ချစ်သောပြည့်ရှင်မင်း(Completed)

Part 42 (final)

သံတော်ဆင့်ရဲ့အသံ ထွက်ပေါ်လာသည်။ကျက်သရေမင်္ဂလာအပေါင်းနှင့် ပြည့်စုံသည့်တံပိုးခရာသံက မရှေးမနှောင်းပင် ထွက်ပေါ်လာသည်။

နန်းစောရှင်နှင့်နန်းဒေဝီထိပ်ခေါင်က ဘေးချင်းယှဉ်လျက် နန်းရင်ပြင်အတွင်း ဝင်ရောက်လာသည်။ဗညားသတိုး နန်းစောရှင်ရဲ့ခံ့ညားလှသည့်စကြာဝတေးမင်းအသွင်အပြင်ကို ကြည့်ပြီးပြုံးလိုက်သည်။

နန်းစောရှင်သည် ရွှေအတိပြီးသည့်မကိုဋ်တော်ကို ဆောင်းထားသည်။ဆွတ်ဆွတ်ဖြူသည့်ပိုးကိုယ်ဝတ်ကို ဝတ်ထားပြီး ထိုအပေါ်မှ ရွှေ‌ဗောင်းစလွယ်ကြိုးကို လွယ်ထား၏။ကိုယ်ဝတ်ရဲ့ပခုံးတွင် အထက်သို့ကော့တက်နေသည့်ရွှေအဆင်တန်ဆာကို ဆင်ယင်ထားသည်။ငွေဖလားရောင် တောင်ရှည်ပုဆိုးပေါ်မှ ရွှေချိတ်လေးတွေကနန်းစောရှင် ခြေလှမ်း လှမ်းလိုက်တိုင်း တလက်လက်။လက်ကောက်ဝတ်ရှိ ရွှေအနားကွပ်လက်စည်းကလည်း‌ ရွှေအတိပြီးသည်။

နန်းစောရှင်ရဲ့မျက်နှာသည် ရွှေရောင်တောက်ပသည့်ဝတ်ရုံတော်ကြောင့် မှေးမိန်မသွားဘဲ ရွှေထက်ပင် လင်းလက်ဝင်းပနေသည်။နက်မှောင်သည့်မျက်ခုံးတွေက သုခမိန်တစ်ပါးလို ဖြောင့်စင်းနေပြီး ပိ‌ရိသေသပ်နီထွေးသည့်နှုတ်ခမ်းတစ်စုံက အာဏာရှင်ဆန်စွာ တည်တင်းနေသည်။

ဗညားသတိုး နန်းစောရှင်ကိုကြည့်ပြီး ရင်ထဲဂုဏ်ယူဝံ့ကြွားစိတ်များနှင့်အတူ ကြေကွဲဆို့နင့်မှုများပြည့်လျှံလာသည်။သူ ကိုယ်တိုင်ချစ်မြတ်နိုးစွာထုဆစ်ခဲ့သည့်အချစ်ကလေးသည် ပြည့်ရှင်မင်းတစ်ပါးဖြစ်လာချေပြီ။ကောင်းကင်နှင့်မြေကြီးကိုပင် ဘုန်းတန်ခိုးဖြင့် စေလိုရာစေနိုင်သည့်ပြည့်ရှင်မင်းတစ်ပါးဖြစ်လာပြီ။သို့သော် သူ့အပိုင် ဘယ်သောအခါမှမဖြစ်နိုင်တော့ချေ။

နန်းစောရှင်နှင့်သူ၏မိဖုရားသည် ရာဇဣန္ဒြေအပြည့်ဖြင့် တစ်လှမ်းချင်းလျှောက်လှမ်းလာသည်။နန်းစောရှင်၏ခြေတော်ရင်းမှ ဗညားသတိုးရဲ့နှလုံးသားသည် နန်းစောရှင်တစ်လှမ်း လှမ်းတိုင်း နင်းခြေခံရပြီး အစိတ်စိတ်အမြွှာမြွှာဖြစ်ကာ သွေးစိမ်းရှင်ရှင်ထွက်နေ၏။