(((((((( كشف حساب )))))))))
#لولو_محمد
الحلقه ١١
يس يدخل و يايد النور و يقعد عالمكتب و يبدا يقرا الجواب اللى مكتوب و يبص فى القسيمه و يمسك التليفون
يس / الو ...ايوه يا ميرنا ازيك ... معلش انى بتصل بدرى كدا .... شكرا بصى انا عاوزك تجيبلى رقم واحد اسمه ابراهيم زيدان الكومى ....... ايوه هو .... ايوه عارف انه فى امريكا عاوز رقمه فى امريكا ايه صعبه .... اه اسمعى انا مش عاوز خالتو او بنتها او حتى امى يعرفوا اى حاجه عن الموضوع ده اتفقنا .... شكرا
يس يقفل و فجاه فريده تدخل
فريده / انا جايه اصالحك ممكن ادخل
يس / اتفضلى
فريده / انا مكنتش بتكلم عشان انا بكره همسه انا كنت خايفه على شكلنا قدام الناس
يس ساكت
فريده / مالك يابنى انت كويس شكلك تعبان و محتاج تنام اطلع نام و لما تصحى نبقى نكمل كلامنا
يس / ماما هو ايه اهم شكلنا قدام الناس و لا الحقيقه
فريده / انهى حقيقه يا بنى انت فى حاجه مضيقاك يا حبيبى لو فى اى حاجه فى قلبك قولى انا مامى حبيبتك و محدش هيسمعك او يساعدك قدى
الخدامه تدخل / يس بيه الظابط احمد بره
فريده / عاوز ايه تانى مش فاهمه
يس / انا رايحله
.....
فى الهول
احمد / اهلا يس بيه ياريت انسه همسه بقت احسن و تقدر تدينا المعلومات اللى محتاجينها
يس / للاسف همسه مش هتقدر تفيدكم بحاجه
احمد / ازاى
يس / كانوا رابطينها فى اوضه طول الوقت و كانوا مغطين وشهم و مشافتش اى حاجه و لا تعرف كانت فين
احمد / طب ممكن لو سمحت على الاقل يعنى تناديها يمكن تكون افتكرت اى حاجه زياده
يس / ثوانى حاضر
يس يطلع ينادى همسه
..........
فى اوضه همسه
يس / انا قولتله انك ما شوفتيش حاجه و انهم كانوا مغطين وشهم طول الوقت و رابطينك طول الوقت لحد ما نشوف الحكايه دى هتوصلنا لايه
همسه / ماشى يا حبيبى شكرا
يس / على ايه
همسه / انك هتنفذ وعدك و تدور على الحقيقه
يس / انا متاكد ان الحقيقه دى مش هتوصلنا لحاجه بس بريح ضميرى و بريحك
همسه / انا نازله بقى للظابط ده
.....
