من بعد الغذي اللي جمع العيلة و صفى القلوب نوعا ما ...عزيزة استاذنت من العيلة ع شان تمشي للحوش
و هي طالعة كانت سندس شادة في رجلها و تعيط
عزيزة ضحكت : حبيبتي شفتوها...
تعالى هياقامتها فوق عندها و باساتها: مديحة عادي تمشي معاي ؟
مديحة كانت مستاحشتها لكن تاثرت باللقطة : باهي لكن مرات تضايقك وانت اكيد بتغيري و بترتاحي
عزيزة تبوس فيها : لا عادي ما عندها ما تديرلي
عويشة : غير حطيها و خليها تمشي ع رجليها رزينة عليك
مديحة : اي حقا واعر عليك تمشي بيها للحوش
عزيزة نزلتها : شني سندوسة نمشوا
سندس تضحك: نسو "نمشو"
عزيزة خذت شنطتها الصغيرة : هيا السلام عليكم و صحيتوا و سامحونا ع التعب
: و عليكم السلام / لا تعب لا سو / سلمك
مشت عزيزة للحوش
فتحت الباب بس كانت في مفاجاة في انتظارها
حست بريحته في الحوش وفي شي مش طبيعي
قدمت و سندس تمشي وراها
كانت الطاولة عليها تورتة صغيرة متاع شوكلاتة و عليها باكو صغير
قلبها دلها طول انها نجحت ابتسمت و عيونها دمعوا و هي تفتح في الباكو
اللي كان فيه عقد ذهب ابيض و فيه حجرات لولو من الوسط حائطين بدائرة زي المحارة مكتوب فيها بخط عربي منقوش بشكل جميل طاهر و عزيزة
بدت ايدها ترجف
جي من وراها و قام سندس بين ايديه : من ايام ناخذوا في الكسوة خشيت لمحل متاع ذهب و درت فيه طلبية نتذكر مودة لامتني كيف ناخذ الذهب بروحي انا وقتها مشيت و مانبي حد يعرف حتى انت قلت بيني و بين نفسي لو يوم ملكت قلبها و تاكدت اني حفرت اسمي فيه نعطيها العقد هذا لان مش مجرد عقد و ذهب عادي لا هذا انا اخترت شكله اخترت عنوانه و مضمونه و كل شي فيه من طاهر ليك انت
عزيزة لفت ايديها عليه قعدت ساكنة في حضنه لحظات حستهم عمر كامل معاه
طاهر باسها ع خدها : مبارك النجاح يا خمسية
عزيزة اهني استاقضت و باعدت عنه: قصدك التورتة ع شان النجاح
طاهر : طبعا جبتي جيد جيدا
عزيزة فرحت : مش مصدقة تعرف قبل نقرا نظامي و تقديري جيد الحمدلله هذا بمساعدتك انت و عمي ربي ما يحرمني منكم
طاهر حس بسندس ارتخت عليه : اشبحيها شكلها رقدت
عزيزة لفت : اي والله تعالى نحطوها في الدار