الحب المحرم

Psycho26

______________________________________

فاقت على ألم راسها كتحل عينيها بصعوبة على أشعة الشمس الضعيفة لي دخلات من الشرجم و تهرسات مع جسدو لي قدام الشرجم خاشي يديه فجيابو .
حطات يديها على جبهتها مزيرة على سنانها فاش تفكرات كفاش تجرأ الحيوان يخدرها لبارح باش تنعس ..السبب؟
ضورات عينيها فلبيت ،بلاكار مهرس ،طبلة دزاج لي تحولات لقطع صغيرة فلأرض حدا بقايا مجموعة ساعاتو من ماركة عالمية لي تهرسوا تحت يديها ...الا كان كيسحابليه غتسكت ليه فحال قبل ،فهو كيحلم غتخليه يكره النهار لي عرفها فيه و يعتازل جنس النساء من اصلو...الفكرة من واحد الناحية كانت عاجباها خاصة الا كان غيكره اللفعة دمرتو حتى هي.
:"صباح الزفت
خرجها صوتو من أفكارها بنبرة غريبة عليه ،كان معصب و لأول مرة مكيحاولش يخبي الأمر حتى انها مكانتش العصبية ديالو لي كتخاف منها ..لا كان فحال شي ولد صغير معطاوهش اش بغا او داوه لمدرسة بزز منو ...ابتاسمات بجنب فاش فهمات مالو اخيرا تابعا عينيه لي كانو على وحدة من ساعاتو لي فلأرض كيشوف فيها بحب فاق نظرات الحب لي عطاها فطونوبيل نهار اعتارف ليها بيه.
ماريا :"صباح الخير قالت ببتسامة عريضة و قاست فكرشها بفخر )صباح الخير بابا البيولوجي
خرجات جملتها الأخيرة بلا وعي منها و فالأصل كانت باغا تغيضو بيها الا انها لقات عينيه توجهوا ليها بصدمة ناسي انه يرمش ،مركز على وجها لمدة فنظرها طويلة كثر من القياس
:"خليك حتى تساليو
تكلمات مرة وحداخرا فاش بانليها سهى و غرق فعالمو الخاص دايرة ليه إشارة لراسها بمعنى الأصوات لي فراسو و ناضت متوجهة لحمام .
جلال:"اش عنات ب بابا ؟
سمع صوتو كيسولوا للمرة الرابعة و هو باقي واقف بلاصتو،استبان كيحاول ياخد السيطرة على جلال لي هضر ..فالأصل كان خاسها غير تفيق و يتحكم هو الا انه معرفش كفاش وقع حتى بقا حتى سمع داكشي لحسن الحظ عينيه مكانوش عليها ولكن على حبو التاني ساعتو لي شراها من فرنسا و منها نسخة وحدة هي ديالو مرصعة بمئة ألماسة نادرة .

استبان:"لمدة لي دوزات معانا كافيا باش تاخد شوية من حماقنا
جاوبو كيضحك بعصبية و يديه مشاو نيشان للحيتو كيقيس فيها يتوتر و عينيه ليمنية ضيقة بشك و عينيه التانية محلولة بتركيز كبير على نقطة فالحيط
تسنا جلال يجاوبو او يضحك الا انه تقطع ليه الحس حتى المشاعر ديالو اختفاو ..آه كان أحقر انسان شافو ..كيمشي بلا حتى ما يودعو او يقوليه فاش كيفكر و كيسد على افكارو و مشاعرو فنقطة بعيدة فعقلو .
حس بالخوف بدا كيسيطر عليه و انه تالف...فحال هديك الليلة نفس المشاعر ،الضعف و الوحدة لي حس بيها فاش مات علاء قدامو حس بيها فاش مشا جلال و خلاه بلا حتى صوت .
لعن بصوت عالي الغباء لي لبسو و محاولتو الفاشلة فالتهرب من الموضوع،استبان لي مكيضحكش حتى بينو و بين راسو حاول يضحك جلال ،الأمر بحد داتو كيجيب الشك .

نزل راسو كيشوف فصباطو مزير على يديه قبل ما يتحرك لقدام المرايا حاط يديه عليها كيشوف فنعكاسو بصمت ..لمدة طويلة، طويلة بزاف و بتركيز كبير حتى مبقاش كيسمع صوت لما لي جاي من الحمام و انقاطع مع المحيط ديالو
:"جلال كنهضر معاك جاوبني
تكلم بهمس من بين سنانو كيشوف فنعكاس عينيه بلا حتى فائدة
استبان:"جلال ..(و نزل راسو بين كتافو بألم )كنحس بيك ..قدرت نقرا دبا شوية من أفكارك..محاملاش كنحلف ليك محاملاش (و سكت و كأنه كيسمع لشي صوت داخل راسو )لا لا(تكلم بزربة كيحرك يديه قدامو )لا مكدبتش مقطعتش التواصل بيناتنا هكاك غير ...
سكت مرة وحداخرا كيحاول يلقا اي عذر بالزربة و وتيرة انفاسو و نبضات قلبو تجهدو حتى تزير عليه صدرو مخنوق
استبان:"هداك ولد.لوريس هادشي علاش مبغيتكش تعرف هادشي علاش عفاك
قال اول ما جاه فراسو عاض حنكو من لداخل ..غادي تنجح الخطة ..غادي يتيقو يكفي انه ميفكرش فالأمر على انه كذبة .
الهدوء ،هدوء كيصمط هو كل ما جاه فودنيه قبل ما يسمع همس جلال بينو و بين نفسو فراسو بطريقة غريبة ،كيهضر بالزربة و كلماتو ممفهومينش، عقد ججبانو بنعدام فهم قبل ما تمشي بيه السيطرة و يبتاسم بجنب بخبث ،مغيقدرش يحبسو ،يمكن الكدبة كانت كبر من انها دوز على جلال بهاد السهولة
جلال:"لوريس
نطق سميتو من بين سنانو بكره و عروق جبهتو خرجو ،فحال ديما كان استبان هو أسوء شخصية فيهم و لكن ماشي فحال جلال لي كيجمع هجماتو فدقة وحدة ،كان تقريبا بنفس الشخصية لي تخايل بيها علاء كون كبر ،كون مماتش هديك الليلة !