فى الهول
احمد / اهلا همسه هانم
همسه / نادينى همسه من غير هانم عادى
احمد / ياريت لو حضرتك افتكرتى اى حاجه عن الخاطفين اى صوت اى معلومه مهما كانت تافهه هتكون طرف خيط نمشى وراه
همسه / هما كانوا لابسين الخوز اول ما خطفونى و لما العربيه بدات تتحرك غموا عنيا و بعدين فضلوا سايقين كتير و لما العربيه وقفت خدونى و ربطونى على سرير فى اوضه و شالوا الغمامه الاوضه كانت مبهدله و الشباك كان عليه خشب و كنت بفضل مربوطه طول الوقت و كانوا بيفكوا الحبل بس وانا رايحه الحمام او باكل و ساعتها بيبقوا مغمين وشهم و معاهم مطاوى فكنت بسمع الكلام
احمد / يعنى ما سمعتيش اى اصوات مميزه حوالين المكان
همسه / لا كاننا كنا فى صحرا مكنش فى اى اصوات و الاوضه كانت مقفوله عليا طول الوقت و لا تليفزيون و لا موبايل و لا اى حاجه منتهى الملل حتى الاكل كان فول و طعميه و يوم ما بيحنوا عليا بيجيبوا ساندوتشات كفته
احمد / طب لما كانوا بينادوا بعض
همسه / ما كانوش هو واحد بس اللى كان بيدخل و يفضل موجود لحد ما اخلص و يطلع ما سمعتش اى حاجه بس بجد بتمنى تقبضوا عليهم
احمد / ماشى شكرا و حمدالله على السلامه
يس / نورتونا
احمد / انا مش عاوز اديك امل كاذب مفيش اى خيط نمشى وراه المكان اللى العربيه ركنت فيه ما كانتش ولا كمره مغطياه الصور من كاميرات المول لهمسه بتمشى لوحدها و بتقعد فى المكان اللى لقيناها فيه بمنتهى الهدوء
يس / هى حكتلى انهم قالولها انهم مراقبينها و لو عملت اى حركه غير اللى قالولها عليها هيضربوها بالنار
احمد/ على كل حمد الله على سلامتها
يس / بالنسبه للقضيه انا مش فارق معايا الفلوس على قد ما انا فرحان برجوعها سليمه و شكرا على تعبك معايا الفتره اللى فاتت
احمد / عن اذنك
احمد يمشى و تليفون يس يرن
يس / الو ... ايوه يا ميرنا تمام تمام طب بقولك ايه احجزيلنا تزكرتين على اول طياره فى اسرع وقت و اتصلى بيه و حدديلى معاه معاد .... تمام تمام واحده ليا وواحده لهمسه هتكون لمين يعنى ..... ياخبر نسيت خالص على كل خلصى الموضوع ده و بلغينى يلا سلام
همسه / خير فى ايه
يس / عاوزك تخلصى باسبورك فى اسرع وقت عشان هنسافر امريكا نتكلم مع ابراهيم زيدان زى ما طلبتى
همسه / انت احسن واحد فى الدنيا و انا بحبك قد السما و الارض و قد النجوم و السكر و الشيكولاته و كل الحاجات الحلوه اللى فى الدنيا
يس / ههههههههههههه كل ده لا انا كدا هتغر فى نفسى بقى
همسه / انا كنت عارفه انك مش زى ما قالوا عنك انا كنت متاكده انك اروع و احسن واحد فى الدنيا
فريده / خير ما تفرحونى معاكوا
يس / انا بقول هنسافر امريكا يومين كدا نغير المود و ننسى اللى حصل الاسبوع اللى فات
فريده / دا وقته برده
يس / انا وعدت همسه انى هنسيها الاسبوع اللى عدى و اللى شافته فيه
فريده / و ايه فايده الكلام اصلا اعملوا اللى يريحكم
فريده تطلع اوضتها و تمسك الموبايل
فريده / ايوه يا هاله .....ايوه للاسف رجعت مش عارفه مش كانوا موتوها وخلصونا حاجه بجد لا تطاق و ما تتخيليش راجعه ملكه .... المهم هنرجع لخطتنا القديمه .... انا عارفه انى لما وقفتك ضيعت وقت طويل بس كنت فاكره انها جت من عند ربنا وخلصنا منها..... تمام تمام ..... يلا باى
همسه تدخل
همسه / ممكن ادخل
فريده / هاه ... طبعا اتفضلى خير
همسه / يس قالى قد ايه كنتى قلقانه عليا و بصراحه ...
