كشف حساب بقلم / لولو_محمد (كامله)

الحلقه ٨

((((((( كشف حساب )))))))
#لولو_محمد
الحلقه ٨
محمود / اللحق يا مصطفى دا يس
همسه تسمع تطلع تجرى
مصطفى / اتفرجى على حبيب القلب والله شكله يصعب عالكلب
همسه / دا برقابتك
يس فى التليفزيون / اى حد عنده اى معلومه عن همسه او عن الخاطفين ياريت يبلغنى و دى جايزه اتنين مليون جنيه كاش مقابل اى معلومه صحيحه عنها
محمود / مكنش الحوار ده فى خطتنا
همسه / دلوقت مصر كلها بتدور عليا و قريب قوى كلكم هتبقوا فى السجن يا شويه بهايم
مصطفى / تصدقى معاكى حق  المحروس قرر انه يدفع فاى معلومه عنك اتنين مليون انا بقى هبعتك ليه اتنين مليون حته
همسه تجرى على الاوضه جوه و مصطفى يقوم يجرى وراها تدخل الاوضه و تقفل الباب
همسه / لو قربت منى يس هيقتلك
مصطفى يزق الباب همسه تقع فى الارض
همسه / انت هتعمل ايه
مصطفى يطلع مطوته و همسه تقوم تطلع على السرير و تجرى على الناحيه التانيه
محمود / استنى اما كريم يجى يا مصطفى و نشوف هنعمل ايه
التانى / اهدى يا مصطفى
مصطفى / انا قولت كلمه امسكوها 
همسه تحاول تجرى يمين و شمال و تصرخ و ما تعرفش و يمسكوها و ينيموها على الارض و مصطفى يمسك ايدها و يثبتها كويس
مصطفى / ما تخافيش انا هقطع بس الصابع الصغير مش بتحتاجيه فى حاجه
همسه تصرخ / سبونى يا حيوانات لااااااااا
فجاه كريم يدخل و يشد مصطفى و يزنقه فى الحيطه
كريم / هو انا خلاص ما عادليش راى فى اى حاجه بتحصل و لا ايه انت بجد كنت بتتصرف من دماغك
مصطفى / شوفت البيه عامل ايه دا حاطت جايزه اتنين مليون جنيه لاى معلومه
كريم يقوم همسه و هى قاعده فى الارض عماله تعيط
كريم / روح نادى الماذون و انتوا الاتنين جهزوا بطايقكوا
مصطفى / مش فاهم
كريم / اسمع اللى بقولك عليه و انت ساكت و حسابنا بعدين على اللى كنت هتعمله
مصطفى يمشى و محمود و التالت يطلعوا بره
همسه عماله تعيط
كريم / انا اسف اوى على اللى حصل اوعدك انه مش هيتكرر تانى
همسه و هى بتعيط / انا لو منك اموتنى لانى يوم ما هرجع من هنا مش هسكت الا لما تتعدموا كلكوا انت سامعنى
كريم / انا متاكد انك بتقولى كدا من ورا قلبك
كريم يمسك شطنه همسه و يطلع منها المحفظه
كريم / ياريت تبقى بنت شاطره و مؤدبه و ما تعمليش مشاكل لما الماذون يجى يا عروسه
همسه / انت اكيد شارب حاجه عروسه ايه و ماذون ايه اللى هيجى
كريم / انتى فاكره نفسك طالعه رحله انتى مخطوفه و اوعى تفسرى معاملتى الحلوه انها ضعف انا بس مش عاوز اوريكى قلبتى بدرى لانها وحشه اوى
همسه / معاملتك الحلوه انت حابسنى و بتربطنى بالحبل و بدخل الحمام بمعاد و باكل بمعاد و عايشه فى رعب و تقول معامله حلوه
