THE FIRST TIME WE MET🌊 [COMPLETED]

Part . 20 🌊

"ဘယ်လို...ဘယ်လိုဖြစ်တာလဲ ဖေဖေရယ်"

"မနေ့ကတင် အမျိုးသမီးကြီးတစ်ယောက် ဖေဖေတို့ဆီလာတွေ့သွားခဲ့တယ်"

အမျိုးသမီးကြီး? ဘယ်သူလဲ။ မဟုတ်ဘူးမလား ဒီလိုမဖြစ်ရဘူး။ မဟုတ်ဘူး မဖြစ်နိုင်ဘူးလေ။

"အိမ်ထောင်ရှိပြီးသား သူ့ရဲ့မြေးကို ငါ့သားကမြူစွယ်နေတယ်ဆိုပြီး ဖေဖေတို့ရှေ့မှာတင်ပြောဆိုခဲ့တော့တာပါပဲကွယ်..."

"........."

"နားနဲ့မဆံ့ရအောင်ကြားလိုက်ရတဲ့ ကြမ်းကြုတ်တဲ့စကားတွေကို သားရဲ့မေမေဟာ ခံနိုင်ရည်မရှိခဲ့ဘူး။ သူ့သားငယ်လေးကိုဘယ်လောက်တောင်မှချစ်လိုက်သလဲ။ တစ်ချိန်လုံးအငိုမရပ်ပဲ နောက်ဆုံးမေ့မျောသွားတဲ့အထိဖြစ်သွားတယ်"

ဖုန်းကိုင်ထားသည့်လက်ဟာတုန်ယင်လာသည်။ ဒါတွေအကုန်လုံးအိပ်မက်ဖြစ်ခဲ့ရင်သိပ်ကောင်းမည်ဟုတွေးလိုက်မိသည်။ ဖေဖေဟာ သူ့ကိုအိပ်မက်ထဲမှာ စကားပြောနေသလိုပင် အသံတွေဟာ နီးလာလိုက် ဝေးသွားလိုက်ဖြင့်။ တင်းကျပ်လာသည့်ရင်ဘတ်ဟာ ဆုတ်ဖြဲခံလိုက်ရသလိုနာကျင်သည်။ အသုံးမကျတဲ့သားကြောင့် မိဘတွေအပြောအဆိုခံခဲ့ရပြီ။

"အခုမေမေ ဘယ်လိုနေသေးလဲဟင်"

"သိပ်ပြီးစိတ်မပူပါနဲ့ ရုတ်တရက်သွေးပေါင်ချိန်ကျသွားယုံပါပဲ။ သားအမေမှာ ကြီးကြီးမားမားရောဂါမျိုးမရှိတာမို့အရမ်းကြီးစိတ်ထဲမထားနဲ့နော်"

အခုမှ ရင်ထဲကအပူလုံးကြီးဟာလျှောခနဲကျဆင်းသွားသည်။ မေမေတစ်ခုခုသာဖြစ်သွားခဲ့ရင် ကိုယ့်ကိုယ်ကိုဘယ်တော့မှခွင့်လွှတ်နိုင်လိမ့်မည်မထင်ပါ။

"ဟိုကောင်လေးများလား သား.."

"ဟုတ်ပါတယ် ဖေဖေ"

"အင်း...ကံကြမ္မာက ငါ့သားငယ်လေးအတွက်ရက်စက်လွန်းလှချည်ရဲ့ကွယ်"

ဘူဆန်မှပြန်လာပြီးသည့်နောက်ပိုင်း ခဏခဏ ဖေဖေ့ဆီမှာ သူ့အတွက်ဖုန်းကောလ်လေးဝင်နေမလားဆိုပြီး နေ့စဉ်မပျက်မေးခဲ့ဖူးသည်။ ထိုအချိန်တုန်းက ဖေဖေဟာဤသို့ဆိုခဲ့သည်။

"ငါ့သားက ဘူဆန်မှာသဘောကျတဲ့သူရှိလာပြီထင်တယ်"

အာ့လိုပြောတိုင်း တစ်ခါမှငြင်းဆန်ခြင်းမရှိပဲ အပြုံးနှင့်သာတုံ့ပြန်ခဲ့ဖူး၏။ ငယ်စဉ်အခါက သဘောကျခြင်းဆိုတာဟာ သူငယ်ချင်းဖြစ်ချင်တာဟုထင်မှတ်ခဲ့သော်ငြားလဲ နောက်ပိုင်းမှသိလိုက်ရသည်မှာ ချစ်ခြင်းတရားဆိုသည်, ထိုကောင်လေးဆီမှအရင်းခံ၍ပေါက်ဖွားလာခြင်းပင်ဖြစ်လေတယ်ဆိုတာကိုပါပဲ။