Flying Gulls Never Land [ဘာသာပြန်]

59- I'LL THINK ABOUT IT

"Fuck ! မင်း သေချင်နေတာလား ?"

လက်အောက်ငယ်သားများက မည်မျှလောက်ပင် ကျီစယ်စနောက်ပါစေ ၊ ရှန့်မင်အော်ကား ဤအရာများအားလုံး သူနှင့်မဆိုင်သကဲ့သို့ တူညီသောမျက်နှာအမူအရာတစ်ခုတည်းကိုသာ ဆင်မြန်းထားလျက် ။ ရှန့်မင်အော်က မုသားဖော်စက်ကို ဖယ်ရှားလိုက်ပြီးလျှင် နေရာမှထကာ ဝရံတာတွင် ဆေးလိပ်သွားသောက်ဦးမည်ဟု ခွင့်တောင်းလျက် ထွက်ခွာသွားတော့သည် ။

ထွက်ခွာသွားသောရှန့်မင်အော်၏ပုံရိပ်ကို တစ်ချက်ကြည့်လိုက်ပြီးလျှင် ရှန့်မင်အော်နောက်မှ လုဖုန်းလိုက်မသွားတော့ဘဲ အခြားသူများနှင့်အတူ အချိန်ကြာကြာ အချိန်ဖြုန်းဖြစ်တော့သည်။ လုဖုန်းတစ်ယောက် ပထမဆုံးသောကစားပွဲမှာပင် ရှုံးနိမ့်သွားသည်ဖြစ်ရာ ၊ အပြစ်ပေးထိုင်ခုံဆီသို့ အခြားသူများအားလုံး၏ တွန်းပို့ခြင်းခံရသည်မှာ စိတ်လှုပ်ရှားဖွယ် ။

လုဖုန်း ကြုံရာနံပါတ်တစ်ခုကို ရွေးချယ်လိုက်ပြီးနောက် ၊ လျိုရွဲ့က ခေတ္တစောင့်ဆိုင်းကာ သူမဖုန်းမျက်နှာပြင်ထက်ပေါ်လာသောမေးခွန်းကို ဖတ်ပြလာတော့သည် ။

"ရှင့်ရဲ့ချစ်သူအတွက် နာမည်ပေးဖူးတဲ့အထဲမှာ ရိုမန့်တစ်အဖြစ်ဆုံးနာမည်?"

"ကျွန်မအထင် မေးခွန်းက ဒီထက်ပိုပြီးစိတ်ဝင်စားစရာကောင်းမယ်ထင်ထားတာ ၊ ဒါပေမဲ့ ဒီလောက်ပဲဆိုရင်တော့..."

လုဖုန်းကား ဆယ်စက္ကန့်သော အချိန်ကန့်သတ်ချက်ကို မကြောက်မရွံ့နှင့်ပင် နောက်ဆုံးသောသုံးစက္ကန့်အလိုမှာမှ အဖြေကို လွယ်လွယ်ကူကူပေးဖြစ်တော့သည်။

"ကျွန်တော့်ရဲ့အချစ်ကလေး"

ရှန်းရှောင်ရှဲကား သူ၏အဖြေကို သည်းမခံနိုင်သည်ဖြစ်ရာ လက်မောင်းများကိုပွတ်သပ်လျက် ထအော်လာတော့သည် ။

"ဒါကြီးက အရမ်းပိုလွန်းတယ်"

"အိပ်မက်တစ်ခုလို ဒီလိုအခြေအနေဆီ ပြောင်းလဲသွားမယ်ဆိုတာသိခဲ့ရင် ကိုယ်ဘာကြောင့် မျက်ရည်တွေကို ဒီလိုထိမ်ချန်ထားမလဲ..."

ဝူရိက ကာရာအိုကေမိုက်ကို နောက်တစ်ကြိမ်ပြန်လည်ဆုပ်ကိုင်လိုက်ပြီးလျှင် အစွမ်းကုန်အားထုတ်လျက် ခံစားချက်အပြည့်ဖြင့် သီချင်းစဆိုတော့သည် ။ သူ၏သီချင်းဆိုသံက လူအားလုံး၏ အာရုံကိုဖမ်းစားသွားခဲ့ပြီး ၊ အားလုံးက ကာရာအိုကေဆိုခြင်းအပေါ် အာရုံစိုက်သွားခြင်း​ကို မြင်လိုက်ရပြီးနောက်ဝယ် လျိုရွဲ့က ဂိမ်းဆော့ခြင်းကိုရပ်တန့်လိုက်တော့သည် ။