مبادئ الكتابة

صدق... هاتصدق إن شاء الله 🤷‍♀️🤷‍♀️

كلنا بندخل السينما، أو المسرح أو حتى السيرك واحنا عندنا استعداد مسبق لتصديق معظم اللي بنشوفه...

لمدة ساعة او ساعتين بنصدق وجود السحرة ومصاصي الدماء والمستذئبين والأشباح والفضائيين والأكوان الموازية...

مبنسمعش عن حد دخل فيلم توايلايت وهو معترض على فكرة إن البطل مصاص دماء، مع إن المخرج عارف إننا عارفين إنه عارف إن لا وجود ليهم في الواقع... أو ع الأقل محدش لقى واحد لغاية دلوقتي... يمكن عشان بيقتلوهم ومبيسبوش شهود وراهم 👀👀

Willing suspension of disbelief دي ظاهرة اسمها

أو التعطيل الإرادي لعدم التصديق، مصطلح صاغه الشاعر كولريدج سنة ١٨١٧.

بمعنى... إنك بتعطل إحساسك بالواقع والحقيقة لمدة الفيلم أو المسرحية أو لغاية ما الساحر يخلص فقرته...

سواءاً هرباً من الواقع... أو حباً للخيال... أو لإتقان العمل الفني المقدم ليك...

ده مش معناه إن المشاهد أو القارئ هيبلعلك أي هبل هتكتبهوله! كمان افتراض الغباء أو السذاجة في جمهورك أسوء حاجة ممكن تخليهم ينفضوا من حواليك.

عشان كده لازم العالم اللي انت خلقته للمشاهد أو القارئ يكون فيه بعض المنطقية ومحدد بمعايير واقعية...

مثلاً...

كلنا في سلسلة أفلام توايلايت إعترضنا على إن إدوارد وجيك... الاتنين... وقعوا في غرام البطلة رأساً على عقب بدون مبرر، رغم إن محدش اعترض على كون واحد منهم مصاص دماء والتاني مستذئب!!!

في فيلم "Batman vs superman" من ضمن الاعتراضات اللي كانت عليه إن القتال ما بينهم انتهى بطريقة غير منطقية لما سوبرمان صرخ "مارثااا" وده صادف إنه إسم ام باتمان برضه "فإذ فجاة" باتمان افتكر إن سوبرمان ليه أم برضه وإنه عاش حياة البشر زيه ويمكن أكتر، لكن محدش اعترض إن الفيلم بيتكلم عن فضائي بقوة توازي قوة البشرية مجتمعة بيقاتل ملياردير مزاجه إنه يتنطط ما بين البنايات في جوثام بالليل!!!

زي بالضبط ماحنا معديين بمزاجنا حقيقة إن محمد هنيدي في فيلم عسكر في المعسكر كان وحيد أهله وبرضه دخل الجيش!!

"سمعاك يا نيرد ياللي هتطلع تقول كان عنده أخ اسمه حمد ومطلعش في الفيلم... عارفه... بس كده المثال هيبوظ!"

من أشهر أمثلة الظاهرة دي لما يكون الشخصيات بيتكلموا لغه المشاهد في حين إنهم بيقولوا لبعض إنهم بيتكلموا لغة تانية...

مثلاً في الأعمال الفنية اللي بتناقش فترة الاحتلال الانجليزي لمصر بنشوف الانجليز بيكلموا بعض عربي، وإمعاناً في الإتقان الفني بيكون عربي بلكنه انجليزيه "قال يعني كده الدقة قطعت بعضها!!!" وده بيكون سببه إن المخرج مش عايز يخسر اهتمام المشاهد لما يحشر حوارات بلغة ميعرفهاش في السيناريو وبيعتمد على كون المشاهد هيبلعله الشمهد عشان يكمل اندماجه في القصة!!!

ببساطة... إكتب واسرح واتخيل زي مانت عايز... بس متتجاوزش حدود العالم الخيالي اللي انت رسمته لنفسك!!!