~ شهر العسل ~ "مُكتمِلة".

الفصل التاسع♥️

صرخت والدته وهي تبكي قائلة بحزن

=انت بتصدق مراتك وتكدبني وتشكك فيا، أخص علي التربية اللي ربيتهالك، روح أشبع بيها براحتك وصالحها وعليها عليا كمان وكمان يابن بطني .. وسع كدة.

رحلت الي غرفتها وهي تبكي حاول النداء عليها ولكن لا فائدة من هذا ، في حين ربط طارق علي كتف زين قائلا

=معلش انت عارف ماما يازين، شوية وروح راضيها هتتصالح، وروح لمهرة الحقها وهاتها من تاني.

هز رأسه بعنف قائلا

=انا مطلبتش منها تمشي، علي الأقل كانت توقف تفهمني وتتكلم زى البنى آدم وانا كُنت هحل الموضوع وأجيب ليها حقها، شُغل لوى الدراع دة مش بتاعي، يعني ايه من اول مشكلة تسيب البيت وتمشي، هو لعب عيال؟ ...  اظاهر إني مفيش نصيب بينا اصلًا، والموضوع لحد هنا ولازم ينتهي، انا هطلع وشوية وهنزل اراضي ماما.

جذبه فارس من ذراعه قائلا

=لاء تعالي أقعد معانا جوا، نتكلم في اللي حصل وتهدي.

=لاء مش حابب هطلع أشوف ولادي، عن اذنكم.

صمم علي رأيه وخرج من الشقة ثم صعد للاعلي، في حين قال طارق ل أروى بهدوء.

=أطلعي يا أروى اظاهر مفيش عشاء ، شوية وهحصلك.

=طيب ومهرة هي مشيت؟

اومأ برأسه في حزن، في حين تساءل فارس قائلا

=هي ماما كلمتها بطريقة مش كويسة؟

اومأت برأسها قائلة

=قالتلها كلام مش لطيف وأجبرتها تعمل حاجات كتيرة.

شرحت لهم أروى ما حدث تمامًا، حتي انتهت ليقول فارس بضيق

=والله صعبت عليا دى بنت كويسة، مش عارف ماما محبكاها ليه!!

انسحبت أروى للاعلى بهدوء في حين دلف فارس مع طارق الي غرفتهم مرة اخرى، ليقول فارس وهو يشد شعره بتعب

=مش عارف قلاقيها منين ولا منين !!

=أنت عامل ايه مع مراتك ؟

صمت فارس بعجز ثم قال بتنهيدة

=مش عارف، انا اتجوزت البنت اللي أتمنتها واللي حبيتها، المفروض ميكونش فيه مشاكل، بالعكس انا حاسس بمشاكل مالهاش اول من اخر ، كُل تفكيرها غيرى، وما اكتشفتش دة غير دلوقتي، أو كُنت عارف بس بتغاضي وخلاص، وقولت الحُب كفيل يعالج كٌل حاجة ولكن دة محصلش، الحُب مش كل حاجة وحُبنا هيصمد لفين، وهنستحمل لامتي انا مش عارف ..

ربط طارق علي كتفه قائلا

=حاول تقرب منها، وتفهمها علي قد ما تقدر ... الحُب كفيل يحل الكثير..

=مش بالبساطة دي، الحُب هيستحمل لامتي، هيحل إيه ولا إيه، الحُب مش كل حاجة، فيه تفاهم وذات واحترام، وخايف انها توصلني أكرهها واكره حُبي ليها وأقسي.. صدقني يمكن أنت ارحم، احمد ربنا يمكن لو خدت البنت اللي حبيتها مترتحش معاها.