ما تمشوا على فصولكم خليكم عارفين إنو بكرا الطابور عليكم ، انتوا فصلين و لأنو دا أول طابور ليكم ح يكون مشترك بين الفصلين و بعدو كل فصل حيكون عندو طابور براهو ، ما عايزا تقديم ركيك ، ما عايزا فقرات ما منها فايده و إياكم وحده يقولوا ليها أطلعي تقول ما عايزا ، خلال اليوم دا ح تجيكم أم الفصل عشان تجهز معاكم لطابور بكرا ....يلا على فصولكم...
و نحنا ماشين على الفصل وحده من البنات الكانوا جنبي قالت ياخ دي شنو المره الفقر الجنها كلام كتير دي! ، صحبتها قالت ليها انتي عايني لبسها مبشتن كيف ، عامله زي الضفدعه كدا ....قعدوا يعاينوا ليها و يضحكوا لحد ما دخلنا الفصل ، قبل ما يجينا أي استاذ نفس التلات بنات ديل جوا وقفوا قدامنا كلنا و قالوا لينا زي ما سمعتوا المره الزعاطه المعاطه ديك قالت عايزا طابور كويس ، عشان كدا أنا و شيماء و إيلاف ح نقدم الطابور بكرا و أوعكم وحده نقول ليها تطلع تقول ما عايزا ، براكم شفتوا البت القبل شويه دي هرشوها كيف ، عشان كدا نحنا التلاته ح نعمل طابور تحفه يعجب كل الناس .... المهم أنا اسمي لين عصام بس قولوا لي لينو ...اوكي...
المهم قالوا كلامهم و رجعوا مكانهم ، طبعاً ما حبيتهم خالص ، ظاهر عليهم كريهات و عايزات يتفرعنوا على الفصل ، المهم بعد شويه جات أستاذه داخله ، قالت السلام عليكم و طوالي إتلفتت على السبوره و بدت تكتب كأنها ما منتظره مننا رد بس مع ذلك ردوا ليها السلام ، كتبت اسم الماده و كانت كيمياء ، إتلفتت و قالت كل وحده تطلع كتابها قدامها ، طبعاً معظم الفصل ما كان جايب معاهو الكتاب ، قالوا ليها ما كنا عارفين إنو اليوم عندنا حصة كيمياء لأننا ما أخدنا الجدول ...إتعصبت و قالت لينا لو مهتمين كنتوا جيتوا و سألتوا عن الجدول ، هسي ح تتعاقبوا كلكم و طوالي طلعت و جات راجعه و هي شايله معاها خرطوش ، البت الإسمها لين قالت ليها أنا ما ح انضرب لأني ما غلطانه ، مفروض براكم تجوا و تدونا الجدول و دا ذاتو ما سبب يخليك تضربي الفصل كلو ....الأستاذه قالت ليها شفتي الليله عشان كلامك دا ، ديل ح ياخدوا سوطين و انتي أربعه عشان تاني ما تفتحي خشمك دا و ح أبدا بيك انتي و طوالي جات عليها و قالت ليها سرعه أفتحي لي يدك ، قالت ليها ما بفتحها ،قالت ليها أنا ممكن اضربك في أي مكان ما بهمني عشان كدا الأحسن تفتحي يدك ، البت طلعت من مكانها و كلنا قايلنها عايزا تطلع ليها برا عشان السوط ما يضرب البنات الجنبها بس اول ما طلعت من كنبتها اتجهت طوالي على باب الفصل و الأستاذه شغاله ليها ماشه وين يا طالبه تعالي هنا ، يا طالبه ! ، ما ردت عليها و طوالي طلعت ، الأستاذه زاد غضبها ، جات ضربتنا كلنا سوطين سوطين زي السم و قالت إنو الطالبه ديك ح تاخد سيطان إضافيه و طوالي طلعت من الفصل ، صحبات لين يلي هم إيلاف و شيماء قعدوا ينبذوا في الإستاذه و يقولوا عنها كلام كعب شديد و كلو حق شوارع ....
شويه كدا سمعنا جوطه جايه من مكتب المعلمين ، شيماء و إيلاف طوالي طلعوا و باقي البنات قاعدين بس الشمار حارقهم أما أنا فما كان هاميني والله ، كنت بس بفكر لمن أرجع البيت اعمل شنو للأكل ...
