رواية بعينيكِ أسير بقلمي شهد الشورى

الفصل الثامن والعشرون

ثم صرخت بعلو صوتها غاضبة :
المفروض السؤال للكل انتوا يترد عليكم يتقال ايه

اشارت لمجموعة من الفتيات قائلة بغضب.:
لما انتي بنت زي و بترمي عليا بالكلام و جايبين
اللوم عليا بدل ما تدافعوا عني و كل واحدة حطت نفسها مكاني يترد يتقال ايه

ثم اشارت لمجموعة شباب قائلة بغضب و صوت عالي ليسمع الكل :
لما كل واحد فيكم يرمي عليا بالكلام حضرتك مفكر نفسك راجل كده يعني

ثم اشارت ليزن قائلة باحتقار و نظرات مشتعلة بالغضب و النفور :
لما واحد زيه أقل كلمة تتقال ليه انه مش راجل و لا ينفع واحدة تأمن على نفسها معاه و تثق فيه

ضحكت بسخرية ثم تابعت بحدة و سخرية مريرة :
بعد كل اللي عمله فيا و دمر أجمل يوم بتعيشه كل بنت و خلاني اعيش كابوس كان ممكن اخسر حياتي بسببه جاي يقولي اسف !!

صرخت بغضب و هي تدفعه بكتفه بقوة ارتد على اثرها للخلف :
يترد يتقال ايه !!!

انخفضت الهمسات و الجميع يتابع بصمت سرعان ما تعالت الشهقات من الصدمة عندما رددت همس بغضب و هي تراه ينظر لها بندم :
أقل حاجة يترد بيها عليه واخد حقي منه بيها

صمت للحظات و هي تحك اصابع يدها ببعضها ثم بلحظة هوت بها على صدغة بقوة مرددة بغل :
القلم ده لو كان حد من اهلك ضربوا ليك زمان كنت اتعلمت ان بنات الناس مش لعبة يوم ما تعوزها تقرب ويوم ما تعوز تبعد تبعد

ثم تابعت بصراخ عالي و اشمئزاز :
اللي قدامكم ده جالي وفضل يترجى فيا عشان اقبل بيه و بعد ما قبلت جاي يوم فرحنا يقولي اسف مش هقدر اتجوزك ، دلوقتي كمان جاي يعتذر تاني يقولي اسف ع اللي عملته كأنه خبط فيا بالغلط و مسببش ليا فضيحة بين كل الناس

ثم تابعت بحدة و هي ترى الصدمة مرتسمة على ملامح وجهه من فعتلها و شعور الاهانة تملك منه :
يترد على كلمة آسف بتاعتك دي انك واطي و ندل و ملكش أمان و اي واحدة تفكر ترتبط بيك هتضرب نفسها بالجزمة بعدين عشان عملت في نفسها كده ، اللي تقبل بيك هتعيش حياتها معاك كلها في خوف ، هتبقى خايفة طول الوقت من ندالتك

ثم تابعت بغضب و هي تشير له بيدها من أعلى لأسفل باحتقار :
اللي حصل مكسب ليا مش خسارة ، ده من رحمة ربنا انه حصل كده عشان اسمي ما يرتبطش بأسم حيوان زيك و أعيش حياتي كلها اندب حظي اني قبلت بيك

تدخل كارم قائلاً :
كفاية يا همس !!

نفت برأسها قائلة بغضب :
لأ مش كفاية كام شهر فات ع اللي حصل و انا بس اللي شيلت اللوم و العتاب من الكل دلوقتي جيه الوقت اللي كل واحد يعرف مقامه و يعرف مين اللي غلطان مع انه معروف بس احنا بقى في مجتمع متخلف دايما اللوم ع البنت و الراجل يا عيني ملاك نازل من السما مش بيغلط

كانت ميان تتابع البث المباشر و هي تضحك بسعادة و فخر بصديقتها مرددة :
عاش يا اجدع و أجمل صاحبة في الدنيا