قاع الشياطين

البارت السابع والخمسون

...............☆البارت السابع والخمسون ☆............

#قاع_الشياطين(البصر والبصيره)

#بقلم_أسماء_ديمير

همست هاهيه عمو توكل ..

متاكده عمي خاف غلطانه ..

-لا عمو هنا مو نفسه للعنوان الي كتلك عليه ..

-رد اي نفسه بس المحلات معزله ياعمو ماكو احد خاف كلشي يصير ، 

-لا مايصير شي اهلها لصديقتي عدهم محل مال ورود هنا ، نص ساعه و يفتحون خليني هنا  بين ماتفتح المحلات ..

-زين منو هاي صاحبتج ومنين ..

-ابتسمت بدمعه ، صديقتي نور جانت وياي بالمعهد هذا محل امها ، هي تشتغل ويه امها بي ، اكيد راح يجن ويشوفني ويعرفني ، روح عمو تطمن …

هز راسه متحسف عليها ، باسني من راسي و حجه ، انتظر وياج لحد مايجن على الاقل اطمأن ..

-روح عمو راح تتاخر على مسواك وخاف يشكون بيك ماريد الك الاذيه ، توكل عمو توكل .. 

دفعته من جتفه بهدوء ،  حجه استودعج عند الله …

عافني و مشه كعدت اني على مسطبات كبال المحل و لميت الجنطه لصدري ..

اقره سور وايات وادعي من الله ماوكع بورطه اكبر من الي اني بيها ..
صفنت واذا مااجن ..

لايجن هذا باب رزقهن شلون مايجن ، من زمان اعرف امها تفتح من سبعه لحد التسعه باليل ، 

صفنت زين واذا تاخرن واحد تحارش بيه ..

لا ماكو هيج شي شارع راح ينترس ناس قابل يجي عليه اني هم يخاف مني ..

كعدت نص ساعه ، لحد ماتعبت ، بلشت تظهر اصوات الناس و سيارات تتحرك بالشارع ..

اثار اقدام تمر من كبالي يحجون ، لو اصوات عربانات دفع ، وركض اطفال كامو متوجهين للمدارس ..

لزمت سبحه اسبح بهدوء مدنجه ، حسيت بشخص وراي حجب عني اصوات سيارات ، رفعت راسي بهدوء خايفه ..

حجه ميرال ؟؟!

جسمي كزبر ضغطت على السبحه حيل ..

ليش هنااا جاي تخاطرين بروحج تدرين لو لااا ..

غمضت عيوني بهدوء ، 

-بيبرس راح يعصب حيل ..

سكتت ، دار وكعد بصفي ، حجه طلعتج بهذا الوقت غلط ، من عرضت عليج اني بذاك الوقت ماقبلتي تطلعين بس من دكت براسج طلعتي ..

لا هذا مكان الصح ولا الزمان الصح ، وضع رجلج مكركب وخطر وراسه مطلوب لعائلتين ، تعرفين اذا وصلج احد هاي عائلتين وكعتي بيدهم شيصير ..