بعد شويه إيلاف و شيماء جوا داخلين و هم بضحكوا و وراهم طوالي جات استاذة الكيمياء و باين إنها متضايقه شديد ، أدتنا حصتها التانيه لأنو الأولى ضاعت بسبب الحصل و بعدها طلعت طوالي ، إيلاف و شيماء ضحكوا بصوت عالي و قالوا الليله كتمت و البقره دي ح تندم على اليوم الرفعت فيهو صوتها على لين ، وحده من البنات قالت ليها ورونا الحاصل شنو ؟؟
قالوا ليها لين مشت مكتب المديره و قالت ليها عايزا تتصل على أبوها ضروري و فعلاً اتصلت عليهو و كلمتو و بعدها حكت للمديره و حالياً أبوها جاي على المدرسه و الأستاذه الوهميه دي وقعت وقعه سوده مع الباشمهندس عصام أبو لين 👏👏
المهم لمن جا زمن الفطور المره دي مشيت فطرت و لميت باقي القروش ، البنات مشوا اتجمهروا جنب مكتب المديره عشان يتشمروا ، سامعاهم قالوا أبو لين جا و حالياً بتشاكل مع الأستاذه و المديره ...المهم لمن الجرس رن دخلنا الفصل ، لين جات داخله تتقدل و هي رافعه راسها و مبتسمه و وراها إيلاف و شيماء و قعدت تحكي لبنات الفصل كيف إنو أبوها شاكل الأستاذه و أهانها قدام باقي المعلمين و جبرها تعتذر منها و قالت المديره أكدت ل بابا إنو حاجه زي دي ما ح تتكرر تاني ، وحده قالت ليها أكلناها برانا ، لين قالت ليها عشان تاني تسكتوا ، ما عندكم بابات أو مامات انتوا ؟! 😏😒
طبعاً قعدت أحاكيها في سري ، بتتكلم بدلع كدا و حنكشه شديده ، شويه كدا جات أستاذه قصيرونه كدا ، و بدت تكتب على السبوره ، قالت لينا دا جدول الحصص يا أولى ، لين قالت ناس ما بتجي إلا بالعين الحمره ، مع انو صوتها كان مسموع بس الأستاذة عملت نفسها ما سامعه ...
المهم في نهاية اليوم دا جات أم الفصل اسمها استاذه تيسير و قعدت تجهز معانا لطابور بكرا و كل وحده إختارت ليها فقره ، أما أنا فما حاولت أشارك أساساً ، المهم رجعت البيت و قعدت أحكي لناس رغد بالحصل في المدرسه ، رغد قالت لي الناس دي أصلاً بقت كدا ، بحترموا الزول العندو مكانه و قروش ، الزول البقدر يشتريهم بكل بساطه ، أما المساكين الزينا ديل يسكتوا بس و لو اتكلموا ماف زول بشتغل بيهم و غير يذلوك و يهينوك ما بعملوا ليك شي ، دي دنيا مصالح و مظاهر ساي ، دي دنيا فيها الإحترام و التقديس لأكتر زول عندو قروش و كلمتو مسموعه....
سكته ما رديت عليها بس من جواي كنت موجوعه شديد و حاسه بالضعف 💔
في اليوم البعدو كان طابورنا و قدموهو بنات من الفصلين و لين كانت وحده من المقدمين و صحباتها طلعوا في الفقرات ، غيتو معظم الفقرات كانوا ماسكنها على حسابهم ، لمن إنتهى الطابور المديره قالت يا سلام دا البقدر أقول عليهو طابور ، صفقوا صفقه عاليه للناس دي يا جماعه ، ممتاز ممتاز شديد يا أولى و خليكم كدا دائماً ، شكراً يا لين و المعاها على الطابور المتنوع دا ، لين قالت ليها عفواً يا مديره ، طبعاً بعاين للمديره ساي و هي بتتنافق ، عاد كيف ما تقول ليها شكراً يا لين و هي أبوها أمبارح قرب يقلب المدرسه فوق راسها !!
المهم مشينا الفصل و البنات شغالات ل لين حظك والله المديره عرفت اسمك طوالي ، قالت ليهم هه عادي أنا لين عصام 💅
المهم أخدنا حصتين جغرافيا دبل ، بعدهم أخدنا فسحة فطور و جينا راجعين ، بعدها دخل علينا أستاذ الفيزياء داك ، طبعاً لين و صحباتها قاعدات وراي ، سامعه لين قالت ليهم الكراش جا ! طبعاً أنا استغربت فيهم و في مصطلحاتهم دي ! يعني كأنهم جاين من جامعات ما من أساس!! ما عرفت كراش دي معناها شنو !!
