[ သူကြီးသမက် ]
အရိပ်ရိုးကိုစိတ်ဆိုးပြီးပြန်လာတော့၊မျက်နှာကလဲမှုန်ကုပ်နေသည်။
" သား ဘာဖြစ်လာတာလဲ မသိရင်တစ်ရွာလုံးနဲ့ ရန်ဖြစ်လာသလိုပဲ ငါ့သားမျက်နှာက "
အရိပ်ခြံထဲဝင်လာတော့၊အိမ်ရှေ့ကွပ်ပျစ်မှာထိုင်နေတဲ့ အမေကမေးလာသည်။
အဖေကအမေနံဘေးမှာထိုင်၍၊သူ့ရဲ့ကျည်မပါတဲ့သေနတ်အရှည်ကြီးကိုဖုန်သုတ်နေသည်။
" ဘာမှမဖြစ်ပါဘူး အမေ "
အရိပ်ရိုးကိုစိတ်တိုလာတာပါလို့ အဖေနဲ့အမေကို ဘယ်လိုလုပ်ပြောပြလိုရမှာလဲ။
" ကိုကို ရေချိုးသွားရအောင် "
အိမ်ထဲကနေထဘီရင်ရှားတဘက်ခြုံထွက်လာတဲ့ ညီမလုပ်သူနှင်းနုကပြောလာသည်။
" အင်း သွားမယ် "
အရိပ်တို့ဇီးပင်ကုန်းရွာလေးကမြစ်ဆိပ်နံဘေးမှာတည်ရှိတာကြောင့် တစ်ရွာလုံးကရေချိုးရင်မြစ်ဆိပ်မှာပဲဆင်းချိုးကြသည်။
သောက်ရေကိုတော့ ရွာလယ်ကရေတွင်းမှာခပ်ယူကြ၍၊အိုးခွက်ပန်းကန်ဆေးရေကိုတော့၊မြစ်ဆိပ်မှာပဲညနေစောင်းလုံမပျိုလေးများကရေအိုးခေါင်းရွက်ခပ်ယူကြပြီး၊ကာလသားများကတော့ ရေထမ်းပုံးရှေ့တစ်ပုံးနောက်တစ်ပုံးနဲ့ခပ်ယူကြသည်။
ရွာထဲကနေမြစ်ဆိပ်ကိုသွားရာလမ်းအတိုင်း အရိပ် အပေါ်ပိုင်းဗလာကျင်းခါး၌ပုဆိုးဒူးလောက်ထိ ခပ်တိုတိုဝတ်ပြီးရေဆိပ်ကိုလာခဲ့လိုက်သည်။
ညီမလုပ်သူနှင်းနုကလဲအဝတ်လျှော်ရန်အဝတ်ပုံးပိုက် ထဘီရင်ရှားပခုံးပေါ်တဘက်ပတ်ဆံပင်ရှည်ကိုရေမစိုအောင်ဘီးဆံပတ်ထုံးလို့ မောင်နှမနှစ်ယောက်လျှောက်လာစဉ်။
" ညှော်အိုးဟေ့ ,,,, ညှော်အိုး ,,,,"
အရီးစိန်ရဲ့အော်သံကခုနှစ်အိမ်ကြားရှစ်အိမ်ကြားပေါ်ထွက်လာသည်။
ကျွန်တော်တို့ရွာမှာကအိမ်နဲ့တစ်အိမ်ဟင်းချက်လို့ ကြက်သွန်ဆီသတ်တာပဲဖြစ်ဖြစ် ငရုပ်သီးကြော်တာပဲဖြစ်ဖြစ်ညှော်လုပ်စရာရှိရင်ကိုယ်အနီးအနားကအိမ်တွေကိုအော်သတိပေးရသည်။
YOU ARE READING
( သူကြီးသမက် ) Completed
Non-Fiction( ရိုးမာန်ဂုဏ် ♡ နွေလရိပ် ) ♡ 28 . 8 . 2021>♡< 19 . 12 . 2021 ♡