ياجبل مايهزك ريح 🇱🇾

الحلقة{9}

#ياجبل_مايهزك_ريح
#بقلم_جولي اقارصؤ
الحلقه (9)
الكاسر/فيك بارك الله ولو... وشبح لي اسوة والف لاباس عليك مرة تانية
اسوة/شبحتله... لا يورك باس شكرا
حمزة/خش يجري.. اياد اتوفه يا الكاسر
الكاسر/تلفة ليه ...شد راسه.. لا ياراجل
الحمزة/ حط يديه وراء راسه ويشبح لي الكاسر
الكاسر/حط يدي ع طقيا متع نزاله ع وجه ....تي لااااااا
اسوة/مصدومه تشوف الي الكاسر
خالد/لا حول الله ان الله وان اليه راجعون
حمزة/مشي لي الكاسر شد يديه... ربي يرحمه ...حوله يديه
الكاسر/يسمع في زياد يعيط برا ع طول حسا... زياد زياد ياحمزة... وطلع يجري برا
حمزة /لحقه
زياد يعيط والناس كله تتفرج عليه والشباب يشدو فيه
زياد/يخبط في راسه ع الحيط... قتلة خوي قتلة خوي لاااااااااااااا ..شد راسه ....لاااا ياربي لاااااااا ...ويشبح لي يديه. قتلتا بي ايديا بي ايديا حي عليا بي ايديا اني... ويخبط ويعيط
الكاسر/شده مع يديه... وراسك زياد اهدا ءمش انت قتلته هدي ساعته يصاحبي
زياد/يدف فيهم... مش ساعته اني قتلته... ويخبط ع صدره.. اني قتلته قتلة خوي توامي روحي قلبي قتلة نفسي اني روح واحده قتلته قتلته قتلته قتلته لاااااا ...ويخبط في الكارسي ويدف في الشباب وهما يشدو فيه
اصيل /شده من الخلف من خصره وزياد يدف في اصيل طح هو ويه متاتر ....وراسك اهداء خلاص زياد خلاص وراس اوخي اجله هدي ربي يرحمه
زياد/متعزونييييييييييش فيه حرام فيا تعزوني حرام اني قتللللته ...ويخبط ع صدره ودموع ينزالو
الكاسر/شد راسه ودموع في عيونه وقهمز قدام زياد
حمزة/ مقعمز جنب الكاسر ع روص صوبعه وحط يدا ع كتف الكاسر ودموع ينزالو من غير صوت
جاسر/ مقهمز ع كرسي مطبس راسه وحط يدي ع وجه
امجد وقيس واقفين ومهند وراء الكاسر وحمزة متاترين
اما اسوة لبسة تجكته ويشحها واقفا دخل تسمع في العيط يقطع القلب
اسوة/ياروحي عليه
ممرضه/وااك عليا قطعلي قلبي ..حط يده ع قلبه
وزياد يعيط ولناس كله تتفرج متاتره بي الموقف
خالد/يتفرج عليهم متاتر بي الموقف ...لاحول الله
وفجاة تخش اما زياد واياد وبوه
ام زياد/خشت تجري... واك عليا ولدي واك عليا ولدي ...وشفة زياد مشتله تجري طحت ع ركبها جنبه وجنب حمزة بدت تخبط ع ركبها.... واااك عليا يا ولدي خوك واااك عليا خوك واك عليا ...وتندب في خدودها ...وااك عليا اوخيك واك عليا ولدي كبتي ياحليلي هيييي ياحليلي هييي
زياد/يبكي بي العبرة وتلبط امه... والله مقصدي والله مقصدي يا امي
ام زياد/متلبطه ولده وتخبط ع ضهراء ...واااك عليا ولدتي واااك عليك يازياد شن درة واااك عليك ياولدي قتلة خوك ياحليلي ياحليلي ياحليلي ولداتي كيف ندير ياربي كيف ندير ياحليلي محره ياحليلي محره ياحليلي شن بصبرني ياحليلي كيف ندير
اسوة/ترعش مع بعضه ادخل... حي عليا... طلعة برا تشوف في ام زياد كيف طيح ومتلبطه ولده وتعيط وحطت يدها ع فمها
خالد/حط يده ع ضهر اسوة وحضنه
موقف كان يقطع القلب من العيط دنيا مقلوبه ورفعهم خشو دخل يشفو في اياد
............................................................
