ဗီလိန်ကိုမှားယွင်းစွာကယ်တင်မိခြင်း ( Myanmar Translation )

Chapter 24

(Unicode)

ယွဲ့ဝူဟွမ်သည် ရုတ်တရက် စိတ်ထဖောက်လာခြင်းဖြစ်သည်။ အဖြစ်အပျက်မှာ မြန်ဆန်လွန်းသဖြင့် သူ့အခြေအနေကို လုံးဝမထိန်းချုပ်နိုင်ခဲ့ပေ။

ထို့ကြောင့် စုန်ချင်ရှစ်လည်း ရွှေရောင်အပ်ဖြင့် ယွဲ့ဝူဟွမ်အား သတိမေ့အောင် လုပ်လိုက်ရသည်။

သူနှစ်ဝက်လောက် ကြိုးစားပမ်းစားကုသပေးထားရသော လူနာ၏ရုတ်တရက်ထဖောက်လာသောစိတ်အခြေအနေကို ကူကယ်ရာမဲ့စွာ ရပ်ကြည့်ရုံသာတတ်နိုင်တော့သည်။ သူ့ကြိုးပမ်းမှုအားလုံးလည်း သဲထဲရေသွန်ဖြစ်သွားခဲ့သည်။ စုန်ချင်ရှစ်သည် အတိတ်တစ်ချိန်က စမ်းသပ်ခန်းထဲ၌ သူ၏ကြွက်များအားလုံး လုံးဝရှင်းထုတ်ခံလိုက်ရသည့်အချိန်သို့ ပြန်ရောက်သွားသည့်အတိုင်း ခံစားလိုက်ရသည်။ ယခုအချိန်၌ သူ လုံးဝယူကြုံးမရစွာငိုချလိုက်ချင်သော်လည်း မငိုနိုင်ဘဲဖြစ်နေသည်။

ဆေးသိပ္ပံသုတေသနလမ်းမပေါ်တွင် ကျရှုံးမှုများနှင့်သာ အဓိကတွေ့ဆုံရလေ့ရှိတတ်ပြီး ကံကောင်းထောက်မမှသာ အောင်မြင်မှုဆိုသည့်အရာက ပေါ်လာတတ်သည်။

ကျရှုံးမှုဟုဆိုသော ခေါင်းစဉ်အောက်၌ စုန်ချင်ရှစ်သည် မရေတွက်နိုင်သည်အထိ ကြွယ်ဝများပြားသော ဆုတံဆိပ်များရခဲ့ပြီးဖြစ်သည်။ မည်သည့်ထိုးနှက်မှုမျိုးကိုမဆို ရင်ဆိုင်နိုင်သည်အထိ အတွေ့အကြုံအမျိုးမျိုးလည်း ရခဲ့ပြီးပြီ။ ထို့ကြောင့် ယခုအချိန်၌ သူလုပ်သင့်သောအရာမှာ ထရပ်လိုက်ပြီး ပျက်စီးသွားသော အပိုင်းအစများကိုလိုက်ကောက်ကာ အမှားရှာ၍ ကုသမှုအစီအစဉ်အသစ်ကို ထပ်ဆွဲရန်ဖြစ်သည်။

သူသည် ယွဲ့ဝူဟွမ်၏ခန္ဓာကိုယ်ကို သေသေချာချာ စစ်ဆေးကြည့်လိုက်သည်။ ထို့နောက် သူ့ခန္ဓာကိုယ်ထဲ၌ပုန်းကွယ်နေသော စိတ်ကူးယဉ်ကူကောင်ကို ဆွဲထုတ်လိုက်ပြီး ယခုအရှုပ်အထွေးများအားလုံး၏ အဓိကတရားခံဖြစ်သူကို မည်သို့ဆုံးဖြတ်သင့်မှန်း တွေးတောလိုက်သည်။ သို့သော် သူနားမလည်သည့်အရာတစ်ခုရှိနေသည်။ ကူကောင်ဟုဆိုတိုင်း အန္တရာယ်ပေးနိုင်သည့်တော့မဟုတ်ချေ။ တစ်ချို့ကူကောင်များကို အဆိပ်ဖော်စပ်ခြင်း၌ အသုံးပြုကြသည်မှန်သော်လည်း တစ်ချို့အား ဆေးကုသခြင်း၌ အသုံးချကြသကဲ့သို့ ကူကောင်ကိုထိန်းချုပ်နိုင်သောလမ်းစဉ်အမျိုးမျိုးရှိပေသည်။ စုန်ချင်ရှစ်သည် အန်းလုံနှင့် လွန်ခဲ့သောနှစ်ပေါင်းရာချီကတည်းက ရင်းနှီးခဲ့ကြပြီး တစ်ယောက်အကြောင်းတစ်ယောက် ကောင်းကောင်းသိသူများလည်းဖြစ်သည်။ ထို့အပြင် သူတို့နှစ်ဦးသားသည် သူတို့၏ကျွမ်းကျင်မှုပိုင်းဆိုင်ရာဗဟုသုတများကိုလည်း အပြန်အလှန်နှီးနှောဖလှယ်လေ့ရှိသည်။ ထို့ကြောင့် အနောက်ဘက်တောအုပ်၏ ကူကောင်များအားအသုံးချပုံနှင့်ပတ်သက်၍ သူ့တွင် ဗဟုသုတအတော်အတန်ကြွယ်ဝပေသည်။