مدينه السحره ❤️ بقلم.. سماح سمير شبل ❤️ فانتازيا كوميدي مغامره ((مكتمله))

الفصل العشرون

ان شاء الله الفصول هتنزل كل يوم اربع
ومش هتكلم على الڤوت تانى لأنى زهقت وان شاء الله اخلص مدينه السحره والروايه الجديده مش هنزلها غير لما الاقى تفاعل
قرأه ممتعه
💚💚💚
الفصل العشرون
مدينه السحره
بقلم سماح سمير شبل

تحسنت صحه الجده وطلبت من زوجها رؤيه حفيدتها حور، فقام الجد بالاتصال بحور التى ما أن فتحت المكالمه قال لها بأقتضاب..
تعالى حالا لجدتك ياحور.
ولم يمهلها فرصه للرد واغلق المكالمه، لتنزل الهاتف وتنظر للهاتف بصدمه جعلت بحر يقول بأقتضاب.
ده جدك.
أومأت له حور وقالت..
ملحقتش اقول الو.
بحر..
يابجاحتك ياشيخه.
كادت حور أن تتحدث لولا رشيد الذى كان ينظر إلى الهاتف المحمول بأنبهار وقفز من مقعده وهو يميل أمامها ليكتشف هذا الاختراع الجديد.
حور..
فى ايه يارشيد؟
رشيد بفضول..
استسمحك يا مودموزيل حور، لو ما فيهاش اسائت ادب يعنى ممكن اشوف الاختراع الجديد ده؟
ضحكت حور على طريقه حديثه معها وتذمر بحر الذى ما أن استيقظ رشيد وهذه المحتله تضحك على كل كلمه تخرج من فمه
، جذبت حور هاتف بحر من يده فجأه وأعطته لرشيد وقفزت لتغادر الاستراحه وقالت وهى تخرج ..
معلش يابحر خليه يلعب بتليفونك لغايه ما اشوف جدتك عاوزه ايه وارجع.
بحر بغضب ..
غورى ياحور
غادرت حور الاستراحه بأبتسامه سمجه، وتركت رشيد يقلب الهاتف بين يده فى دهشه وبحر ينظر له بنفاذ صبر.
رشيد..
الا قولى يابحر افندى، الحديده دى ازاى بتشتغل.
بحر وهو يمسح وجه بكفيه بنفاذ صبر قال..
بص بقى يا استاذ رشيد.
رشيد مقاطعاً.
انا افندى مش استاذ.
بحر بغضب..
افندى دى انقردت من زمان قوى، ممكن تسمعنى؟ اولا انت ف القرن الواحد والعشرين وثانيا وده الاهم انا عاوز افهم انت ايه اللى جابك انت والأله العجيبه اللى كانت معاك دى الزمن ده ؟ وليه؟
رشيد بجديه..
انا الديب الحارس لبوابه الشر ولقيت برديه لتصميم أله زمنيه، ما اطولش عليك يابحر افندى انا مكدبتش خبر وبدأت فى تصميم الأله الزمنيه، لكن بعد خمس سنين وانا لسه بشتغل على الاله الزمنيه جالى خبر أن المحفل الماسونى فى الاسكندريه واللى كان بقياده الامير سليم  ، عرف أن فيه برديه مهمه جدا معايا وكل اعضاء المحفل بيدورو عليا، قمت مسافر البلد وبدأت اكرس وقتى ومجهودى كله انى اخلص الأله الزمنيه دى واهرب من الزمن ده والحق الكارثه اللى هتحصل فى 2020 قبل ما المحفل ينفذها ويبقى العالم كله فى خطر، وادينى جيت اهو يابحر افندى.
بحر بصدمه..
انت شغلت الأله الزمنيه دى على سنه 2020؟
رشيد بثقه..
اى نعم .
بحر..
وايه بقى المخطط اللى انت جاى تلحقه يارشيد افندى؟
رشيد بهمس..
مرض يابحر افندى، مرض هيقتل نص سكان العالم واكتر، حاجه كده زى الطاعون والكوليرا.
بحر بهدوء..
كرونا
رشيد بغباء..
معذره ممكن توضيح؟
بحر..
المرض اللى انتى جاى من زمن تانى علشان تلحق العالم منه، اسمه كرونا كوفيد 19.
رشيد بتوتر.
ارجوك يابحر افندى توضح اكتر من كده؟
بحر ومازال محافظ على هدوئه..