في حوش الحجاري.......
غالية عنده بنته نرجس جيا حرجانه وتصلة رنده بي امه ناضة غاليه مست لي دارها
غاليه/ايوه يا رنده
رنده/كيف حالك يمه توا
غاليه/كويسه يابنتي وكيف حالك انتي وصغارك وراجلك
رنده/كويسين بخير الحمد الله يمه نتصال بي اسوة متردش علاش
غاليه/تلفونه في الحوش وهيا في المستشفه مع خالد
رنده/الطف خيرها يمه شن صاير
غاليه/كتفه منصول ارفعه تعين المعفنا هدي هيا وخوه كلمة بي كلمة
رنده/سلامته ع طولة لسانه توا غير اسمعني يمه راه كلمتني لميا بكري الي قعمزة معنا في العرس اني اسوة
غالية/خيره
رنده/قلتلي بنجكم ع خاطر اسوة يبوه لي ولدهم
غالية/قلهم يتفصلو ان شاءالله يصير خير
رنده/نبي نكلم اسوة قبل مرة متبيش ولا حاجة غير كلمها لما تجي تكلمني
غالية/لا نكلمه ولا تكلمها قلهم يجو متبيش عينه المرة هدي حني بنجوزوه ع كيفنا شفن من ختارة قبل
رنده/باهي المهم قلتلك راه بيجو غدوا هما
غاليه/به يتفضلو ع خير ان شاءالله
............................................................
في المستشفة.....
الكاسر واقف ع صاحبه
الكاسر/عيونه حمر... بالله متنسوش يا شباب زي كل مره
شباب/ان شاءالله
اصيل/اني بنقعد وانتو نضمو الامور
امجد /اني وقيس نمشو نجيبو الخيمه
حمزة/تمام اني وجاسر نكملو ونجيبو الزم
الكاسر/تمام اني توا نتملهم الاجرات مع كرم ونلحقكم
جاسر/تمام
مهند/متجبوش حليب وبن وتمر عليا زي ماتفهمين من قبل
الكاسر/تمام
طبعن شباب مديرين زي جمعية يلقطو في فلوس والي تصرله منسبه منهم فيهم يديرو الازم وزياد واياد يعرفوهم وحبو يقفو مع زياد
حمزة/مشي لي خالد ....شنو بتروح انت
خالد/اي نوصل اسوة ونجيك
حمزة/تمام
كرم /جي من الممر.... كااااسر .... خش لي الاسعاف
الكاسر/تلفة ومشاله خش لي الغرفة
اسوة وخالد كانو وقفين قدام الغرفة
كرم/شبح لي خالد... ياخويا لو سمحت
كاسر/تلفة لي خالد... يا ولد عم حمزة
خالد/تلفة ليه .... انعم
كاسر/تعاله ياخالد
خالد/خش هو واسوة ..انعم ...واقف قدام كرم
كرم/شبح لي الكاسر ...شن ردتله كتفه
الكاسر/شبح لي اسوة
اسوة/ شبحتله
الكاسر/ اي وكتبتله مسكن... وشبح لي عيونها
اسوة/تشبح لي الكاسر عيونه دموع في خاطره ياحليلي ع عونتك
كرم/شن توا كويس ايدك
اسوة/اي تمام توا حتا خف الوجع طبعن يسلمو يدياتك ياذكثور.. وشبحة لي الكاسر
الكاسر/الله يسلمك... وشبح لي كرم ...كيف صار
كرم/صرله نزيف حاد في دمغ ضربه قويه كيف ضربينا بي تلفون شن صار
الكاسر/يلعبو في ببجي صار تنافس شوره الي توفا قتل خوه في لعبة التاني تعصب قاعد يخبط فيه وصار الي صار ...ويمسح بي يده ع وجه
كرم/لا حول الله يارب ان الله وان اليه راجعون هيا لعبة هدي تاتر ع الاعصاب والله شفة امه والله قطعتلي قلبي
الكاسر/الكارث في خوه توا بيهبل
كرم/ربي ايصبره
خش حمزة
حمزة/خالد شنو بتطلع توا
خالد/اي هيا... وشبح لي كرم والكاسر.. بارك الله فيكم سمحونا
الكاسر/فيك بارك الله
كرم/وجبنا خوي
اسوة/شكرا وربي ايعونكم
وجو طلعين