كريم / بصى اخر كلام عندى لو عاوزه تحافظى على نفسك هنا هتمضى بالزوق و من غير شوشره
همسه / اقتلنى اسهل
كريم / هبسطهالك اختارى انا او مصطفى معاكى فى اوضه واحده قدامك لحد الماذون ما يجى تحسبيها
همسه / حتى لو مضيت جوازنا هيبقى باطل لانه غصب
كريم / انتى متخيله انى ممكن ابصلك بصى لنفسك انتى واحده ساطحيه و ماديه و تافهه
همسه / انت ما تعرفنيش اصلا عشان تحكم عليا ماشى
كريم / اربع شهور بس من يوم ما عرفتى يس حبيتيه و لا حبيتى فلوسه
همسه / دى حاجه ما تخصكش و انت خاطفنى ليه عشان خاطر سواد عيونى و لا عشان خاطر الفلوس و فى الاخر انا اللى ماديه
صوت بره / يارب يا ساتر
كريم / لاخر مره اى حركه شمال مش هتكون نتيجتها موتك لا اسوء بكتير
همسه / حيوان
كريم يفتح المحفظه
كريم / دا انتى مجهزه الصور كمان اهو يلا على البركه عن اذنك
كريم يطلع بره و همسه تفضل رايحه جايه تغلى رايحه جايه و فجاه كريم و مصطفى و محمود يدخلو و معاهم الدفتر
كريم / امضتك الكريمه
همسه تبصلهم و تبص للدفتر بغضب
كريم / افهم من كدا انك اخترتى مصطفى تمام تمنياتى بليله سعيده يلا يا محمود هات الدفتر و تعال يلا
همسه تجرى على الدفتر و تمضى
همسه / انا بكرهك
كريم / ربنا يخليكى ليا يا حياتى و هنا كمان
همسه تمضى
كريم /و هنا
همسه تبصله
كريم /معلش هانت
همسه تمضى و تبصم
مصطفى / الف مبروك يا عروسه عقبال البكارى
همسه / شويه بهايم
كريم و مصطفى يطلعوا بره و همسه تترمى على السرير و تتفلق عياط لحد ما تروح فى النوم الصبح كريم يدخلها و يصحيها
كريم / همسه ...همسه
همسه تقوم مفزوعه / ابعد ... ابعد انت عاوز منى ايه ابعد
كريم / اهدى اهدى انا مسافر اسكندريه و راجع على طول اجيبلك حاجه و انا جاى
همسه / انت بتتكلم جد
كريم / ايوه مسافر اكلم المحروس
همسه / هو التليفونات هنا مقطوعه
كريم / هههههههههههه لا بس تمويه
همسه / انت هتسافر و تسيبنى مع دول لوحدى
كريم / بجد !!! شكرا
همسه / مش فاهمه
كريم / ايه انا فهمت انك بتفضلى انك تكونى معايا عن معاهم
همسه / ازفت من ستى الا سيدى
كريم / اه... شوف و انا اللى فهمت ...طيب الفطار جنبك انا مش هتاخر
كريم يمشى و همسه تاكل و مفيش عشر دقايق و مصطفى يدخل
مصطفى / لو عاوزه الحمام اتفضلى عشان هننزل
همسه / ما تنزل اعملك ايه
مصطفى / من الاخر كريم مشى و انا مش طايقك فا خفى تعومى ماشى يلا بدل قسما عظما اربطك و ابقى اعمليها على روحك ماشى
همسه / ربنا ياخدكوا
همسه تقوم تدخل الحمام و ترجع مصطفى يربطها
همسه / ما تقطعها اسهل بالراحه ايه الغل ده
مصطفى يمشى
..........
