♥▄الـنـبـ«14»ــضــة▄♥
فـي الـغـــد..~
فتحت عيناها بتثاقل...و هي تحس بصداع رأسها...بعد نوم متقطع...و كوابيس مزعجه...
لم تستوعب عيناها النور الذي اشتعل أمامها فجأه...و قلبها يفزع و هي تتبين ذاك الثوب الأبيض الواقف بالقرب من سريرها...لتنطلق صرختها قبل أن ترى وجهه...
تميم يجلس بجانبها بقلق / سلام وش فيك؟
سلام تلهث بأنفاسها..و هي تتأمل وجهه / تميم!_تنفست براحه_حرام عليك خوفتني
تميم / هذا و أنا مقدر حسك المرهف..و مصحيك بهدؤ..أجل لو استعملت طريقتي مع سمو وش بتسوين؟
سلام تبتسم و هي تجلس بسريرها / الله يعينها..أنا اشوف البنت صارت مرجوجه..أثاريك انت اللي مفزعها
تميم / الله يسامحك حطمتيني..أنا قلت بتقول وش هالوجه الصبوح اللي تصبحت فيه..أكيد يومي بيصير حلو..مو تصرخين!!
سلام بإعتذار / قمت من الحلم أساساً مفزوعه..و ما ستوعبت وش اشوف قدامي
تميم بمحبه / خير إن شاء الله..الساعه وحده بعد الظهر..أمي و عمتي مسوين قضيه لأنك ما تعودتي تنامين إلى هالوقت..فقلت أحل المشكله و اصحيك
سلام تبتسم / ما نمت زين..بس ما قلت لي كيف تصحي سمو؟
تميم يضحك / تذكرين القناع اللي جبته يوم سافرت
سلام بإشمئزاز / أبو شعر أبيض
تميم / ايه
سلام / عسى تخوفها فيه..لك سنه جايبه!!
تميم / ايه..و خوفتها فيه مية مره..و للحين تخاف كل ما تشوفه
سلام / حرام عليك تميم..مو زين تسوي فيها كذا..تفززها من نومها على ذاك الوجه
تميم يبدو متفهماً / خلاص و لايهمك أدور طريقه ثانيه اخوفها فيها..أصلا أنا مليت اخوفها فيه و هي للحين ما ملت تخاف
ضحكت بيأس أن يأخذ كلامها بجديه...و ابتسمت و هي تستمع إليه...
هذا ما تحتاجه لتتخلص من ضيقه مازالت تسكنها من الأمس...صباح مرح بنكهته...
♥▓♥▒♥▓♥
دخل إلى غرفتها ليجدها تجلس على مكتبها...مستغرقه بترتيب أوراقها...و كتبها...و ملخصاتها...
سامي يضع كوباً من الشاي على مكتبها / صباح الإجتهاد
كادي تبتسم / صباح العسل لو إننا اللحين الظهر_تاخذ الكوب منه_..تسلم يدينك
سامي يجلس/ عاد هالأسبوع لا تضيعين وقت....
كادي تقاطعه بتذمر / لاااا سامي عاد مو تصك علي من اللحين..الامتحانات بعد اسبوع
سامي / ايه راجعي بهالأسبوع..عشان ما تتعبين
كادي بحماس / ايه صح..اتفقنا مع سلام الخميس الجاي..نروح أنا و سمو لبيت أبوها عشان نراجع معها و مع صبح
سامي يضحك / و تاخذين اذن من اللحين؟
كادي / ايه متحمسه اشوفهم مره ثانيه..حبيتهم ضحى و صبح..حتى فجووره_لتكمل شارده بهمس_ياليت عندي أخت كبيره مثل صبح
سامي يبتسم بحزن / عندك سمو ما تكفي
كادي بصراحه قلما تتحدث بها / سمو نصي الثاني..نضحك و نستهبل مع بعض..بس اتمنى عندي أحد أكبر مني اشاورها باللي يحيرني..اقولها اللي يصير معي..هههه تحسني غيوره عشان شفت صبح كيف مهتمه بخواتها..أبي أصير مثلهم..؟
سامي يمازحها ليخرجها من ضيقها / مو كل الخوات الكبار طيبات..يمكن تخنقك و تتحكم بتصرفاتك..خليك علي احسن نص سوالف البنات ما اعرف فيها عشان كذا ما وقفتلك على الوحده
كادي تضحك / الله يخليك لي..و تتزوج و تجيب لي أخت كبيره