فريده / بطلى تمثيل يس مش معانا
همسه / انا بمثل !! ليه يعنى ؟ على فكره انا بجد
فريده / قولتلك هاتى من الاخر انا مش فضيالك
همسه / انتى ليه كرهانى اوى كدا
فريده / بصى يا همسه الفلوس بتروح و بتيجى و صدقينى هى اخر حاجه تهمنى احنا اللى بنعمل الفلوس احنا الاشخاص الصح
همسه / اشخاص صح
فريده / امممممم هفهمك مع انى هبقى بضيع وقتى بس حظك حلو انا فاضيه بصى الناس مش زى بعض فى ناس فوق و ناس تحت الناس اللى فوق كل الابواب بتتفتحلهم اما انتى و اللى زيك فمن اللى تحت انا عارفه كويس انك بتحلمى تكونى مننا بس ده مش فى مصلحه يس يعنى تخيلى لو يس اتجوز بنت وزير او بنت رجل اعمال كبير اكيد ابواب اكبر هتتفتحله لكن انتى هتقدميله ايه
همسه / فهمت انتى معاكى حق فى كل اللى قولتيه بس هو بيحبنى انا تخيلى لو اتجوز بنت وزير و كل الابواب اتفتحتله بس للاسف باب قلبه فضل مقفول فساعتها ممكن يخون مراته مع واحده فقيره او ممكن كمان يتجوزها عرفى و ساعتها بنت الوزير هتضايق كتير و ممكن تعمله مشاكل بالهبل
فريده / خيالك واسع اوى يا همسه
همسه / انتى طبعا ادرى منى ما انتى بنت الوزير و عارفه جواز المصالح بيبقى عامل ازاى
فريده / هاتى من الاخر انتى عاوزه ايه
همسه / يس بيحبنى سواء رضيتى او لا بيحبنى و الدليل قدامك دفع عشره مليون عشان يخلصنى
فريده / هههههههههههههههههه انتى بجد طيبه اوى انتى متخيله ان العشره مليون دى فلوس يا حبيبتى فوقى يس دفع الفلوس دى عشان ما بيقبلش الهزيمه و العيال دول يس هيوصلهم و ساعتها هيرجع فلوسه كلها و على كل اللى حصل كلو كان فى مصلحتنا
همسه / فى مصلحتكوا
فريده / طبعا انتى ما شوفتيش الاخبار و لا ايه اسم عيله بدران بيتقال فى كل حته و شهرتنا زادت و بكدا فى ابواب اكتر اتفتحتلنا
همسه / انا بلغتك و عملت اللى عليا
فريده / ماشى يا همسه و شكرا انك بلغتينى اتفضلى
..........
بعد كام يوم
يس / ها جاهزه للسفر
همسه / اكيد انا اصلا متحمسه جدا للمقابله دى
يس / ما تعشميش نفسك اوى لانى واثق ان كل ده تخاريف
همسه / و مدام واثق اوى انها تخاريف مكلف نفسك فلوس و مسافر ليه
يس / عشان اثبتلك انه عيل نصاب
همسه / لا عشان تثبت لنفسك انه كداب
يس / و طبعا عشان اثبت لنفسى دى سمعه ابويا يا همسه الله يرحمه كان راجل طيب اوى و كل اللى اتعامل معاه قال كدا ازاى واحد خير بالشكل ده كان بيضحك على البنات بالطريقه دى والدى الله يرحمه كان دايما يقولى ان ربنا هيحاسبنا على الناس الفقيره و كان بيتبرع بنسبه كبيره من الارباح للجمعيات الخيريه و دور الايتام و المسنين و كان بيعمل عرس سنوى للايتام على حساب الشركه
همسه / انا ما قولتش كدا بس يمكن فى روايه تانيه للقصه يمكن فى حلقه مفقوده لو عرفناها هنفهم كل حاجه
يس / انا واثق ان الواد ده كداب و لعلمك انا يوم ما هحط ايدى عليه هنسفه
همسه / ولو طلع ما بيكدبش هتعمل ايه يا يس هتعمل ايه
