" စားစရာ ကိုယ်သွားယူပေးရမလား။ ဒါမှမဟုတ် ကိုယ်တိုင်လိုက်ယူချင်လား။ "
စားပွဲဝိုင်း အကျယ်ကြီးမှာ မသိတဲ့လူတွေနဲ့ ရောထိုင်နေရတော့ ရေးရေးထင် အနေကြပ်လှသည်။ အကုန်လုံးက လူကြီးလူကောင်းတွေ ဖြစ်ကြသည်မို့ ရေးရေးထင်ကို ထူးဆန်းသလိုတော့ ကြည့်မလာကြပါ။
" ကိုယ်တိုင်လိုက်မယ်။ "
" လိုက်ချင်တယ်လား။ "
" ဟုတ် "
ရေးရေးထင်က သတိုးလက်ကို တွဲလာတော့ သတိုးက ထိုလက်လေးကို ပိုမိုတင်းကြပ်စေလိုက်သည်။သူစိမ်းတွေကြားထဲ ရေးရေးထင် စိတ်ကျဥ်းကြပ်နေတာ သိတာမို့ သတိုးက ဖေးဖေးမမနဲ့ ဂရုစိုက်ပေးသည်။
" ခဏနေရင် ပြန်ကြမယ်နော်။ အခုရောက် အခုပြန်ဖြစ်နေရင် မကောင်းဘူးနော်။ "
" ဟုတ်ကဲ့။ "
ရေးရေးထင်အတွက် ရေးရေးထင် ကြိုက်တက်လောက်တဲ့ အစားအသောက်လေးတွေပဲ သတိုးက ရွေးထည့်လာသည်။
" သတိုးခန့်ညားက အိမ်ထောင်ပြုလိုက်တာတောင် ဘယ်သူမှ မသိလိုက်ရဘူးနော်။ "
နေရာတကျ ထိုင်ပြီးသည်နဲ့ မျက်မှန်းတန်းရုံလောက် သိသော ဆရာဝန်က မေးလာတော့ သတိုးက ရေးရေးထင် ပန်းကန်ထဲက Pizzaကို သေချာ လှီးဖြတ်ပေးနေရင်း ဖြေသည်။
" လက်ထပ်တာ အရမ်းလောသွားတော့ ရေးရေးထင်တို့ဘက်မှာပဲ လုပ်ဖြစ်သွားတယ်ခင်ဗျ။ ဒီမှာကတော့ ကျွန်တော် သက်သက်အချိန်ပေးပြီး ဖြည်းဖြည်းချင်း စီစဥ်ဖြစ်မှာပါ။ "
" သြော် ... ကောင်လေးက အခြားနယ်ကလား။ "
" ဟုတ်ကဲ့ခင်ဗျ ... မကြိုက်တာရှိရင် ကိုယ့်ပန်းကန်ထဲ ထည့်လိုက်နော်။ "
တစ်ဖက်ကိုလည်း ဖြေရင်း ရေးရေးထင်ကိုလည်း သတိုးကပြောသေးသည်။
" လုပ်အားပေး တာဝန်သွားရင်း တွေ့ကြတာလို့ ပြောသံကြားတယ်။ "
တစ်ယောက်က ဦးဆောင်မေးလိုက်တော့ အခြားသူတွေကပါ သိချင်တဲ့ အကြောင်းအရာတွေကို ဝင်မေးလာကြသည်။ သတိုးခန့်ညားက တက္ကသိုလ်မှာထဲက နာမည်ကြီး ထိပ်တန်းလေ။သူ့အကြောင်း စိတ်မဝင်စားတဲ့သူဆိုတာ ရှိနိုင်ပါ့မလား။