الكاسر/لحطه يا اسوة
اسوة/تلفتو انعم
حمزة/خالد تعاله شويا نبيك
خالد/جاي ...طلع
الكاسر/كرم وين شيلة اليد
كرم/شبحله.. هه تبي وحده
الكاسر/غمزله.. اي
كرم/منعيوني ادلل ههه لحضه هي... وطلع مشي لي الغرفة تانية
اسوة/علاش اشيله
الكاسر/باش متعبيش يدك ...غمزله
اسوة/قريب دوخ من معملة الكاسر في عز الي هو فيه ومهتم بيه قمتله حوجبه
كرم/خش مد لي الكاسر شيلة يد... هاك ها
الكاسر/منور ...وقاعد يطلع فها من الكيسة وفتحه وقاعد يسوي فيها وشبح لي اسوة.. تعلي هي
اسوة/مشتله ..اها ...واقفة قدامه
الكاسر/لبسهله في يده وحط الخيط لبسهله في رقبته ويشبح لي عيونه ...خليه هكي يومين متعبيش يدك تمام
كرم/مقعمز ع حشية الطاولة ويتفرح عليه وومبتسم
اسوة/تمام ت...سوي في الخيط
الكاسر/خيرها مضيقتك
اسوة/جاية ع الوشح نضغة
الكاسر/اها... قاعد يسوله فه ..تمام هكي
اسوة/اي تمام يسلمو يا دكثور كاسر
كاسر/هه ويسلمك
اسوة/بتسمت ولفة طلعة لي خالد
الكاسر/شبح لي كرم ...خيرك
كرم/لا شي غير نتفرج ع ملسلسل تركي بس
الكاسر/هه فكني منك وانسا
كرم/رن تلفو ن شبح لقي امه... اهي امي توا نقله ....فتح الخط ...ايوه يا حنينه... ويشبح لي الكاسر
كاسر/جرب قول غير تملي اجرات الولد وراسك
كرم/باهي ها يمه باهي
الكاسر طلع لي صحابه وخالد واسوة روحو
............................................................
في حوش الحجاري.....
اسوة خالد وصلو لي الحوش لقو بوهم مقعمز في الصالة
مسعود/حمدالله ع سلامه
اسوة/الله يسلمك يابوي ..وبساته ع راسه
خالد /اني طلعة ...وطلع
مسعود/شن قلولك
اسوة/رجعولي كتفي توا تمام وعطوني مسكن
مسعود/ردي بالك عاد ع روحك
غالية/طلعة من دار البنات وصكرته... شن صار فيك يابنيتي
اسوة/ردولي كتفي توا باهي كويسا
غالية/باهي حمدالله ع سلامتك
اسوة/الله يسلمك يمه ...واقفة خلي نخش نرتح راسي مصدع
مسعود/بري ارتحي بري
غاليه/اي خشي رتحي وفتحت باب ادار
اسوة /خشت
غالية/ سكرة الباب
اسوة/ شبحت لي خواته لقة نرجس مقعمزة ع سريرها
هبه/حمدالله ع سلامه ههههه
مرام/حي يدك ياروحي ههه
اسوة/وحق ربي ماتنفعو لي حاجة ولا ينعبا عليكم في شي خزي ...وشبحت لي نرجس.... خيرك انتي مده بوزك شبرين... وسلبة وشحه ومشت لي نرجس
نرجس/تبكي حطت يده ع عيونه
اسوة/قعمزة في سرير مرام قدام نرجس... غير فكني من ادموع وفهميني خيرك
نرجس/شن بنقلك بالله بنقلك هم عايشه فيه عزوزتي وحموتي قريب يكلوني مكله وهما ع هتي جيبي حطي وصغار حموتي كل يوم موجدين فديت ملية وراجل من صبح يطلع معاش نشوف وجه لين امتا بيرقد بس
اسوة/هدا وين فهمتي انه سكنه في دار مع العيله متجيش يا نرجس قلتلك من الاول راه يانرجس ردي بالك راه غلاط اني علاش مرضيتش نخد احمد في دار ع خاطر عارفه بيصير هدا كله نستنا خير منتمرمد واهو ربك مدرش نصيب بينا وتم خير ماقاعدة مع في دار وسحنة روحي
نرجس/منحسبش هكي يا اسوة لما جو كلموني قلولي شهور ويبني وراه حموتك مش ديما بيجو وصغار مش حيضيقوك وشفتي اهو ليا 3سنين وعندي زوز اولاد وتاني في بطني مافي حتا بلكه لي حد الان