يس / ساعتها هبقى افكر مع انى واثق ان ساعتها مش هيكون فيا دماغ افكر من صدمه عمرى
همسه / هتثبت الحقيقه و تديله حقه فى الورث و لا هتحافظ على سمعه العيله و تكتم الحق
يس / انا هتجنن انتى بتتكلمى كانك متاكده انه ما بيكدبش
همسه / انا طول عمرى بمشى ورا قلبى و عمره ما خذلنى الواد ده حياتى كانت تحت رحمته و ما حاولش ياذينى و لو مره
يس / لان حياتك تساوى ملايين يا حبيبتى لو كان اذاكى
همسه / يعنى لو كان عمل فيا حاجه كنت هتعرف منين كنت موجود تحمينى كنت موجود يعنى
يس / يا حبيبتى الحمد لله مفيش اى حاجه حصلت و ادينا مسافرين و هنتكلم مع عموا ابراهيم و هيثبتلك ان كل اللى اتقال كان كدب و هتشوفى
همسه / قول يارب انا طالعه انام عشان اصحى بدرى للطياره
يس / ماشى تصبحى على خير
همسه / انا بحبك اوى يا يس
يس / و انا كمان بحبك اوى يا روحى و مستعد اعمل اى حاجه عشانك لازم تبقى عارفه كدا كويس
همسه / صحيح عملت ايه فى موضوع الواد ده
يس / قسيمه الجواز مش متسجله يعنى عند الحكومه ما لهاش اساس عشان كدا اخدتى التاشيره بسهوله
همسه / مش فاهمه
يس / بصى قسايم الجواز لازم تتسجل و تتحفظ عند الحكومه امال بيتعمل منها اربع نسخ ليه
همسه / يعنى انا مش متجوزه
يس / انتى عبيطه ولا ايه اصلا الجوازه دى باطله انتى ما وافقتيش و الورقه اللى معاه يبلها و يشرب ميتها
همسه / طب لو سجلها
يس / ساعتها هوصله و هقتله و برده يبقى يبل الورقه دى و يشرب ميتها
همسه / ما بهزرش
يس / انتى فكراه عنده الشجاعه انه يسجلها اصلا يابنتى فوقى دا زمانه خد الفلوس و استخبى تحت الارض ماتقلقيش انتى من حاجه طول ما انا معاكى ما تخافيش من اى حاجه
همسه / طب افرض سجلها بعد جوازنا ساعتها انا هتحبس عشان متجوزه اتنين
يس / ياربى عليكى خلاص لو ما سجلهاش لحد ما نرجع هبقى اتصل بالظابط احمد و هحكيله انهم اجبروكى انك تمضى على قسيمه و نشوف هنعمل ايه خلاص اهدى بقى و اطلعى ارتاحى
همسه / انا بجد بموووووت فيك يلا تصبح على خير
يس / و انتى من اهله
..........
فى فندق فى امريكا
يس / ايه رايك بقى يا ستى
همسه / دا ولا الخيال بجد الاوضه تهبل
يس / انا بس مش فاهم ليه ما رضيتيش ننزل فى شقتى و صممتى ننزل فى فندق
همسه / خلى شقتك لما نتجوز ياما هنزهق منها لكن دلوقت لازم كل واحد يبقى فى اوضه لوحده
يس / انتى مش واثقه فيا صح
همسه / انا ما قولتش كدا و ما تحورش الكلام انت كبير و عارف الصح من الغلط مش معنى اننا فى امريكا نبقى امريكان المهم تعرف ان دى اول مره اسافر فى اى حته او اركب طياره ما كنتش متخيله ان السفر متعب اوى كدا اتفضل على اوضتك بقى و سبنى انام
يس / تنامى ايه احنا جايين هنا نتفسح يلا فضى شنطتك و اتظبطى كدا عشان مرتبلك فسحه العمر
همسه / بجد فين
يس / انتى رغايه اوى يا بت انتى يلا نص ساعه و تبقى جاهزه
همسه / هو معادك مع الراجل امتى
يس / بكره الساعه تلاته ليه
همسه / بتاكد بس يلا اطلع بره بقى
يس / حاضر حاضر دا انتى مشكله
...........