بعد العصر بشويه
همسه رايحه فى النوم و كريم يدخل يحط كيسه على الكمودينو جمبها و يغطيها همسه تصحى مفزوعه
كريم / اهدى دا انا
همسه / كلمته
كريم / ايوه
همسه / و هو كويس
كريم / خايفه عليه اوى
كريم يفك الحبل
كريم / انا جبتلك الكريم ده عشان الزراق اللى فى ايدك
همسه / لا والله كتر خيرك ما قولتليش هو كويس
كريم / زى القرد فكرى فى نفسك الاول
همسه / الحمد لله
كريم / جبت هريسه تاكلى
همسه / لا شكرا
كريم / دى حلوه اوى و لا خايفه تطخنى سى يس بتاعك ما يرضاش يبصلك
همسه / انت ليه بتكلمنى كدا طول الوقت
كريم / ازاى
همسه / ولا حاجه انت هتفضل قاعدلى كدا
كريم / انتى بتتعاملى معانا ولا كانك مخطوفه
همسه / قال ضربوا الاعور على عينه
كريم / للدرجادى
همسه / المفروض انتوا اللى تخافوا على فكره
كريم / من البوليس و لا يس
همسه / الاتنين
كريم / لا انا هقولك بقى القسيمه اللى معايا معناها انك انتى نصبتى على حبيب القلب و سرقتيه و انا ما كنتش اعرف اى حاجه و كنا بنحب بعض و هربتى منه و اتجوزتينى يعنى لو على البوليس انتى اللى المفروض تخافى
همسه / يا سلام
كريم / وحياه عبد السلام اما بقى سى يس فصدقينى المفروض هو اللى يخاف منى لان ليا عنده تار قديم
همسه / تار ايه ده
كريم / مش وقته المهم الكيس ده فيه غداكى لو جعانه كلى انا هقفل الباب بالمفتاح و قاعد بره لو عوزتى حاجه ندينى
همسه / طب ممكن اروح الحمام الاول
كريم / اتفضلى معالى الكونتيسه
همسه تبصله بقرف
.......
بالليل
كريم يدخل على همسه الاوضه و فى ايده طبق فيه ساندوتشات
كريم / العشا
همسه / فول و طعميه تانى انا بطنى نشفت و زهقت مش واكله انا انام خفيف ارحم
كريم / احنا اسفين معاليكى المينيو مش عاجب سموك احنا اسفين جدا اصل الطباخ الهندى واخد اجازه و الطباخ الايطالى مراته بتولد فقاعد جنبها
همسه / انت بتالس عليا
كريم / ان كانت بطنك نشفت من الاكل ده من يومين فاحب افوق حضرتك هو ده اللى عندنا زى ما انتى شايفه احنا اربع عزاب مفيش حد يطبخلنا فعايشين على اكل الشوارع بصى عاجبك كلى مش عاجبك نامى خفيف ووسعى انا داخل انام
همسه / هتنام فين
كريم / ضهرى واجعنى و للاسف ما عندناش غير سرير واحد و حضرتك محتلياه
همسه / كمان يعنى لا اكل و لا نومه
كريم / رسمى انتى مراتى
همسه / قسما بالله لو قربتلى
كريم / ههههههههههههه لا ما تخافيش انتى اصلا ما تمليش عينى
همسه / ايه ؟؟؟
كريم / من قال ايه سمع
همسه / طظ فيك على فكره
كريم / دا من ادبك
همسه / انت لا تطاق بجد يارب تموت
كريم / اخص عليكى عاوزه تترملى بدرى اوى كدا
كريم ينام على طرف السرير الناحيه التانيه من ما همسه  قاعده و يتغطى
همسه / انتوا مش هتربطونى
كريم / لا نامى
همسه تفضل قاعده على طرف السرير شويه و شويه و تتحرك فى الاوضه يمين و شمال كريم ما بيتحركش تفتح الباب و تطلع تلاقى مصطفى نايم على الارض فى الصاله تبص يمين و شمال و تقرب من الباب و لسه هتفتحه كريم يمسك ايدها
كريم / هشش من غير صوت خشى على الاوضه
همسه بزهق تدخل
