ဒေါ်စန္ဒာခင် စကားကြောင့် ထမင်းစားပွဲပေါ် ရှိနေသည့် ဟင်းအမယ်များကို နန်းယု တစ်ချက် ဝေ့ဝဲ ကြည့်လိုက်သည်။ နှာဖျားဝဆီ အချိန်ကိုက် တိုးဝင်လာသည့် သင်းမွှေးသော ဟင်းရနံ့များကြောင့် ခန္ဓာကိုယ်၏ ဆာလောင်မှုက ပိုမို အသက်ဝင်သွားသည်။
စားပွဲ အလယ်တွင် ဂတ်စ်မီးဖိုဖြင့် ခမ်းခမ်းနားနား တည်ခင်းထားတာက ငါးပေါင်း ဟင်းရည်။ ဟင်းရည်ထဲတွင် ကင်းမွန်နှင့် ရေဘဝဲပေါက်လေးများက ဟင်းခတ် အမွှေးအကြိုင်များနှင့် အတူ နစ်မြှုပ် ဝေ့ဝဲနေသည်။ အမယ် စုံလှသည့် ငါးပေါင်းပူပူကို စားဖွယ်ရာ ဖြစ်အောင် အရောင်အဆင်း စုံလင်စွာဖြင့် ပို၍ ပံ့ပိုးပေးနေသည်။ သူမ အကြိုက် မြန်မာ လက်ရာအတိုင်း ချက်ပြုတ် ပြင်ဆင်ထားသည့် ပုစွန်ဆီပြန်က ပန်းနုရောင် သန်းစွာ။ ကြီးမားသော ပုစွန်တုပ်ကြီးများက ချက်ချင်း နှိုက်မြည်းချင်အောင် ဆွဲဆောင်နေတော့သည်။
ကြက်သွန်များဖြင့် မြိုင်မြိုင်ဆိုင်ဆိုင် ကြော်လှော်ထားသော ဆိတ်သား ထောင်းကြော်က အပ်မှိုထောင်းသုပ် ပန်းကန် ဘေး၌ ငြိမ်သက်စွာ ရှိနေသည်။ ဆီ အိ၍ ပုံမှန်ထက် မွှေးကြိုင်နေသည့် ဆိတ်သား အမျှင်ကလေးများက ကြက်သွန်ဖတ်များထက် ပို၍ ရွှေရောင် တောက်နေသည်။ သေချာ ယှဉ်ကြည့်ပါက ကြွပ်ရွနေသည့် ကြက်သွန်များက လျော့နည်းနေပြီး ဆိတ်သားဖတ်များက ပိုပိုသာသာ များနေသယောင်ယောင်။
သူမ မစားဖူးသေးသည့် အပ်မှိုထောင်းသုပ်ကိုတော့ ကိုက်လန် အရွက်များနှင့် တွဲစပ် ဖန်တီးထားသည်။ အပ်မှိုပင်တွဲကလေးများက ပန်းကန်ပြား ဖြူဖြူထဲ အစုလိုက် အတွဲလိုက် ဖွေးဖွေးဥဥ။ အစပ်အဟပ် တည့်ပြီး အရသာ ရှိနေမည် ဆိုတာ မလွဲဧကန်။ တရုတ် ဟင်းအမယ်များ ဖြစ်သည့် မာလာ ကဏန်းပေါင်းနှင့် ဝက်သားလုံး ချိုချဉ်၏ ဆွဲဆောင်မှုကိုတော့ ပြောဖို့ပင် မလိုတော့။ မျက်စိ မလွှဲချင်အောင်အထိ စားပွဲထက် ချိုချိုမြိန်မြိန် ဝင့်ထည်နေတော့၏။
နန်းယု ချက်ချင်း သွားရည်ယိုသွားကာ ဗိုက်ထဲမှ တဂွီဂွီ ဟူ၍ အသံပါ မြည်သွားသည်။ သူမ ဗိုက်ဆာလှပြီ ဖြစ်သည်။
YOU ARE READING
SUN { Season 1 }
RomanceChoose me or Lose me ? I don't want to be your second CHOICE ! Start Date : 4th Feb 2022 End Date : 4th Nov 2022
Unicode - 72
Start from the beginning