يس و همسه يتفسحوا و تانى يوم الساعه اتنين و نص
همسه / انت عارف انى ما نمتش من امبارح
يس / للدرجادى
همسه / طبعا انت متخيل انا بقالى قد ايه مستنيه اللحظه دى
يس / بقالك قد ايه انتى بقالك قد ايه تعرفى عن الموضوع ده اصلا
همسه / ههههه ايوه ايوه ما هو ده اللى انا اقصده من لحظه ما عرفت و انا مستنيه اليوم ده اللحظه اللى هنعرف فيها الحقيقه و نكتشف كل اللى استخبى من سنين
يس / انتى شربتى حاجه من التلاجه اللى فى اوضتك ازازه كدا يعنى تكون بالصدفه البحته شبه ازايز الخمره اصلك شكلك مش طبيعى
همسه / ظريف اوى حضرتك انا بتكلم جد دا موقف خطير موقف حياه او موت انت ازاى واخد الامور على اعصابك كدا و بارد و كانك تلاجه
يس / عشان انا واثق ان كل ده كدب
همسه / تانى !! انا تعبت فى الكلام فى الموضوع ده
يس / خلاص وصل اهدى بقى دلوقت هتعرفى بنفسك
شخص كبير يدخل
يس / اهلا وسهلا استاذ ابراهيم اعرفك خطيبتى همسه
ابراهيم / اهلا وسهلا انت مش متخيل يا يس انا حاولت اتكلم معاك كام مره بس للاسف كنت بتتهرب منى كتير
يس / ههه اسف الحقيقه كنت متخيل انك يعنى عاوز فلوس اصل سمعتك فى العيله انت اكيد عارف
ابراهيم / لا انت اللى اكيد عرفت و الا ما كنتش اتصلت بيا
يس / عرفت ايه بالظبط
ابراهيم / امال انت طلبت تقابلنى ليه
همسه / تعرف ايه عن واحده اسمها سحر سامى
ابراهيم / الله ما انت عرفت امال بتسال ليه
همسه تبص ل يس
همسه / ارجوك قولى كل اللى تعرفه عن الموضوع ده
ابراهيم / والله مش عارف ابتدى منين انا و سعيد كنا اكتر من الاخوات الحقيقه كان فى بينا حاجات كتير اوى مشتركه للاسف اننا اتجوزنا مصلحه انا كنت يادوب مساعد مخرج على قدى و ميرفت كانت فرصه انها تفتح كل الابواب المقفله و بمعارفها كنت هتعرف على منتجين و اتشهر و سعيد كان مهندس ديكور على قده و فريده هى اللى ساعدته انه يكبر مكتبه لشركه و يوصل للى هوه فيه
همسه / ياريت تدخل فى الموضوع
ابراهيم / هوه ده الموضوع لانا و لا هو كنا سعده اصل جواز المصلحه ده اسوء اختراع فى الدنيا المشكله الكبيره بقى لما تقابل بنت و تحبها اوى ازاى تقدر تقول للناس انك بتحبها و انت متجوز
يس / انا بدات ازهق
ابراهيم / سعيد جالى فى يوم و حكالى قد ايه هو بيحب بنت عنده فى الشركه و حزرته كتير انه مل ينفعش يقرب منها و ان فريده لو عرفت اكيد مش هيحصل كويس ابدا بس الحب بقى ما بيعرفش الحركات دى
يس / انت بتحاول تقول ايه ان بابا كان على علاقه بواحده غير ماما
ابراهيم / علاقه لا طبعا دا اتجوزها بعقد جواز رسمى وماذون وانا كنت واحد من اللى شهدوا على العقد
همسه / شوفت انا قولتلك انت ما كنتش مصدق ارجوك احكى كل حاجه بالتفصيل
ابراهيم / اياميها كان فى مشاكل كبيره بينى و بين ميرفت و كنا اتفقنا على الطلاق و طبعا كتبت كل ما املك لبنتى هايدى و قدمت على قرض كبير عشان انتج لنفسى فيلم و ابدا من الصفر
يس / ارجوك ركز فى حكايه جوازه بابا