كريم / انتى بجد كنتى بتفكرى تفتحى الباب تخيلى لو كنت نايم بجد و مصطفى صحى انتى بجد فى عقل عندك جوه و بعدين ما بصيتيش ان فى اتنين مش موجودين محمود و محمد سهرانين بره انتى اكيد بتهرجى
همسه / يووووووووه انا قرفت اوعى
همسه تنام على الطرف و كريم يقفل باب الاوضه و يروح ينام على الطرف التانى و كل واحد مدى للتانى ضهره همسه تسرح شويه و بعدين تضير تلاقى كريم مديها ضهره تنفخ و تفضل تفرك فى السرير و هو و لا بيتحرك و بعدين تقوم تقعد و تتمشى فى الاوضه و برده هو و لا بيتحرك و ترجع تقعد على السرير و تكح و تكح و تكح كريم يقوملها
كريم / المفروض ان يس يبعتلى جواب شكر لو كانت دى فكرتك عن النوم او حتى الراحه بس انا منتظر ايه من واحده طول اليوم نايمه فى السرير
همسه / مش عارفه انام و انت هنا
كريم / معلش استحملينى و لو قالقك و جودى اوى كدا امال لو كنت رابطك كنتى هتعملى ايه
همسه تقعد على السرير
همسه / انا بكرهك
كريم / اكرهينى فى صمت عاوز انام
كريم ينام و همسه تفضل صاحيه لحد ما تروح فى النوم و هى قاعده و تصحى تانى يوم و كريم بيحط طبق جنبها
همسه / احنا امتى
كريم / الفطار فطير و عسل و طحينه يارب يعجبك
همسه / شكرا انا جعانه اوى
كريم / ممكن افطر معاكى
همسه / اتفضل
كريم يبدا ياكل الطروف الناشفه من حوالين الفطيره و يسيب القلب الطرى
همسه / انت مبتاكلش القلب ليه دا احلى حته فى الفطيره
كريم / انا لاحظت انك مش بتاكليه فقولت اكله انا و اسيبلك الطرى
همسه / بجد شكرا
كريم و هو بياكل يلحوس بقه عسل
همسه / على بقك عسل
كريم يمسح الناحيه التانيه
همسه تجيب منديل و تمسحهوله
كريم / شكرا
همسه / امال فين اصحابك البعده
كريم / على فكره هما اخواتى و مش بعده
همسه / ما تفرقش معايا
كريم / راحوا الشغل انا قولت ارجع افطرك
همسه / شكرا
كريم /بكره هتصل بيس تانى
همسه / ساعات بحس ان كل ده مجرد حلم
كريم / قصدك كابوس
همسه / مفيش فى الكابوس واحد مستعد يدفع اتنين مليون جنيه عشان يطمن عليك
كريم / لما يبقى الاتنين مليون جنيه بالنسباله عشره جنيه بالنسبالك يبقى ما تنبهريش اوى
همسه / انت ما تعرفش يس على فكره و كرهك ليه ده نتيجه عقده نقص عندك لانه احسن منك فى كل حاجه
كريم يقوم من على الاكل و يبص لهمسه 
كريم / تعرفى ايه عنى مش من حقك تحكمى عليا اصلا بصى لنفسك الاول اللى تفكر تتجوز واحد عشان فلوسه ما تجيش تحاسبنى و تقولى ان عندى عقده نقص
همسه / انا مش هتجوز يس عشان فلوسه
كريم / صح عشان بتحبيه انتى تعرفيه من اربع شهور حبيتيه امتى
همسه / و انت اشعرفك انت الحب ده شكله ايه الحب ممكن يحصل فى ثانيه
كريم / اكيد بيحصل فى ثانيه لو لواحد مليونير و عنده فيلا و عربيه اخر موديل لازم يحصل فى ثانيه لو هيجيبلك شبكه طقم اللماظ لازم يحصل فى ثانيه لو هيهاديكى شقه كبيره على النيل يبقى اكيد لازم تقعى فى هوا التراب اللى تحت جزمته سكتى يعنى ايه مش قادره تردى صح
همسه / اطلع بره
كريم واقف و ساكت
همسه / قولتلك اطلع بره انت ايه ما بتفهمش اطلع بره اطلع بره بقولك اطلع اطلع
