မာန်ဝင့်ထည် + ဘုန်းမိုးထက်
🎶 ကြယ်တွေစုံတဲ့ည .... ကိုယ့်အိမ်မက်လေးငယ်
ကြယ်တွေစုံတဲ့ည ... ဘဝမျှော်လင့်ခြင်းရယ်
ရင်ခုန်သံနဲ့ ထုဆစ်ထားတဲ့ .... သီချင်းတွေလည်း ..... ရင်တွေကွဲသွားအောင် ဆိုနေအုံးမယ် .....
ကြယ်တွေစုံတဲ့ည အဝေးအိမ်ကိုလွမ်းတယ် ...
ကြယ်တွေစုံတဲ့ည ခရီးမိုင်တွေခြားစဉ် .... ဒဏ်ရာတွေနဲ့ရေးခြစ်ထားတဲ့ နေ့တွေလဲကျော်လွန်သွားခဲ့ရင် အတူပြန်ဆုံအုံးမယ် ..... 🎶🎶
" ဘုန်း သွားနားကြရအောင် ခဏနေ ခေါင်းဆောင် လူစစ်တော့မှာ "
" အပိုတွေပြောပြန်ပီ မင်းအိပ်ချင် အိပ်ချင်တယ်ပေါ့ စစ်မှူးရာ ။ သွားအိပ်နှင့် ငါမအိပ်ချင်သေးလို့ ခဏနေမှလိုက်ခဲ့မယ် "
" အေးအေး အရမ်းနောက်ကျတဲ့ထိ မနေနဲ့ဦး ။ မနက်ဆို မင်းကထချင်တာမဟုတ်ဘူး "
" ဟုတ်တယ်ဘုန်း မင်းအပြစ်မပေးခံရတဲ့နေ့လို့ ငါတို့ကြုံဖူးချင်လို့ မနက်ဖြန်တော့နောက်မကျနဲ့ကွာ ။ ကဲ .. အကိုတို့လဲ သွားတော့မယ် "
" မနက်ဖြန် ကျွန်တော်အဦးဆုံး လေ့ကျင့်ရေးကွင်းထဲရောက်နေစေရမယ် စိတ်ချလိုက်ဗျာ "
" အိုခေဗျာ ..... "
ညရောက်ရင် တပ်သားများစုဝေးလို့ ဂစ်တာတီး ၊ သီချင်းဆိုခြင်းများနှင့် အလွမ်းဒဏ်များကို ဖြေဖျောက်နေရသည် ။ လွမ်းတယ် နွေးထွေးလှတဲ့အိမ်ကိုလွမ်းတယ် ၊ မိဘတွေကိုလွမ်းတယ် ၊ သက်သောင့်သက်သာရှိလှတဲ့ ကျွန်တော့်အိပ်ရာလေးကိုလဲလွမ်းတယ် ။ ကျွန်တော့်ဘဝမှာ ဒီအခြေအနေမျိုးကြုံရလိမ့်မယ်လို့ မြူတစ်မှုန်စာတောင်အတွေးမရှိခဲ့ဘူးဗျာ ။ ကျွန်တော့်နာမည် ဘုန်းမိုးထက် တစ်ဦးတည်းသောသားမို့ မိဘတွေရဲ့ရွှေဉလေးပေါ့ ။ မိဘပိုက်ဆံထိုင်သုံးနေတဲ့ တက္ကသိုလ်ကျောင်းသား ၊ ဂျစ်ကန်ကန် ၊ ပြန်မပြောနားမထောင် လူငယ်တစ်ဦးပေါ့ဗျာ ။
ကျွန်တော်တို့လူငယ်တွေရဲ့အနာဂတ်ဟာ (၂၀၂၁ ) ခုနစ် ဖေဖော်ဝါရီလ ( ၁ ) ရက်နေ့ကစလို့ အမှောင်ထုကြီးစိုးမိုးခံခဲ့ရတယ် ။ ဖေဖော်ဝါရီ (၄ ) ရက်နေ့မှစလူထုတိုက်ပွဲများစတင်ခဲ့ပီး အကြမ်းဖက်ကောင်များရဲ့ဖိနှိပ်မှုကို အလူးအလိမ့်ခံခဲ့ကြရသည် ။ မတရားမှု ၊ ချုပ်ခြယ်မှုများကို မနှစ်သက်တဲ့ လူငယ်များ ၊ နိုင်ငံရေးနယ်ပယ်အသီးသီးက ခေါင်းဆောင်များနှင့်စုစည်းကာ မေလ( ၅ ) ရက်နေ့တွင်ကာကွယ်ရေးမူဝါဒနှင့်အညီ တရားဝင်ကာကွယ်ရေးတပ်များဖွဲ့စည်းခဲ့ကြသည် ။ လွတ်လပ်မှုကိုအပြည့်အဝမြတ်နိုးတဲ့ ကျွန်တော်သည်လဲ မိဘတွေတားနေတဲ့ကြားက အတင်းဝင်ရောက်ခဲ့သည် ။ အနေဆင်းရဲ အစားဆင်းရဲနဲ့ ပြင်းထန်တဲ့လေ့ကျင့်ရေးတွေကြားမှာ ပင်ပန်းရပေမဲ့လဲ ကျွန်တော်တို့နိုင်ငံအတွက် ၊ ခေါင်းဆောင်တစ်ဦးချင်းအတွက် ၊ မတရားသေဆုံးခဲ့ရတဲ့သွေးချင်းများအတွက် အခက်အခဲများကိုသည်းခံလို့ ကျရာနေရာမှာ တာဝန်ကျေဖို့ကိုသာ နှလုံးအိမ်၌သံမှိုရိုက်သွင်းထားခဲ့သည် ။
YOU ARE READING
အတွေးတစ်ချို့ ပုံဖော်မှု
Short Storyစိတ္တဇနာမ် တစ်ခုဖြစ်တဲ့ အချစ်က သကြားလုံးလေးလိုချိုမြိန်သလား ၊ တမာလို ခါးသက်သလားဆိုတာ အတူတူ လေ့လာကြည့်ရအောင်
