Way Back To You (completed)

WBTY - 3

'Jimin shi နိုးလာပြီလား။ သက်သာရဲ့လား။'

Jimin ယောင်ယမ်းပြီး ခေါင်းငြိမ့်ပြလိုက်မိသည်။ ဘယ်က ဘယ်လို။ သူ့ကို ကူညီပေးခဲ့သူက Jeon Jungkook တဲ့လား။ သူမရေမရာကြားလိုက်ရတဲ့ နာမည်ခေါ်သံက Jeon Jungkook ဆီကပေါ့။ ဒါဆို ဒါကလည်း သူ့အခန်း။ သူ အိပ်နေခဲ့မိတာ Jeon Jungkook ဆိုတဲ့သူရဲ့ အိပ်ယာထက်မှာ။ ဒါက အိပ်မက်တစ်ခုလား။ ကံတရားက သူတို့နှစ်ယောက်ကို ဘယ်လိုတောင် ဆုံစေလိုက်တာလဲ။

လူကို စူးစိုက်ကြည့်ပြီး အတွေးများနေပုံရတဲ့ သူကို Jungkook ပြန်ငေးလိုက်မိသည်။ ပျော့ခွေကျသွားတုန်းက သူ ဘယ်လောက်ထိစိုးရိမ်သွားလဲ သူသာသိသည်။ ပေါ့ပါးနေသော ကိုယ်လုံးငယ်လေးသည် ရက်အတော်ကြာ အစာအာဟာရပျက်နေခဲ့တဲ့ သူတစ်ယောက်လို။ Jimin ဒီတိုက်မှာ နေသည်ဆိုတာကို သိပေမဲ့ ကိုယ့်အခန်းထဲကိုပဲ ခေါ်လာခဲ့လိုက်သည်။ ညတွင်းချင်း ဆရာဝန်ခေါ်လိုက်ရပြီး ဆေးချိတ်ပေးလိုက်ရ၏။ အားနည်းပြီး ပင်ပန်းသွားသည်ဟု ဆရာဝန်က မှတ်ချက်ပေးပြီး အစားဝင်အောင်ကျွေးဖို့ကိုလည်း မှာသွားသေးသည်။ မနက်လင်းခါနီး နိုးလာရင်စားဖို့ ဆန်ပြုတ်ပြုတ်ပေးနေမိခြင်း။ နံရံပေါ်က နာရီကတော့ မနက် ၅နာရီဆိုတဲ့ အချိန်ကို ပြနေသည်။

Jungkook က ဆိုဖာခုံတွေဆီ လျှောက်သွားပြီး လက်ထဲက ဗန်းကို စားပွဲပေါ်တင်လိုက်သည်။

'ထိုင်ပါဦး'

Jimin က ခုံတစ်ခုမှာ ဝင်ထိုင်လိုက်ပြီးမှ Jungkook ကို ကြည့်လာသည်။ Jungkook ကို မေးခွန်းတွေ မေးချင်နေပုံရ၏။ Jungkook က ဘာမှ မပြောသေးဘဲ ဆန်ပြုတ်ပန်းကန်ကို Jimin ရှေ့ ချပေးလိုက်သည်။

'အားရှိအောင် အရင်ဆုံးစားလိုက်ပါဦး။ ပြီးမှ ကျွန်တော်တို့ အေးဆေးပြောကြတာပေါ့။'

Jimin က ဆန်ပြုတ်ပန်းကန်ကို ငုံ့ကြည့်လိုက်မိသည်။ မွှေးပျံ့ပြီး စားချင်စဖွယ်ဖြစ်နေသော ဆန်ပြုတ်ပန်းကန်ကို ကြည့်ပြီး သူ့ရင်ထဲမကောင်းဖြစ်လာသည်။ ပျို့ချင်သလိုလို အန်ချင်သလိုလို။ သို့သော် Jimin ထိုခံစားချက်ကို အောင့်အီးကာ မြိုချထားလိုက်၏။ စေတနာနှင့် လုပ်ထားပေးသူရှေ့မှာ ဖြစ်ပျက်ပြနေလို့ မသင့်တော်ပါ။