دخل سلم علينا و عاين للسبوره و قال لينا منتظرني أمسحها ليكم ولا شنو ؟؟
طبعاً هو من شكلو واضح إنو زول مفتري شديد ، هو شاب كدا في العشرينيات ، تقريباً عمرو 25 ، 26 كدا ، طبعاً من جا داخل البنات يشلين و يتكشمن و لمن قال منتظرني امسح السبوره ولا شنو تلات بنات في نفس الوقت قاموا جاريين عليهو عشان يمسحوا السبوره ، لين قالت بصوت واطي غيتو جنس خفه ، طوالي الأستاذ عاين ليها بس أظنو ما سمع هي قالت شنو بالظبط لأنو صوتها كان واطي شويه و لو ما أنا قريبه منها ما كان سمعتها ، المهم بعدها بدأ حصتو قال لينا أنا اول امبارح نسيت و ما قلت ليكم اشتغلوا التمرين بتاع أول درس ، المهم حالياً ح نشتغلوا سوا و نبدا درس جديد ، قال لينا لكن في البدايه عايز أسألكم عن الدرس الفات ، وحده تقوم تعرف لي الماده ، طقطقت لين و قامت عرفتها ليهو ، قال ليها ممتاز ، و باقي الأسئله كلها لين و صحباتها كانوا بجاوبوا عليها ، لمن إتلفت وراي و عاينت تحت الكنبه لقيتهم فاتحين الكتاب ، قلت ئهه عاملات فيها شاطرات ، قال يلا بعد دا ح نبدا درس جديد ، طبعاً ما قدرت استوعب كلامو بسبب نقة لين و صحباتها و تعليقاتهم الكتيره ، حاولت اطنش كلامهم و أركز مع الأستاذ ، البت الجنبي قالت ديل شنو النقناقات ديل ! المهم الأستاذ قال لينا الزمن هو الوقت بين حدثين و الأحداث البتكون مدتها قصيره بنستخدم ليها الوحدات الصغيره زي الثانيه و رمزها ث أما الأحداث البتكون مدتها طويله بنستخدم ليها وحدات كبيره تتوقعوا زي شنو مثلاً ؟ لو عندكم علم !؟ قلت ليهو زي القرن و السنه ، قال لي تمام و واصل شرحوا ، قال لينا اليوم فيهو كم ساعه ؟ قلنا ليهو 24 ساعه ، قال لينا و الساعه فيها كم دقيقه ؟قلنا ليهو 60 دقيقه و الدقيقه 60 ثانيه ، قال لينا طيب لو عايز أصل لتعرف تاني للثانيه مفروض أعمل شنو ؟؟
كلنا سكتنا ، قال لينا شغلوا أمخاكم دي ، بقيت ساكته و بفكر في كلامو شبه فهمت السؤال بس ما قدرت أصيغ الإجابه و حسيت إني ما ح اقدر أوصل ليهو فهمي ، قال لينا خلاص خلوها و اضربوا لي عدد الساعات في اليوم في عدد الثواني و الدقايق في اليوم ....كل وحده طلعت ورقه و قلم و بقت تضرب فيهم ، قال ليهم سرعه يا شباب ، لين قالت ليهو ثواني يا أستاذ ، قلت ليهو 86400 ، عاين لي مسافه و لمن ما لقى جنبي ورقه و قلم استغرب و قال لي ممتاز ، قال طيب من خلال كلامنا دا و الناتج الإتحصلنا عليهو ممكن نقول الثانيه هي شنو ؟؟ لمن سكتنا قال لينا على فكره السؤال دا ساهل ، فكروا و قولوا الحل ، سكته مسافه بعدها قلت ليهو بما انو اليوم بساوي 24 ساعه ، معناها اليوم بساوي 86400 ثانيه و دا معناها إنو الثانيه بتساوي اليوم يلي هو 24 ساعه ، قال لي تمام طيب ال24 ساعه ديل شنو أو بحصل فيهم شنو ؟؟
قلت ليهو الأرض بتدور حولين نفسها أو محورها ، قال لي ماشه تمام معناها عرفي لي الثانيه ، قلت ليهو هي دوران الأرض حول محورها ، قال لي و مقسومة على ؟؟
صراحة ما عرفت ، قال لي كلامك صاح ، قربتي ، الثانيه بتساوي دوران الأرض حول محورها مقسوما على....قاطعتو و قلت ليهو 86400؟
قال لي ايوه ، تمام...طوالي إتلفت على السبوره و كتب التعريف دا ، كان في صوت نقه كتيره و أنا عارفه انو ديل لين و صحباتها و أصلاً هو من قبيل كان بقول البتكلموا ديل أحسن يسكتوا ، ما اشتغلوا بكلامو و استمروا في نقتهم بعد شويه إتلفت و ضرب التربيزه القدامو و قال بنبره عاليه ما بتفهموا انتوا ! أسكتوا معناها اسكتوا ..
هنا الفصل كلو صنه حتى النفس إنعدم ، عاين لينا كويس و واصل شرحوا ، شيماء قالت واااي حتى عصبيتو حلوه 🙈
إتلفت علينا و جدع الطباشيره و قال سرعه طلعوا لي البتكلموا ديل ، ماف زول فتح خشموا ، قال النقه دي جايه من الصف دا ، من الكنبه التانيه لحد الرابعه يا تطلعوا لي البتكلموا ديل يا كلكم تتفضلوا و تطلعوا برا.....برضو ماف زول اتكلم ، قال ما سامعين الكلام القلتو !!
