"اسيرة_لعبة_الماضي "باللهجة الجزائرية

الفصل 7

مازن ولينار:علينا ا جدة وهوما مزالهم حاضنين يدين بعض ويرجفو

ماهر تخنزر فيهم ورد لسليمة :ردو برواحهم

سليمة :علاه ياولدي

ماهر:كيفاه علاه مشفتيش وش دارو قلنا هذيك صغيرة ومتفهمش لحقها لكبير كيما دير يعاونها لا وزيد يعاونها فالهربة

مازن:والله هيا دعاتلي بالمرا وقاتلي نحوسلك ايا انا عاونتها برك والله ياخويا الزين

لينار طلقت يدو:صاار بعتني معليش (ودارت لماهر زعما تستعطف فيه)بابي انا بنتك صغرونة منعرفش نغلط وتعلمني نتا ياك؟؟ايا معليش ولكن ميرال هيا الغالطة ونتا تخيرني انا عليها يخي(وذبلتلو عويناتها بحال القطة)

الكل بقا مشوكي فخلق ربي كيفاه ساعات تكون جن ومرات تقول ملاك مصور في هيئة انسان وعويناتها الgري يغماقو وتحلى

ماهر ميقدرش يتجنبها تبسم معاها حكى:ايا بركااي من التستات ...ياربي وش كاسب ستوتة

سليمة:ههههه زي يماها بنتي الغالية

لينار طارت من الفرحة جرات عندها تتعنكش على حجرها:قولي والله صح نشبهلها, حتى هيا كانت ستوتة..هههه اا قصدي تشبهلي.. عندي نفس طباعها.. خارجة لماما صح... ههههه قوليلي عيشك

القلوب كامل تفتت طفلة تسأل على امها واشتياق كبير مالي عينيها يادرا وشمن وجه رايحين يقابلوه بيها وقت تعرف الصح

سليمة تبسمتلها وعينيها غرغرو بالدموع وتمنات لو الشي اللي صرا فالماضي ماصارش ومحرقتش هاذ البراءة ولكن الندامة تجي معا اللخر وماتفيد بوالو بالعكس تزيد غير الوجاع

تدخل ماهرملطف الجو وقلبو ما عالم بنارو كان الله :لينار هيا تروحي تقراي ازربي

وناض مشا بلاما يزيد كلمة ومشات هيا من وراه ومازن لحق عليهم حتى هوا وكيما كل يوم مشاو وصلوها وراحو للشركة ماهر فالطريق دار اتصال معا صاحب الاوتال انو كل النازلين اللي بالاوتال يقدرو يحضرو الحفلة وطلب منو يفوت الدعوة عليهم مشم محبة ليهم ولكن هذا اوتال خمس نجوم ومعروف بزاااف في دزاير وصعيب تحكم فيه الا من اصحاب الطبقة الراقية والمستثمرين وطبعا اذا عجبهم يحاولو يتواصلو معاه ويتوسع نطاق عملو ويحقق حلمو

ماشيين فالاوتال بكل وقار قوة وحدة خارجة من عينيهم وجمالهم طاغي على الساحة ايلين بروب نوار بومبي قيرة وباسكات جون وصاك جون وفاردة شعرها الذهبي والسلسة اللي عمرها تفارق رقبتها مدلية وسط صدرها وسيليا بشورت جين وتيشورت كول باطون فالgري وشعرها مفرود بجنب وباسكات gري وبطايتها تبان بنوتة صغيرة ريحو في طابلة بحذا الكوفر البحري يفطرو ويسبنو حتى وقف عليهم خدام

خدام:صباح الخير عليكم وبصحتكم الفطور شرفتو الاوتال تاعنا

سيليا (تبسمتلو):مارسي

ايلين (تبسمت حتى هيا):شكرا

خدام:حنا نحاولو نضمنو راحتكم بكل مجهوداتنا وليوم كاين مناسبة هامة حيث رايح يتم حفل افتتاح شركة جديد وصاحب الشركة ومنظم الحفلة قال انو كل نازل بالاوتال يقدر يحضر يعني اذا تفضلتو علينا وحبيتو تحضرو الحفلة مرحبا بيكم حضوركم يسعدنا

سيليا شافت فايلين تاع وشرايك

ايلين(هزتلها كتافها تاع معرف وتبسمت معا الخدام):شكرا وحنا اذا حبينا وكان عندنا الوقت اكيد نحضرو

راح الخدام وسيليا وايلين قررو يديرو هاذ النهار تاع تحواس ويشريو شويا لبسة بيسك اللي جابهم معاهم مش مناسبين لخدمتهم الجاية

وكيما كان الحال فطرو وخرجو دارو فمول كبير شراو كامل وش يحتاجو ودي روب للحفلة بعدما اصرت سيليا تحضر بيسك عجبها الديكور الصباح وحابة تشوف الحفلة وصل وقت لغدا تغداو ورجعو للاوتال يتوجدو