ابراهيم / ما انا بحكى اهو ارجوك ما تستعجلش و اسمعنى انا طلقت ميرفت لانى اتجوزت عرفى من ممثله شابه و طبعا ميرفت ما قبلتش ده على كرامتها فكان احسن عقاب ليا هو انى ابدا من الصفر تانى و مش بس كدا لفقت للبنت المسكينه تهمه و حبستها لكن سعيد كان اذكى كان عارف انه لو سجل القسايم فريده هتعرف زى ما ميرفت عرفت فما سجلش القسايم فى المحكمه و بكدا فضل جوازهم فى السر فتره بس برضه فريده حست و لما واجهته للاسف اعترف كان ممكن ينكر و يتقمص او يعمل اى حاجه بس اعترف ما شوفتش اغبى من كدا
يس / كفايه اوى هبل انت جاى تسرح بينا عن اذنك
همسه / استنى يا يس ... و بعدين
ابراهيم / فريده كانت بتحبه اوى و قالتله انها هتسامحه بشرط انه ينساها و يبعد عنها فوافق لان ده طبعا لمصلحه سحر لو فريده عرفت توصلها كانت اكيد هتاذيها زى ما حصل معايا فقالها انها ورقتين عرفى و قطع ورقه قدامها و وعدها انه مش هيكرر ده تانى ايامها كان فى صفقه مهمه فى تركيا كان فى شركه تركيه هتبنى منتجع فى مصر سبحان الله فى الوقت ده حصلت مشكله و كان لازم يسافر بنفسه و لما رجع اكتشف ان سحر عزلت من البيت هى و الجيران و لما سال عرف ان فى ناس اتهجموا عليها كان عارف انها اكيد فريده قلب الدنيا عليها و للاسف ما عرفش يوصلها و كان هيتجنن لان الجيران قالوله انها كانت حامل
يس / انا مش قادر اصدق
ابراهيم / كل ده مكتوب بخط ايد سعيد فى جواباته اللى بعتهالى فريده عرفت ما اعرفش ازاى ان سعيد اتجوز و عرفت انى كنت شاهد على العقد سعيد حلفلى انه ما قالهاش حاجه و ان الورقه اللى قطعها قدامها كانت ورقه هبله مش قسيمه اصلا و مكنش كاتب فيها اسم سحر بالكامل عشان ما تعرفش توصلها
همسه / انا توهت منك
ابراهيم / من الاول ... سعيد كان بيحب سحر جدا و سافر شغل رجع ما لاقاهاش و مش بس كدا كانت حامل و البنك لاسباب مش مفهومه قرر يحبسنى و الا ارجع القرض طبعا انتى فاهمه ليه
يس / عشان شهدت على العقد
ابراهيم / مظبوط فهربت على امريكا و سعيد كان بيبعتلى جوابات ما كانوش اخترعوا الوسايل الحديثه بتاعه اليومين دول هههههههههه
همسه / كان حكيلك فيها عن ايه الجوابات دى
ابراهيم / اتفضلى انا احتفظت بيها كلها كان موصينى انى اوصلها ل يس فى يوم من الايام و صدقينى حاولت بس البيه كان بيتهرب منى
همسه تاخد الجوابات من ابراهيم
ابراهيم / سعيد كان حزين اوى كان بيحكيلى انه كل ما بيشوف طفل بيشحت فى الشارع كان بيموت من الرعب انه يكون ابنه فبدا بكفل دور ايتام بالكامل و يساعد الفقره عشان ربنا يساعده و يدله على طريق ابنه اللى هو اصلا لا عارف اراضيه و لا عارف ان كان عايش و لا ميت
همسه تبدا تعيط /عن اذنكوا انا تعبانه اوى لازم اطلع اوضتى
يس / انا متشكر اوى عن اذنك
ابراهيم / انت عرفت الحوار ده منين ما هو مستحيل امك تكون حكتلك حاجه انت قابلت سحر او ابنها
يس يسيب ابراهيم و يطلع ورا همسه من غير ولا كلمه
.........
KAMU SEDANG MEMBACA
كشف حساب بقلم / لولو_محمد (كامله)
Romansaيعود رجل الأعمال يس من الخارج ليكتشف ان لوالده المتوفى ماض عاد ليفسد عليه حياته
