ငါ လူမှားဖလစ်မိပြီ (Translation)

12 || ကိုယ့်ကို လူဆိုးလုပ်ခိုင်းတော့မှာပေါ့?

လော့ယွီစန်းလည်း ဖုန်းတစ်ကောလ်ကို ဖြေကာ 'ဟင်'ဟု အာမေဍိတ်ပြုရင်း မတ်တပ်ထရပ်၏။ ထို့နောက် ဖေးပိုင်ဘက် လှည့်ပြောလိုက်သည်။

"ငါ သွားမှရတော့မယ်"

ဖေးပိုင်လည်း ပြုံးပြလိုက်၏။

"စီနီယာကိုကို ကိုယ့်အလုပ်သာ အာရုံစိုက်ပါ.. ဖေးဖေးကို ကျွန်တော့်ဆီ အပ်ထားလိုက်"

လော့ယွီစန်းလည်း ဖေးပိုင်အား စက္ကန့်ပိုင်းမျှ ငေးကြည့်နေ၏။ ထို့နောက် ရုတ်တရက်ဆိုသလို ဖေးပိုင်၏မျက်နှာဆီ လက်လှမ်းလိုက်သည်။

ဖေးပိုင်၏ ရင်ခုန်နှုန်းမှာ စက္ကန့်ပိုင်းမျှ လေးလံသွားသယောင်။ တဖြည်းဖြည်း ချဥ်းကပ်လာသည့် လော့ယွီစန်း၏လက်ချောင်းများကို ကြည့်ကာ စဥ်းစားခန်းဝင်နေ၏။

__ဖေးဖေးအရှေ့မှာ ဘာလုပ်ဖို့လဲဟ?

ဖေးပိုင်၏မျက်နှာအား ထိတွေ့မည့်ဆဲဆဲ ရုတ်တရက် ရပ်လိုက်သည်။ ထို့နောက် ဘာကြောင့်မှန်းမသိ လက်ပြန်ရုပ်လိုက်၏။

"မျက်တောင် ကျွတ်နေလို့.. ကိုယ့်ဘာသာကိုယ်ပဲ ဖယ်လိုက်တော့"

ဖေးပိုင်လည်း သတိပြန်လည်လာသည်။ ခေါင်းငုံ့ကာ သူ့ပါးသူ ပွတ်လိုက်၏။ ထို့နောက် ခေါင်းထောင်ကာ လော့ယွီစန်းအား တစ်ဖန်ပြန်ကြည့်သည်။

"ရှိသေးလား?"

လော့ယွီစန်း၏လည်စလုပ်က အထက်အောက်လှုပ်ရှားသွား၏။

"မရှိတော့ဘူး"

လော့ယွီစန်းက နက်ခ်တိုင်ကို အနည်းငယ်ဖြေလျှော့ပြီးနောက် တံခါးဖွင့်ကာ ထွက်သွားလေသည်။

ဖေးပိုင်လည်း လော့ယွီစန်း၏ခြေတံရှည်ရှည် မြင်ကွင်းထဲမှ ပျောက်ကွယ်သွားသည်အထိ ငေးကြည့်နေမိ၏။ ခေတ္တမျှ ငိုင်နေပြီးနောက် လော့ဖေးဖေးအား ဆက်လက်မှတ်တမ်းတင်သည်။

ဆိုရပါလျှင် လော့မိသားစု၌ ဆရာတစ်ယောက်ဖြစ်ရခြင်းက အလွန်လွယ်ကူလှ၏။ သင်ကြားရေးစနစ်နှင့် သင်ရိုးညွှန်းတမ်းများက လော့ယွီစန်း ငှားရမ်းထားသည့် ပညာရှင်များကိုယ်တိုင် ပြင်ဆင်ပေးထားခြင်းပင်။ ဖေးပိုင် ခေါင်းစားခံနေစရာမလို။ မာတိကာတစ်ခုချင်းစီ ပြီးမြောက်ရန်အတွက် ဖေးပိုင်က ဖေးဖေးနှင့်အတူ စိတ်ရှည်လက်ရှည် အဖော်ပြုပေးရန်သာ လိုသည်။