HYUNG? NOT.... || JINKOOK ✔︎

~ 12 ~

Unicode
_________

"သားရေ...ညီလေးကို အိပ်ရာသွားနှိုးလိုက်ဦး။ အခုထိမထသေးဘူး"

အိမ်ရှေ့က ပန်းအိုးလေးတွေကို ရေလောင်းနေတုန်း မေမေ့ဆီက စကားသံကြောင့် ကျွန်တော်ရေပိုက်ကို ခလုတ်ပိတ်ခဲ့ကာ အိမ်ထဲ ပြန်ဝင်လာခဲ့သည်။ ဧည့်ခန်းထဲက နာရီကို ကြည့်လိုက်သောအခါ နံနက်၈ နာရီတိတိတောင်ရှိပြီ။ လူတစ်ယောက် အိပ်ချိန်က ဒီလောက်ဆို တော်ရောပေါ့။ ဒီရက်ပိုင်း ဂျွန်ဂျောင်ကု တစ်ယောက် မေမေတို့ရှေ့လည်း မရှောင် လစ်ရင်လစ်သလို လက်ကိုင်လိုက် ၊ တို့လိုက်ဆိတ်လိုက် လုပ်နေသောကြောင့် မနည်းဟန့်ထားရသည်။ ပြောသာပြောရတာပါ။ကျွန်တော့်ကိုလည်း သူ မကြောက်ပါဘူး။

သူ့အခန်းတံခါးကို စဖွင့်လိုက်ကတည်းက lavender ပန်းနံ့ခပ်သင်းသင်းက နှာခေါင်းထဲ တိုးဝင်လာသည်။ တစ်ခန်းလုံးကို အပြာနုရောင်ဆေးသုတ်ထားပြီး ပြတင်းပေါက် လိုက်ကာတွေကအစ အပြာရောင်ဖြစ်သည်။ တစ်ခန်းလုံး သပ်ရပ်သန့်ရှင်းပြီး ကြမ်းပြင်တွေကအစ လက်လက်ထနေသည်။

ဂျွန်ဂျောင်ကု၏ ကောင်းသောအချက်ထဲတွင် ထိုအချက်ကို ကျွန်တော်သဘောအကျဆုံးဖြစ်သည်။ ငယ်ငယ်ကတည်းက သူ့စည်းနဲ့သူ သပ်သပ်ရပ်ရပ် နေတတ်ပြီး အသုံးအဆောင် ပစ္စည်းတွေကအစ နောက်ကလိုက်သိမ်းပေးနေစရာမလို။ သူ့နေရာနဲ့သူ စနစ်တကျထားတတ် သိုတတ်သည်။ ပိုက်ဆံကိုလည်း  တစ်ခါမှ ဟော့ဟော့ရမ်းရမ်း သုံးဖြူန်းတာ မတွေ့ဖူးသေး။ ကောင်လေးက အောက်သက်ကြေသည် ဟုပြောရမည်။

ကုတင်ဘေးက နံရံမှာလည်း စာအုပ်စင်တစ်ခုရှိသည်။ သူ့ရဲ့ကျောင်းစာအုပ်တွေရော တခြားပြင်ပစာအုပ်တွေကိုပါ အမျိုးအစားအလိုက် သပ်သပ်စီခွဲထားသည်။ အလယ်တန်းကျောင်းသား ဘဝကတည်းက အထက်တန်းရောက်သည်အထိ တစ်ခါမှ စာလေ့လာဖို့ကို သတိမပေးရ။ သူ့ကိစ္စကို သူသိသည်။ အချိန်တိုင်းလည်း စာအုပ်ထဲခေါင်းစိုက်မနေသလို အပြင်ထွက်ပြီး သူငယ်ချင်းတွေနဲ့အပျော်အပါးကိုလည်း မမက်မော။ အချိန်တန်လျှင် စာမေးပွဲမှာ အမှတ်အများဆုံးက သူပဲဖြစ်သည်။

တစ်ကျောင်းလုံးရဲ့ ခေါင်းဆောင်ဖြစ်ခဲ့ဖူးသလို ကျောင်းသတင်းဌာနမှာလည်း Announcer အဖြစ်ပါဝင်ခဲ့ဖူးသည်။ မိန်းကလေးတွေ ကြွေလောက်တဲ့ရုပ်ရည်ကိုပါပိုင်ဆိုင်ထားသူမို့ ဂျွန်ဂျောင်ကုသည် ကျောင်း၏ ကြယ်တစ်ပွင့်ဖြစ်ခဲ့သည်။