ذلني من عشقني

البارت 10

اياابه شحياكم .. رجعنا بالبارت 10

تمرُّ الحياةُ بين حلمٍ وأُمنية ولا يحدث إلا ماكتبَ الله لنا..!
عيونٌ تحلم ، وقلبٌ يتمنى ، وربٌ كريم..💕✨

دنيا ..نزلت من الطيارة بعد مادخلنا الاراضي القطرية

جنت كللش تعبانة لأن مكدرت انام بالطيارة ف بس نزلت من الطيارة رحت اخذت تكسي للفندق

طبعا جنت ابحث قبل لا اروح لقطر بحثت على فنادق وشفت اسعارها وعنوانها لأن جانت طيارتي للدوحة

بعدها صعدت بتكسي ورا ما كملت الإجراءات ووصلت للفندق شوفتهم جنسيتي بالأستقبال وحجزت غرفة ورحت كبل نمت لأن جنت ميته تعب

صحيت من النوم على الساعة 4

طبعا نمت من الصبح اول ما وصلنا شبعت نوم من جد

خابرت بنت خالتي هي عايشة بقطر وكلتلها اني هنا واريد مكان حلو اروح اشوفه بقطر

طبعا كلت بما انه اني هنا لازم اطلع افتر واشوف الحياة هنا شلونها كالتلي على هواية اماكن وبحثت عنها تعجبت من جمال الأماكن بالصور

كمت سبحت وبدلت

بعدها طلعت وشفت مكان الفندق يجنن اصلا اني من دخلت جنت تعبانة ومنتبهت الاي شي بس هسة شفته كلش حلو

بعدها بلشت اتمشى كلت اروح مشي علمود اتعب شوية وهم اتنشط حتى مانام قبل موعد طيارتي

وصلت لمول ضخم بشكل يعني بكد المولات اليمنه ب ٧ او ٨ اضعاف شفت هواية محلات واغلب البنات لابسين عبايات

كلش عجبتني العبايات اليمهم بس كلت لنفسي اني رايحة نيويورك وين البس عباية هناك

اشتريت شي مثل البشت يجنن باللبس اخذته وتمشيت شوية شفت أشياء عجبتني يعني دشاديش مال بيت اخذت لأن هناك حفتقدهم ماعدهم هناك هيج شي

بعدها رحت تعشيت واخذت تكسي للفندق تقريبا ساعة ١٠

وصلت وضليت اتصفح بالفون على ما يجي موعد الطيارة لأن طيارتي ب ٢ بليل

طبعا بنت خالتي كالت هي تجي تاخذني للمطار لأن مستحيل اخذ تكسي بهيج وقت متأخر

..ساعة 12 ..اجت بنت خالتي ودزتلي مسج نزلت جوا سلمت عليها وحضنتها جنت مشتاقتلها كلش لأن قبل ٥ اشهر رجعت لقطر بعد ما اجت زيارة للعراق

ضلينا نسولف بالسيارة وهيج وباركتلي على معدلي

بعدها وصلنا للمطار ضلينا بالسيارة تقريبا لل ١ وثلث هيج بعدها نزلت ختمت الجواز وسويت إجراءات قبل الطيران وصعدت بالطيارة انتضر الأقلاع

بعد 14 ساعة بالطيارة تكسرت تكسر واخيرا وصلنا للولايات المتحدة تحديدا ولاية نيويورك جنت اباوع واحنا نهبط للبنايات الشاهقة 《ناطحات السحاب 》وافكر يا ترى شنو ينتظرني بهالمدينة وهل حتكون حياتي سعيدة او لا