"اسيرة_لعبة_الماضي "باللهجة الجزائرية

الفصل11

سليمة:بزااف عليه هاذ الولد اللي فات (هزت يديها تدعي):ياربي خفف عليه واعطيه لعقل يصبر

نسيمة:ويبعد عليه هاذ اللفعة اللي رجعت (في قلبها كنت فوحدة وليت فزوج بعشرين)الله لا تربحها

سليمة:نسييمة ردي بالك تكملي مش بنتي الغالية اللي تحكي عليها هكذا فهمتي؟؟

مازن:يماا,جدة وشراه صاري هنا؟؟؟ونتي جدة ماتقولي غير لمرت ماهر الغالية علاش تفكرتوها ليوم وضك و..حبسي حبسي وقصدك برجعت؟؟؟؟يماا قولولي وش راه صاري (يهدر ووجهو ماليتو ملامح الصدمة)

نسيمة:انا نقولك مرت خوك المصون النار تحت التبن و رجعت تكوينا وتكوي ولدي

مازن وقف في وجهها :وش قصدك برجعت؟ البنت ماتت وشبعت موت ولا....كذبتو عليا؟وعلى لينار؟..فرقتو ام على بنتها.. كيفاه قدرتو؟؟ آآ كيفااه؟؟ يما نتي ام احكيي محطيتيش روحك فبلاصتها؟ ااا؟ جامي خممتي وش راهي تحس؟ موجعكش قلبك وقت كانت الملايكة ذيك تبكي عليها قدامك؟

نسيمة:لالا مغاضتنيش وبُعد بنتها ثمن لاغلاطها واغلاط جدودها دفعتهم هيا... وبنتها الملايكة اللي راك تحكي عليها فهي ثاني شيطان بحال امها

مازن:يمااا حبسي عندك لينار خط احمر اللي يوصلها او يخمم يوجعها ويضرها نوقف في وجهو اكيد حتى لو كنت نتي يااا..يماا وانا ضك رايح نقول للينار كلشي وندير المستحيل بش ترجع لامها لاني منيش بلا قلب كيفكم (جا ماشي حتى حبسو صوتها)

سليمة:ماازن ولدي استنا نتا ملازم تقول للينار اي حاجة ونتا مفاهم والو,ولدي لحكاية مهيش كيما راهي باينتلك الحكاية حكاية طويلة وما يقدر يحكيهالك كان ماهر

مازن:جدة انا بش نسمع لماهر ولكن اذا مقنعنيش فوقتها رايح نعاون مرت خويا تديها منكم

ميرال:ماازن هيا مبقاتش مرت خوك

مازن (خنزر فيها خزرات موت خلاها تتكور على روحها):مييرال ام لينار مرت خويا الوحيدة اللي كانت وبش تكون وتبقى فحياتو وحياة بنتها ونتي مجرد خط على هامش حياة ماهر متتخيليش روحك بمرتبة اعلى من هكذا لانو كل ما عليت كثر كل ما كانت الطيحة توجع كثر ياا بنت خالتي لعزيزة وضك اسمحولي غلبان وحاب نرقد تصبحو على خير (ومشا بلاما يزيد حرف مشوكي من وش سمع وزاد فضولو كثر يعرف وش صرا في عيلتو وقت غيابو عنها عامين)

ماهر بعدما فطن على وصول العيلة هز بنتو ومشا بسرعة متهرب من اسئلتهم بعدما شاف نظرات الصدمة اللي بانت على وجوههم وقت شافوها اييه كيفاه هواا تصدم وهم لا خمس سنين ملي تفارقو وحط نهاية لعلاقتهم تحت عنوان الكره وفقط رجعت بعد سنين بقوة ولعبة كبيرة دخولها معاه شريكة ومعا راجلهااا حاجة متبشرش بالخير ودليل على نية كبيرة

غير حطها فبيتها ورجع لبيتو دخل ديراكت للدوش فتح المرش البارد وجاا تحتو كشما تطفى النار اللي شاعلا فقلبو ومنظرها وهياا حاكمة فيدو وكلمة راجلي تتعاود في وذنو مفاقش معا روحو كيفاه طيش كامل وش كان قدامو من شامبوا وامور دوش ودخل فالحيط بالدبز حتى جرح يدو وتعبات دم هبط مكالي ظهرو للحيط دم يدو يسيل والما مزال يسيل عليه بقى يحكي بوجيعة