احنا فى سنه 2021 يا رشيد والعالم كله بيعانى من فيرس كرونا وناس كتير فوق ماتتخيل ماتت.
رشيد وهو يقفز برعب..
مش معقول، ازاى الأله تغلط فى سنه كامله، مؤكد هناك عطل فيها.
أنهى جملته وهو يحوم حول حول الأله ويخرج المفكره من حقيبته وينغمس فى قرأتها والتعليم بدوائر على عده معادلات حسابيه بها، وظل يحدث نفسه بصوت مسموع ببعض الارقام والمعادلات وبحر ينظر له بنفس الهدوء، حتى استدار فجأه ليواجه بحر وهو يقول بصوت متلعثم..
المصل، طلعوا المصل ولا لسه يابحر افندى؟
بحر..
نص سكان العالم لو ماكنش أغلبيتهم خدوه.
جحظت عين رشيد وظل يردد..
كل العالم فى خطر.
حاول بحر مراراً وتكراراً أن يهدأ من روع رشيد ولكن الآخر وكأنه لدغ من افعى وظل يحوم فى الغرفه ويقطعها ذهابا وإيابا حتى دخلت عليهم حور وهى تحمل حقائب بها طعام وشراب وأخرى بها بعض الملابس العصريه لرشيد حتى لا ينتقده الناس بالجوار، اختفت ابتسامتها عندما وصلت جمله بحر لمسامعها وهو يقول..
ماتهدى بقى يارشيد، الفيرس وبقى موجود والناس متعايشه معاه والمصل وأغلب الناس خادته،احنا المفروض دلوقتى ندور على حل.
حور بصدمه..
بس اللى المهاجر مش جاى هنا علشان الكورونا.
التفت اليها بحر ورشيد وعلامات الاستفهام تنير على رؤوسهم.
حور بجديه..
احنا عندنا مهمه فى البعد التانى لبوابه الشر ودور المهاجر أنه يرجعنا بالزمن فى الوقت المناسب.
بحر بغضب..
ممكن لو تكرمتى يا حور هانم تقولي لينا التفاصيل كلها؟
ابتلعت حور لعابها بتوتر وقالت..
انا استلمت العهد زى ما انت عارف.
بحر بنفاذ صبر..
اخلصى.
حور مكمله..
من اسبوع وصلت لى اخبار أن البعد التانى ظهر فيه ست احفاد هيغيرو القوانين وهيقلبو موازين المدينه علشان المحفل اللى داخل المدينه قرر أن البوابه هتتفتح حتى لو على حساب أرواح كل اللى موجود هناك، بلس أن الاسطوره بتحصل بحزافيرها هناك وكمان ده اثر على الأحداث اللى حصلت للمهاجر وهو لسه فى الزمن بتاعه.
رشيد بعدم فهم..
وضحى يامودموزيل حور اكتر.
حور..
انت المفروض انك كنت مطارد من المحفل فى مصرصح؟
رشيد بتأكيد..
اى نعم.
حور ..
اسمعنى يا رشيد من فضلك من غير ما تقاطعنى ممكن؟
رشيد..
كلى اذان صاغيه.
حور..
مين اللى كان بيطاردك من المحفل؟
رشيد بثقه..
الامير سليم.
حور ..
حلو اوى، معلش هو مين ملك مصر اللى انت كنت عايش فى زمنه؟
رشيد ..
الملك فاروق
حور ..
الامير سليم  مات من زمان يا رشيد عارف طبعا أن الخديوي اسماعيل طرده برا البلد وبعدها اللى حكم مصر بعدها توفيق وبعده عباس حلمى وبعده حسين كامل وفؤاد واخيرا الملك فاروق يعنى الأمير سليم  مش هو اللى بيدور عليك .
صمت رشيد وكأن عاصفه ضربت رأسه كيف لم يكتشف أن الأمير سليم كان فى عهد الخديوى إسماعيل وهذا من زمن بعيد ولكن هناك لم يشكك فى الأمر وكأنه يعيش فى عهد الخديوى إسماعيل، اما بحر فقد نظر لحور بصدمه وقال..
انتى ازاى عرفتى كل ده؟
حور ..
يا بحر انا الديب الحارس ولو سألت الجده هتقولك أن الديب الحارس لما بيستلم العهد بيعرف فوق ماتتخيل من المعلومات بس ما نقدرش نقول أو نحكى غير فى حجات بسيطه ومش من حق اى حد يعرف المعلومات بتيجى لينا ازاى، صح يارشيد؟
رشيد وكأنه استوعب الأمر الآن، نظر مطولا إلى بحر وقال..
