Telling Ghost Stories At My Ex-boyfriend's Wedding [去前男友婚礼上讲鬼故事]

4

ထို့နောက်မှာတော့ ဘဝကူးတံတားဖြတ်ပြီးသွားတဲ့လူတွေက ကိစ္စသေးသေးလေးတွေဆို မေ့သွားတာ ပုံမှန်ပါပဲဟု ပညာရှင်ဆန်ဆန် ထည့်ပေါင်းပြောလိုက်သေးသည်။

ကျွန်တော် သက်ပြင်းသာသာချပြီးသာ မျက်ဆန်လှန်ပြလိုက်သည်။

လိမ်၊ မင်း ဆက်ပြီးသာ လိမ်။

ဆူးယွီ ဘာမှပြန်မပြောပဲ တိတ်နေပြီး အတော်ကြာမှ တိုးလျလျ ထရယ်သည်။ နှုတ်ခမ်းလေး တစ်ဖက် ကော့တက်သွားရုံနှင့် ကျွန်တော့်ရင်ကို ကလိထိုးသလို ဖြစ်စေသည့်သူက ပြောလာသည်။

"သူ ကျွန်တော့်မွေးနေ့ကို မမေ့နိုင်လောက်ပါဘူး။"

46.

...... ဆူးယွီ၊ မင်းက တကယ်ခွေးကောင်ပဲ။

47.

ပင့်ခေါ်သူဆရာကြီးက ကို့ရိုးကားယားနိုင်စွာ ပြုံးရင်း ခြောက်ကပ်ကပ်ပြန်ပြောလာသည်။ "အဲ့လိုဆိုရင်တောင်မှ မေ့သွားရင် အစဖော်ဖို့ နည်းလမ်းမရှိတော့ဘူးလေ။ အလှုရှင်၊ မင်းရဲ့ ပူဆွေးသောကတွေကို ချုပ်တည်းထားပါ။"

ဆူးယွီ ဒီဆရာကြီးဖြစ်သူက အလိမ်အညာဆိုတာ သတိထားမိသလား တမင်ပဲ လုပ်နေသလား ကျွန်တော် သေချာမသိ။ သူ ဒီအကြောင်းကို ဆက်မပြောတော့ပဲ အခြားအရေးမပါသည့် ကိစ္စအနည်းငယ်သာ မေးမြန်းလာသည်။ ဆရာကြီးဖြစ်သူကလည်း မျက်တောင်တစ်ချက်မခတ်ပဲ မဟုတ်တမ်းတရားများ စတင်ပြောဆိုတော့သည်။

ကျွန်တော် သူ့ရဲ့ မဟုတ်တရုတ်စကားများကို နားထောင်ရတာ ပျင်းရိလာချိန်မှာပဲ ပင့်ခေါ်သူ ဆရာကြီးက သက်ပြင်းဖွဖွချပြီး ပြောလာသည်။ "သူ ပြန်ရတော့မယ်တဲ့။ နောက်ဆုံးအနေနဲ့ သူ မင်းကို ပြောချင်နေတာတွေကို ငါ ပြန်ပြောပြပေးမယ်။"

ကျွန်တော် ဆူးယွီပခုံးအနားသို့ မျောလွင့်သွားကာ ထိုင်ချရင်း သူနှင့်အတူ ဆရာကြီးအား ကြည့်နေလိုက်သည်။

သူ ဘယ်လိုမဟုတ်တဲ့အကြောင်းတွေ ထပ်ပြောလာမလဲဆိုတာကို ကြားရဖို့ ကျွန်တော် စိတ်အားထက်သန်နေမိသည်။

48.

ဆူးယွီ မျက်မှောင် အနည်းငယ် ကြုတ်သွားသည်။ သူ ခေါင်းစောင်းကာ သူ့ညာဘက်ပခုံးကို လှမ်းကြည့်ပြီး သူ့လက်နှင့် ထိကိုင်လိုက်သည်။ သူ့လက်က ကျွန်တော့်ခန္ဓာကိုယ်ကို ကျော်ဖြတ်ပြီး သူ့အင်္ကျီကိုပဲ ထိသွားတာကတော့ စိတ်မကောင်းစရာပင်။