اسوة/هو بي العقل بالله عليك لو انتي فكرتي صح راه عرفتي انه هدا كله كلام توا معقوله حمواتك معاش بيجو لي امهم ع خاطرك وصغرهم ميبوش يجبوهم معروف يا نرجس انه هدا حوش العيله حوش بوهم يعني الي بتمرض بتجي لي حوش العيله الي بتسافر بتجيب صغارها بتخليهم لي امها الي عنده لمه بتحط صغارها لي امها قصدي واضح وانتي سكنه في حوش العيله يعني بتتحملي الصغار والعزوز يوم كويسه ويوم لا وسلفك الي طلع والي خاش والي بي يكل وبتسيري هدا وهدا هدا كله مجبوره بديري انتي هدا من الاول مفروض فكرتي في هدا كله بيصير
نرجس/لا منحسابش هكي اني وهو مقليش هكي محكلي شي
اسوة/معقوله يجي يقعد بي اساعات ايام الخطوبه انتي ويه في المربوعة تضربو في لقني شن تهرزو اماله
هبه/هههه
مرام/اكيد يبسو في بعض هههه
نرجس/انتي صكري فمك
مرام/باهي سكتا اهو ...وشدة تلفون
اسوة/خلاص معاش تبكي وتحرقي دمك فوتيهم واتفهمي انتي وراجك يكريلك برا ولا يبدا يبني نقي عليه لكن نقي بي طريقه تقنع قليله صغار بيكبرو وين بنحطوهم وجو هدا عبيله راسه خلي يتحرك شويا
نرجس/ان شاءالله
اسوة/حط يده ع كتفه اااه ياربي تعرفو يناري صار مواقف قدامي يقطع القلب
هبه/شن صار
غالية / خشت
اسوة/تلقينا مع حمزة غادي.... وتسلب في شيله
مرام/علاش خيره حمزة... نقزة ع اسوة
اسوة/اااه غادي ياحمار خير جدك يدي
غالية/اختك كتفه خيرك خيره حمزة
اسوة/مخيرشي غير ولد صاحبهم قتل خوه يلعبو في لعبة الببجي يافرخة هبه عصب ناض لي خو قاعد يضرب فيه بي تلفون ع راسه قتله
غاليه/لا حول الله ياربي
هبه/تبصري بالله
مرام/ياروحي عليه
اسوة/يناري كيف يعيط وجت امه تخبط وتعيط قطعتلي قلبي شوفو لحمي ناض شوك شوك
غاليه/الفجي في امه يناري تورهي محروقه مصيبته مصيب يابنيتي ولادها ازوز راه واحد مات وتاني قتله
نرجس/واك عله يناري صرلهم يمه زي جرانه هدوك الي يبصر ع خوه بي المسدس ضربا في راسه
اسوة/حوش فتحي
غاليه/اي يناري هديكا عاد ولده مات قدام عيونها...
وقعدو يهدرزو جبدو قصص قصص لكن غاليه مجبتش سيره لي اسوة انه جين بيخطبوها
اسوة/شافة تلفون... هدي رنده متصله بيا
غاليه/كلمتني بكري خلاص متكلمهش
اسوة/اصلا معنديش رصيد ...وناضت تبدل
............................................................
اما عند الشباب.....
كل وحد دار حاجة قيس وامجد جبو الخيمه ركبوها جاسر وحمزة مشو يجيبو في تومين وبضاعه
اصيل/مع زياد وبوه ودنيا مقلوبه عيطات واصيل يهدي في زياد وزياد قريب يهبل يجري ويعيط وامه تخبط وتندب قريب تهبل
الكاسر/يتم في اجرات اياد في المستشفه لي الدخل
حمزة/تصال بي خالد ....ايوه يا خالد وينك انت
خالد/في الطريق
حمزة/بالله برا لي شارع مهند تعرفه وله
خالد/اي خيره
حمزة/براله بيجيب حاجة لي العزي شوفه غير اني لهي
خالد/تمام... وصكر
............................................................
ساعه 2ونص في لليل.....
