" ကိုကို့အတွက် အဝတ်အစားက အိပ်ယာပေါ်မှာနော်။ ကိုကိုကလည်း သားကို တစ်ခါထဲ မခေါ်ခဲ့ဘူး။"
ရေကန်အသေးလေးထဲမှာ ရေဆော့နေတဲ့ သတိုးထင်ထင်သာကို ရေးရေးထင်က သွားခေါ်ရသည်။ ကလေးကို ရေတွေသုတ်ပေးပြီးမှ တဘက်နဲ့ပတ်ပေးကာ ခါးတစ်ခွင် ချည်ပြီး သတိုးထင်ထင်သာ့အတွက် အဝတ်အစား ထုတ်ရသည်။လေးနှစ်ကျော်နေပြီမို့ မူကြိုစ,လိုက်နေတာကြောင့် မူကြိုuniformဝတ်ပြီး အနွေးထည်လေး အပေါ်က ထပ်ဝတ်ပေးသည်။
" အုန်းဆီတွေ နည်းနည်းပဲလိမ်းနော်။ "
ရေးရေးထင်က အုန်းဆီတွေ အများကြီး လိမ်းပေးတက်တာမို့ ကလေးကာမမေ့မလျော့ပြောလာသည်။
" ဟုတ်ပါပြီ။ အရမ်း ဂျေးများတာပဲ။ "
ကလေးသုံးLotionလေးတွေပါ လိမ်းပေးပြီးမှ ကျောင်းကျောပိုးအိတ်လေး လွယ်ပေးလိုက်သည်။
" ဖေဖေက အခန်းရှင်းလိုက်ဦးမယ်။ မင်းဖေဖေကြီးနဲ့ လိုက်သွားပြီး နံနက်စာစားထားနှင့်နော် ထင်လေး။ "
ရေးရေးထင်က ထင်လေး၏ နဖူးကို ခပ်ဖွဖွနမ်းပြီးမှ သတိုးဘေး ပို့လိုက်သည်။ ကလေးတစ်ယောက်ရှိလာတော့ မနက်ခင်းဆို ရေးရေးထင်ရော သတိုးပါ ခြေချင်းလိမ်အောင် အလုပ်များသည်။သတိုးက ကလေးကို ပွေ့ပြီး အခန်းအပြင် ထွက်သွားပြီးမှ ထင်လေးကို ကြမ်းပေါ် ခဏချကာ အခန်းထဲ ခေါင်းသာ ဝင်ပြီး ရေးရေးထင်ကို ခေါ်လိုက်သည်။
" ရေး ... "
" ဘာလဲ ... ဘာကျန်ခဲ့လို့လဲ။ "
ရေးရေးထင်၏ မျက်လုံးကလည်း နေရာအနှံ့အကုန် ရှာပြီးသား။သတိုးက လက်ညှိုးကို ကွေးကာ အနားလာဖို့ ခေါ်လိုက်တော့ ရေးရေးထင်က အဝတ်အပေတွေ လက်မှာလုံးကိုင်ရင်း အနားရောက်လာသည်။
" သားရှိလာပြီးထဲက ကိုယ်ကအလိုလို ရာထူးကျသွားတယ်နော်။ သားကသာ ပထမဖြစ်နေတာပဲ။ "
ဒီလို ရစ်လာပြီ ဆိုထဲက ဘာလဲဆိုတာ ရေးရေးထင် သဘောပေါက်ပါသည်။သားကို တစ်ချက်ကြည့်လိုက်ပြီးမှ သတိုး၏နဖူးကို တစ်ချက်သာ မွခနဲ နမ်းလိုက်သည်။
