قاع الشياطين

البارت الخامس والخمسون

-ماتت ميرال ماتت خشمها طاك دم معلكه نفسها بالحمام بجنكال ، خليت راسي على جتفها وبجيت كاافي اسكتي كاافي …

اغلبهم  راحو وياها ، ضليت بس اني وغزل و ابنها وامير شايلته وسن تسكت بي ..

مددت بالتخم بصاله اني ارجف ميته برد .. حسيت على غطاا ..  حجت غزل ضغطج نزل موو تغطي هاج .. اخذته منها وتشكرتها ..

كعدت بصفي ترضع ابنها و تمسح بخشمها ، شهكه بصدري ، همست الهاا غزل ..

هااا ..

-شلون شكلها جان ..

-منو ..

-ايلاف ..

-سكتت شوي  وحجت حلوه خطيه جانت حلوه بيضه .. وعيونها عسليات .. 

بلعت الغصه كوه همست :- وجها جان حلو اليوم لو كئيب ..

-لا خسرت جمالها من حبلت ، بياضها انكلب لصفار ، وعيونها غارن جوه بوجها من الضعف ..

-خليت اديه على حلكي ابجي ، :-جانت تكول كالت راح اكتل روحي اذا رجعوني اله محد صدكها بس سوتهاا سوتها صدك ..

-ماكو اسوء من ان تعيشين ويه رجال متحبي ميرال اسوء شي بالدنيا من تزوجين شخص متحبي فوكاها يهملج الموت اهون على العيشه وياه..

بجيت :- هي وكالت داموت على البطيئ ماحسينه بيها ..

-محد يحس بالظلم غير اهله ..

ضليت اسكت شوي وارجع ابجي لافه روحي بطانيه وارجف ..

البيت هوسه الحرس تتراكض وسن خايفه وابو جمد كل شوي يجي يسال هااا شكوو مادكوو ، وووين ويله رجعو ساعه ب١٢ باليل ..

ويه اخبار ماتسر العدو نفسه .. غادرت ايلاف بعمر ال٢٥ سنه و حامل الها ثمن اشهر ، وياها طفلها هم جان ولد واسم الله كان مريض بمرض خلقي اثر الممنوعات ..

طارق راسه انفتح وخيطو اله ست اخياطات ، هذا سمعته بعدها من بشار ، عواد و البقيه اخذو سلاحهم ولحكو لبيبر للمستشفى خافو لا يغدر بي طارق وابو بنص المستشفى هو لوحده ..

جابو تابوتها ثاني يوم ، يمكن من يموت شخص منستوعب بسرعه ، ناخذ وقت ،  بس موتت ايلاف استوعبتها اني ..

لان جانت عايشه وميته بنفس الوقت ، روحها ميته ومغادره جسمها من زمان ..

امها تصرخ بنص الحديقه مفجوعه لحد مابح صوتها ، ديما تعيط ونايمه على تابوتها متأثره حيل برحيلها ..

اني واكفه على صفحه ماكدر اتحرك من الخوف ..

تركتهم ودخلت للصاله مرعوبه من اصوات العياط ..

نوب بلش رمي ماتعرف الك لو عليك ..

ضليت كاعده بصاله بزاويه خاتله ، اتشاهد وابجي مخترعه تيهت حتى الدرج وين داروح لغرفتي ، هي روح وحده ششوف بعد اسوء من هيج ..