اجو هدي شويا الشباب كلهم مع زياد قاعدين
فتح الكاسر نت وقعمز ع الكرسي قاعد ويهدرز ع اسوة
اسوة/متكيا ع الفرش جنب سرير هبه... قاعد في العزي انت
الكاسر/اي منقدروش نسيبة الولد نعرفو
اسوة/باهي بارك الله فيكم شن صير فيه توا
الكاسر/حالته حاله ربي ايصبره متحطم والله وجعني مش عارف حتا كيف بندرله
اسوة/حتا اني وجعني بكري هو وامه ربي يصبرهم الحق
الكاسر/اي نصيبه من دنيا هكي وساعة خوه ع يدي بالله غير خليني فيك شن توا يدك
اسوة/كويسه يسلمو يدياتك بس والله قريب مت لما ردرتهولي
الكاسر/مه وعر بتحسيه اماله شن بس كيف نصل كتفك فهمني واني تعرفي من صبح مشغول عليك ومعاش عرفة كيف نوصل فيك
اسوة/كان عندي مشور اصبح بعدين .....قاعدة تحكيله شن دارة
الكاسر/باهي كويس المهم نبي رقمك فكني من كلمة لا متزدهش عليا
اسوة/هههه توا بدرلي سبلة متزدهش عليا
الكاسر/لا مش سبله بس جو خي منبيش نسمع كلمة لا
اسوة/ابداء كويس ههه
الكاسر/براحتك
اسوة/حسا بي الكاسر مضيق 092....... حطا في عيونك
الكاسر/فرح... في قلبي ياقلبي
اسوة/احم احم هدا بعتنا رقم ولينا قلبك كان بعتنا صورة كيف
الكاسر/تبدي روحي وحياتي ودنيتي كله
اسوة/حتا قلبك ساد اني مش طمع متخفش ههه
الكاسر/بكل انتي ههه بس يشهد ربي عليا انه انحبك تبيه ولا متبهاش قولي كداب قلي الي تبي تقليه
اسوة/شبحت كلمة ...اصلا بنقول عليك كداب طبعن شن هل الحب الي نزال عليك في 3ايام هدا
الكاسر/حبيبتي الحب مش بي سنين ولا بي الايام الحب يجي فجاة ويمشي فجاة خليه في بالك انه حني تعركنا قبل بعدين تعرفنا ههه يعني الحب يجي بعد الكرهية هدا الحب حب راه
اسوة/اكيد الحب يجي فجاة مرة تتعلق بي انسان وتقول كيف تعلقة بس حب مها انت ياودي اها انت مش متع حب اصراحه
الكاسر/غير لحضه بس خليك... ناض طلع ركب في سيارته وتصال بيه
اسوة/شفة رقم صكرة عليه تحسبشي هو كتبتله ع الخاص ...كان مشغول نحكو غدوا
الكاسر/ردي هدا اني
اسوة/به ناضة تجري فتحت دلاب الي جهة الحيط طلعة البطتين كلهم حدفتهم برا وخشت في دلاب شفت لي مرام... مرام تعالي صكري عليا دلاب وعلي في تلفزيون
مرام/به... ناضت صكرة عله وعلة في تلفزيون ولة لي مكانه
الكاسر/تصل
اسوة/ردة عليه ..ايوه
الكاسر/هلا ع اساس انك رزينا ومتبيش تردي من اول مكلمه ورقم غريب دير في جو عليا
اسوة/اي نطلعلك في روحي بريا كيف عاد ضروري من الايتيكية الاول بعدين نورلك ازنبع وين ينبع
الكاسر/ههههههه وين يبعو فيه... ويدخن
اسوة/في تلو جاب
الكاسر/وين تجي هدي
اسوة/ههههههه في خيالي
الكاسر/تجري بيا متتحشميش اصلا انتي متتحشميش ع وجك عندك علم
اسوة/به اي اي اني منتحشمش وسلبوي زفت ومسترجلة ع قولتك وتمام هي معرفة طيبه وليلتك سعيده ياطيب
الكاسر/غير لحضه افهمي قبل ههه
اسوة/صكر ع الخط... مه هدا الي يفتحلكم مجال الهدرزة يبدا مهبول... وطلعة من دلاب... بالله مرام تعلي رديهم ... رقدة في مكانه
مرام/ناضة ترد في البطاطين ....خيرك انتي مسرع
اسوة/طلعة مديرة سريب لي ناس فاضيه
الكاسر يتصل يكلم فه ع الخاص مش معبرتا بكل