همسه تزق كريم بره الاوضه و ترمى نفسها على السرير و تقعد تعيط شويه و تسمع صوت باب الشقه بيتقفل تفتح باب الاوضه تبص فى كل حته ما تلاقيش حد تجرى على باب الشقه و تحط ايدها على الاكره فجاه الباب يتفتح من بره
مصطفى / انتى واقفه هنا ليه
همسه / كنت بدور على كريم
مصطفى / طب خشى اوضتك هو تلاقيه راح يجيب حاجه انا اصلا مش فاهم هو ازاى يمشى من غير ما يربطك
همسه تدخل الاوضه و تقفل الباب و شويه و صوت باب الشقه يتفتح و تسمع صوت بره
مصطفى / انت ازاى تسيبها و تنزل افرض كانت هربت
كريم / و ما هربتش حصل خير كنت مخنوق قولت اخرج اشم هوا
مصطفى / انت كويس يا كريم
كريم / يمكن ضهرى لسه واجعنى شويه
مصطفى / انت مش كنت كويس الصبح
كريم / يوووووم يا مصطفى انا داخل انام
مصطفى / على فكره الريس جمعه سئل عليك
كريم / وقولتله ايه
مصطفى / قولتله انك تعبان
كريم / صحيح انت روحت بدرى ليه
مصطفى / انا اصلا بعتنى مشوار اخلصله شويه حاجات خلصتها و روحت من بره بره و قولت لمحمود يجيب الغدى و هو جاى
كريم / طيب لما يجى اخواتك ابقى صحينى
كريم داخل الاوضه
مصطفى / شكل نومه السرير ريحتك
كريم يرجعله و يبصله
مصطفى / بهزر يا اخى ايه
كريم يمشى و اول ما يقرب من باب الاوضه همسه تعمل نفسها نايمه يدخل و يقفل الباب و يروح الناحيه التانيه و ينام و يديها ضهره شويه
همسه / انت نمت
كريم / لا
همسه / على فكره انا ما حبتش يس عشان فلوسه ماشى
كريم / خلصنا
همسه / انا بابا الله يرحمه كان نجار عند واحد فى ورشته و فجاه تعب جامد و وقع و الدكتور قال انه عيان و اتحجز فى المستشفى شهر صحيح ولاد الحلال و معارفه بقو يجوا يزورونا اللى يجيب ورد و اللى يجيب فاكهه و اللى يسيب ظرف تحت المخده بس كلهم كانوا ماشين بمبدا يا بخت من زار و خفف ما حدش كان بيزود عن عشر دقايق و ما كانوش بيرجعوا و انا كنت جنب بابا طول الوقت و لحد ما مات و بعد كدا اهل المنطقه اتكفلوا بدفنه صاحب البيت عرض عليا فلوس عشان اطلع من الشقه و ساعتها ما كنتش بشتغل و لا معايا فلوس و مديونه لطوب الارض بسبب مصاريف علاج بابا فوافقت و خدت شقه ايجار و الفلوس كانت كلها على بعض سبع تلاف جنيه بعد ما سددت الديون اللى كانت عليا
كريم / وروحتى فين
همسه / اجرت شقه تانيه و دفعت للراجل تامين و مقدم و نقلت العفش بتاعى و فضلت شهرين ادور على شغل مفيش اصل شهادتى تبلها و تشرب ميتها قولت اجرب اعمل اى حاجه روحت اشتريت بضاعه هدوم و حطيتها فى شنطه و بقيت اللف على البيوت واحده تاخد الحاجه و تقيسها و تقطعها و اللى تاخد قسط و تغلبنى و اللى تفتح فى الحاجه و تبهدلها و فى الاخر تقولى شكرا لا و الادهى لما افتح شقه و يطلع اللى ساكنها اصلا راجل و يطلع عينى على ما اعرف افلت و انزل اجرى على السلم
كريم / هههههههه معلش و بعدين
همسه / و لا قبلين على اخر الشهر لقيت الفلوس اللى معايا اقل من النص و البضاعه ما تساويش روحت للتاجر و قولتله يدينى تانى و ادينى اتعلمت ما رضيش بعت البضاعه اللى عندى بربع تمنها و نزلت تانى اللف على شغل مفيش غير انى انضف فى البيوت وافقت مرتين عدت على خير و التالته حلفت ما انا داخله بيوت تانى
كريم / ليه ايه اللى حصل