الحارس اللى زيك ليه مهمه والديب ليه مهمه وكلنا بنحافظ على العهد لمصلحتنا ومصلحت اللى بنحبهم، انا فهمت دلوقتى بس انا جيت هنا ليه.
بحر ..
ازاى وجودك هنا يبقى لسبب وانت اصلا جيت لسبب تانى؟
رشيد وهو يمسح وجهه بأرهاق..
لاول مره ابقى غبى وماافهمش الرسايل صح، الرسايل كانت ليا انا مش لحور.
بحر ..
حور!!
رشيد..
ايوه يابحر افندى لما فوقت وعرفت منكم انك الحارس بالوراثه ومودموزيل حور بالعهد قولت يبقى الرسائل اللى كانت بتوصل الفتره الاخيره ليها، بس طلعت غبى والرسائل كانت تخصنى انا.
حور بفضول..
ايه هو محتوى الرسائل يا رشيد بيك؟
نظر لها رشيد بسعاده وزال الهم من وجهه عندما لقبته حور ب بيك وقال بجديه تخفى خلفها طبول فرحه فى قلبه..
اعيرنى انتباهك لبرهه ياحور هانم .
أنهى جملته وحور تكتم ضحكاتها وبحر يكاد ينفجر من الغيظ، هذا الرشيد الأرعن يغازل ابنه عمه وحبيبته امامه وعليه أن يتحلى بالصبر، فتح رشيد المفكره ليكمل.
من الطائر للمهاجر، عليك اختراق الزمن لتكون درع حمايه لديب الصحراء الحارس ليكون لك الحارس والديب درع وعليكم جميعا مساندت الأحفاد الاسطوريون قبل وقوع الكارثه التى ستدمر العالم.
أنهى محتوى الرساله وقال..
كنت فاكر انى هنا علشان اساعد فى عدم انتشار الوباء ولكن انا فهمت حالا يا بحر افندى انى هنا علشان اساعدك انت وحور هانم.
بحر وهو يمسح وجهه بعنف..
لا ده كده الحوار كبير وجدك هيشلحنا ياحور الكلب.
حور..
الله وانا مالى يالمبى.
بحر..
مله فى جنابك ياشيخه، الجده عرفت؟!
حور وهى تبرم خصله من شعرها قالت بتوتر..
المفروض اننا منقولش لحد.
بحر بغضب .
يعنى انتى ماقولتيش للجده؟
حور..
لا مقولتش ومش هينفع اقول ولا حد فيكم يقول اصلا يقول.
رشيد..
طب هنروح ازاى؟
بحر وهو يشير لها علامه على جاوبى.
حور..
ماهى دى مهمتك انت يا رشيد.
علامات استفهام كثيره ظهرت على وجه رشيد
علامات استفهام كثيره تدل على عدم معرفته بكيف سينقلهم إلى هذه المدينه الاسطوريه والتى لا يدخلها الا السحره، عندما مرت كلمه السحره أمامه اضيئت فى عقله الكلمه ((سحره)) هو أيضا ساحر ولكنه لم يدخل هذه المدينه من قبل، فعليه الآن أن يجد مدخل المدينه.
صمت حلق فى الأجواء لمده دقائق حتى انتفض بحر وحور على صوت رشيد وهو يقول..
وجدتها، وجدتها، النيل.
بحر ..
هنرمى نفسنا فيه صح؟
ضحكت حور ولكن نظره واحده من بحر كانت كافيه لتجعلها تتذمر وتشير على فمها بعلامه توحى انها تغلق سحاب.
رشيد..
بعيدا عن استهزائك بيا يابحر افندى، انا هقول، احنا ناخد قارب صغير من جوار الاهرامات وهنسبح بيه لبرهه لحين ظهور البوابه.
حور..
ايه ياعم انت، ايه اللى جاب القلعه جمب البحر؟ نيل ايه اللى جمب الاهرمات؟!!
رشيد..
لأ كده كتير ياجماعه كفايه استهزاء بيا.
بحر..
يااخ رشيد النيل مش جمب الاهرامات، احب اقولك أن النيل اتردم من زمان قوى وان البلد دلوقتى مش زى زمان واحب افكرك ان انت سافرت بالزمن 100سنه.