الكاسر/حي عله اهيا بكل ازفت في العناد وتصكير راس مش وقتا الغطب بكل ...وبعتله رساله..... مسعوتي والله اسف فهمتني غلاط نقصد متتحشمي ع وجهك انك مابستني لي انه عينتك ياشريره
اسوة/ناض قعمزة يده تسطر فه تقراء في رساله مدورتشي وحطتا في الحضر
مرام/قعمزة ع سريرها تشبح لي اسوة... شن سلسلة الي في رقبتك هدي منوين حي
اسوة/اسكتي... وتاشرله ع نرجس بي معنا تسمع فيك
مرام/لالا رقده ...وناضة قعمزة قدام اسوة
هبه/ناصة قعمزة فوق اسوة ع سريره... اي منوين هدي
اسوة/طلعتلهم اسلسله تهدرز بشوي...ا هدي عطهلي مسعودي ههه
هبه/حي وين لقتي
اسوة/هو الي ردلي كتفي
مرام/كيف
اسوة/قاعدة تحكلهم ...حتا اصيل غادي يا هبه
هبه/الله هههه ياحليلي منه عسل الولد اهو
اسوة/اصيل اكثر واحد متاتر كيف طيح هو الولد حمزة دميات مع بعضه سخفني الولد الحق
قعدو يهدرزو والكاسر يتصل ويبعة في رسائل واسوة مش مدورتا بكل كملو هدرزتهم اسوة تكة في مكانه خشتله صاحبته منال
اسوة/شن مدايرة
منال/مكسده تعرفي بطني توجع فيا هلبا
اسوة/خيرك بالك يخده بردع ولا يكله روز بي الخلطه ره يجع فيك ديما انتي
منال/لالا والله الفترة هدي حتا القرب منقرب فيه بكل كرهتا تعرفي ليا 5شهور مجتنيش دورة
اسوة/انهارك احرف امشي عايني مرة تسببلك حاجة في رحم حي عليك
منال/ اي قرية عله بكري خفة غدوا اصبح بنمشي نعين
اسوة/به عيني وطمنيني عليك كان تبي نمشي معاك عادي
منال/لا عادي توا نمشي ونقلك نبيش نتعبك توا...
وقاعدو يهدرزو لي ساعه 5يحكو لي بعض
وعمك الكاسر معصب بيهبل كيف اسوة تحطا في الحضر ويبعة في رسائل متردش عليه وقعد سهران لي صبح مجشي النوم
............................................................
اصبح يوم المفجاة .......
الساعه10 وربع رن تلفون اسوة واسوة في عز انومه وشعرها ع وجها ملخبط ورقده زي الميتا تسمع في تلفون يشرين فقة قاعدة دور في تلفون وين
هبه/فوق سرير ...يا اسوة ردي ولا صكري نبو نرقدو
اسوة/تي باهي ندور فيه ...لقة تحت سرير جبدته ردة من غير متشوف وحطة راسها ع المخده
منال/اسوووة
اسوة/هاااااا
منال/حي عليا الحقني يا اسوة حي عليا حي عليا
اسوة/خيرك شن فيييه... وهيا ناعسة
منال/يا اسوة اني حامل في اشهر الخامس
اسوة/ههههه باهي الف مبروك منال بلا جو بارده ع اصبح شن تبي بنرقد
منال/والله ندوي بجد ...وبدت تكبي... ياحليلي شن بندير الحقني
اسوة/ناضة واقفة....شنووووووووو
هبه/ناضت ...خيرك
اسوة/عطرة في البطنية تحط... ااه... اوقفة... انتي وين توا ...وفتحت ادلاب
منال/في العيادة الفردس
اسوة/خليك جيتك ...وطلعة بشة ولبسة سبيدروه ويشحه
هبه/غير وين وين شن فيه
اسوة/مافي شي تمرقدي ...وخدة تلفونه وطلعة
غاليه/طلع من الحمام... وين مشية وين
اسوة/منال مريضه تصلة بيا امه نشوفه ونجي
غاليه/بتمشي ع رجليك بعيد
اسوة/فتحت الباب... توا كان نمشيله مرد... وطلعة صكرة الباب وبدة تجري اسوة والبشت يفرفر وسقنه عرينات لبسه جسكار تحت ركبه اسود سبيدرو رصاصي والبشة رصاصي ويشح مجركش ابيض وبدري واسوة مخلط وشد تلفون في يدها وتجري وناس تتفرج عله
............................................................
عند الكاسر.....
