الليث الاسود

Part 10

#الليث_الاسود
الكاتبة : ساره جعفر
..

صفنت عليها وتنهدت ، حاولت تواسيني ولو بجزاء بسيط هل شي كبرها بعيني ، ابتسمت بوجها

عُطر : كتلج فاشلة بالمواساة

ضحكت الها وكمت قدمت ايدي الها باوعت الأيدي ورفعت نظراتها لوجهي ، لزمت ايدي وابتسمت كامت وصرنه مقابيل بعض .

ايفا : مبادغه حلوه منج حاولتي تاوسيني ، شُكغًا جدًا

عُطر : عفواً جدًا

ابتسمت وطلعنه سوه ، صار سواد مقابيلي كاعد بالصاله هو على العشه ما شفته اعتقد اجه هسه كعدت وكعدت يمي عُطر .

فرقد : شنو العلاقه بينجن متطورة

عُطر : كُلش ، بس لا تفرح

وغمزت اله هو كلب وجها ، وهمس

فرقد : خبيثة

انتبهت السواد حيل مركز وياهم وضل يخزر بـ فرقد صارت هوسة ، والأصوات متعاليه بالصاله طلعت ارجوان من غرفتي تفرك بعيونها تلكيتها وجريتها لحضني بستها وأخذتها غسلت الها ومشطت شعرها ،

ايفا : اسويلج عمية

هزت راسها وهيه تلعب باماشات الشعر كمت صبيت الها وكعدت اوكل بيها ونسولف ، شبعت وغسلت الها وحطيت الها عُطر وأخذتها وطلعنه هيه بس شافت فرقد ذبت نفسها علي

ضحك الها واخذها يبوسها ويسولف وياها ، رجعت لمكاني وصرت اسولف وي البنات جُذب نظري سواد شلون يباوع الارجوان ومبتسم

ابتسامه غير عن العادة ، تقرب منهم وضحك الها هيه بسرعه تندمج ويا الناس ، أخذها من فرقد وضل يبوسها ويتشاقه وياها

بس انتبهت انو ميلح بالبوس

واني الاعرفه والشايفته الناس اذا شافو طفل هواي يبوسون بي هو باسها بوسه بخدها على كيف وابتعد ، اردف فرقد بغرور متأكد من الاجابه

فرقد : منو اكثر واحد تحبينه

جيلان : افف

كلب وجها فرقد عباله راح تختاره

سواد : ليش تضوجها

فرقد : لا ما تتأفأف جاي تكول ايفا

رفع عينه سواد باوعلي وطالت نظرته تحمحمت ورجعت استمع للبنات ، اجت رياحين وكُعدت يم اخوانها

رياحين : صدك سواد أريد طلب

سواد : أمري

رياحين : يا عيوني تسلم ما تقصر ، بس أريدك تقري البنات خطيه مو صارت فواتح جره وحده ، وحتى المعهد بطلن منه من غيرنه البيت ومستواهن راجع

سواد : سهله ان شاء الله

تغاريد : خالو بس خاف كُل شويه تكفخني لان استيعابي بطيئ