[Unicode]
(၄)
လူတွေနှင့် ပေါင်းသင်းရတာ တကယ်ကို အားအင်ဆုတ်ယုတ်စေသည်။ အထူးသဖြင့် ပျော်ချင်ယောင်ဆောင်ရတာက ပို၍ပင် ပင်ပန်း၏။ အတန်းဖော်များနှင့်အတူ တနကုန်လျှောက်လည်ပြီးသကာလတွင် ယုမိမှာ ၁%သာကျန်တော့သည့် ဖုန်းသဖွယ် သေကာနီးဆဲဆဲ အခြေအနေသို့ ရောက်နေခဲ့ပြီဖြစ်၏။
ခြေတစ်ချောင်းပင် မသယ်ချင်၊ တွေ့သည့်နေရာတွင် လှဲအိပ်ချချင်သည့်အနေအထားပင်ရောက်နေသော်ငြား လက်တွေ့တွင်တော့ ယုမိမှာ ခြေလှမ်းကို ခပ်သွက်သွက်လှမ်းရင်း မနားတမ်းလျှောက်နေခဲ့ရ၏။
အချိန်မကြည့်မိသော်ငြား ည ၇နာရီခန့် ရှိမည်ဟုတော့ထင်သည်။ နဂိုထဲက လူကျဲပါးသောရပ်ကွက်က ဒီနေ့မှ ပို၍ပင် တိတ်ဆိတ်နေသလိုထင်ရတာကြောင့် ယုမိမှာ ကိုယ့်နှလုံးခုန်သံကိုပင် ပြန်ကြားနေရသည်။ သူ့နောက်က ခြေသံကလည်း သူ့ခြေလှမ်းအတိုင်း တစ်ဖဝါးမကွာ လိုက်လာနေဆဲ။
တကယ်တော့ ထိုခြေသံမှာ သူငယ်ချင်းများနှင့် လမ်းခွဲပြီး အိမ်ပြန်လာကတည်းက ကပ်ပါလာတာဖြစ်သည်။ အစကတော့ သွေးရိုးသားရိုးသာ ထင်ခဲ့သော်လည်း သူရပ်လျင်လိုက်ရပ်၊ သူဝင်သည့်လမ်းမှားတွေအတိုင်း လိုက်ဝင်ကာ တောက်လျှောက်ပါလာပုံထောက်လျင်တော့ သူ့နောက်လိုက်နေတာပင်ဖြစ်ဖို့များနေသည်။ သို့သော်လည်း နောက်လှည့်ကြည့်ကာ ရင်ဆိုင်ရန်ဝေးစွ၊ ခြေလှမ်းပျက်သွားလျင်ပင် တစ်ခုခု လုပ်လာမည် စိုးတာကြောင့် ယုမိမှာ ဘာလုပ်ရမှန်းပင်မသိ ဖြစ်နေရ၏။
များသောအားဖြင့် မကြောက်တတ်ခဲ့သော ယုမိမှာ သည်တစ်ခါတော့ ချွေးစေးများပျံပါအောင် ထိတ်လန့်နေရသည်။ အဆိုးထဲက အကောင်းဟုပင်ဆိုရလေမလား မပြောတတ်။
သည်အတိုင်းလဲ အိမ်မပြန်ရဲတာမို့ တစ်စုံတစ်ယောက်ဆီ ဖုန်းခေါ်ကာ အကူအညီတောင်းရကောင်းမလားတွေးကာ ဖုန်းခေါ်မိသည့် အနှီလူကလဲ ဖုန်းမကိုင်။ အရေးကြီးလျင် ရပ်ရပ်သွားတတ်သော ဦးနှောက်မှာ ယခုချိန်တွင် သူ့ကို လှမ်းခေါ်ချင်စိတ်မှလွဲ၍ ဘာကိုမှလည်း တွေးလို့မရပါတော့ပေ။
YOU ARE READING
The Stranger Who Brought me Dasies
Romancetags- Romance, Drama, Fluff, Slice of Life, BxG, OC (This is something i wrote for fundraising cms) "နှင်းတွေဝေတဲ့ စနေနေ့နံနက်ခင်းတစ်ခုမှာ အီရှိဒယုမိဟာ သူစိမ်းတယောက်ဆီက ဒေစီပန်းတစ်ပွင့်ကို လက်ဆောင်ရခဲ့တယ်။ ကိုသူစိမ်းဟာ ယုမိမသိလိုက်ခင်အချိန်မှ...