فايق هو وصاحبه يوتو لي الجنازة ودنيا مقلوبه عيط وزياد مقطع روحه بي البكي بيهبل مقمز لوطا ع الرصيف ويبكي
زياد/متعزونيش متعزونيش
حمزة /وين الجنازة في اما مقبرة
اصيل/ع بوه امس قال توا نقلكم اصبح
جتسر/توا نساله اني
الكاسر/اسالو خلي نقلو لي الناس الساعه قريب 11 مش عرفين وين ادفن
............................................................
عند توركيا....
تتصل بي لميا
توركيا/ها يبنتي شن صار مرديتيش عليا امس
لميا/قلتلي تفضلو مرحبتين بيكم
توركيا/معنه كلمي اختك وتعلو بكري باش نمشو بعد العصر راه
لميا/باهي حاضر يا امي توا نكلم ليلا ونجو وانتي كلمتي الكاسر
توركيا/لا يمشي غصب عنه بعدين كان معجبتشي ساهل
لميا/به يصير خير
............................................................
عند اسوة ....
تجري دهشة وصلة لي العيادة الفردس لقة منال في البوابه مقعمز وتبكي
اسوة/شدته مع يده تلته ورفعته بين السيارة ....اهدي فهمني شن حامل انهارك اسوة كيف حامل
منال/ياحليلي... تندب في خدوده ...خشيت درولي في الجهاز ورتلي البيبي في الجهاز يا اسوة.... وتندب
اسوة/كيف كيف صار منال كيف بيبي نهار احرف كيف حامل فهميني
منال/ تبكي تبكي وتعيط
اسوة/غير تعلي نشفو حل لي المصيبه هدي وين سيارتك الناس تتفرج علينا
منال/اونه
وركبة اسود اتسوق ومنال جنبه تبكي وتخبط وعمتك اسوة من عياده لي عياده لها ونفس اشي حامل ومفيش كيف يطيحو العيل لي انه خضر ع منال وجنين متكون خلاص واسوة متصفرة عندها وتهزب في منال
............................................................
في المقبرة......
عند الشباب في الجنازة وقفين كلهم ع القبر وتنين ينزال في اياد في القبر وزياد يعيط ع طول حسه ويهدو فيه الشباب والكاسر امه تتصال بيه يصكر عله
زياد/واقف ع القبر ويعيط... لا لا خويا نبيشي ايموت يناس منبيشي يموت توم روحي منبيشي يموت منبيش يعزوني فيه.... ويبكي
كلهم متاترين
كان واحد من الشباب الي شدين زياد حط اسلاح وراء ضهراء شافه زياد
زياد/حط يده ع سلاح..... منقدرش نعيش من غيره والله منقدر ...خدي السلاح منه وسحب سلاح بسرعه وحطا ع راس
حمزة/شبحله.... لا زياااااااااد
زياد/ ضرب رصاصة جة في راسه طح مع خوه في القبر
اصيل/شد راس... لااااااااا
جاسر /طح ع ركابه
الكاسر/حط يدي ع وجه
بوه زياد /طح عر ركبه وحط يدي ع راسه... لا اولادي ياربي لا
حمزة/نقز في القبر يقيم في زياد.... علاش يا زياد علااااش
............................................................
عند اسوة.....
في السياره تسوق تصالة بيه امها
اسوة/تسوق وتتكلم ...ايوه هاا
غالية/وينك روحي هيا بيجونا ناس
اسوة/يمه توا نروح غير مع منال في المستشفه
غالية/متعطليش في ناس جاين يخطبو فيك مع العصر
اسوة/قدش ما انتي ريقه غير اجليلي عرسانك توا مش فاضيه
غاليه/والله متروحيش قبل العصر نحرش فيك خالد
اسوة/حرشي تي من قلك نبي نتزوج اني منبيش نتزوج غير نروح نتفهمو يمه ...وصكرة
اسوة/مع من درته عملة السوده هدي وين وين رفعك من هو..وتشبحله
منال/تبكي ....في سياره درنه
اسوة/منو هو تكلمي خلي نكلمو منو هو
منال/شبحت لي اسوة هو يكون .........
اسوة/شدة فرينو...... انعممممممم منو 😯

.................................................................
.................................................................
______________________________________

______________________________________

#Jule Akrsoa ℘₰ﮩ℘₰ﮩ℘₰ﮩ✍