သို့သော်လည်း မကြာခင်ချင်းမင်တောင်သို့လိုက်သွားရတော့မည့်အကြောင်းကိုတွေးမိသောအခါ ရှောင်ရှင်း၏ကြည်လင်နေသောစိတ်သည် ကြမ်းပြင်ပေါ်သို့လိမ့်ဆင်းသွားသည့်ချည်လုံးတစ်လုံးလိုရှုပ်ထွေးလာသည်။ ချင်းမင်တောင်သို့ရောက်လျှင် ချင်းမင်လည်းရှိသလို ချင်းမင်ကဲ့သို့အစွမ်းထက်သော အခြားဆရာသခင်များလည်းရှိသည်။ ထို့နောက် အခြားဘယ်ဂိုဏ်းမှာမှမရှိသော ပထမအဆင့်အစီအရင်ကြီးတစ်ခုကလည်းရှိနေသေးသည်။ သူ့လို မိစ္ဆာတစ်ကောင်အနေဖြင့် တစ်ယောက်တည်း ချင်းမင်တောင်သို့လိုက်သွားခြင်းသည် သားရဲတွင်းထဲခုန်ချသည့်ယုန်သူငယ်လို မိုက်ရူးရဲဆန်ရာကျလွန်းသော်လည်း သူသည် ဝမ်ရှန်းနှင့်နေခွင့်ရရန်အတွက် ထိုသားရဲတွင်းထဲကို ပျော်ပျော်ကြီးလိုက်ပါသွားရပေဦးမည်။
ရှောင်ရှင်းသည် အတွေးများထဲတဝဲဝဲလည်နေရင်း ချင်းမင်သာ သူ၏ဘဝအမှန်ကိုသိလျှင် အနှေးနဲ့အမြန်ဒုက္ခရောက်နိုင်ကြောင်းကို တွေးမိသောအခါ အသံမထွက်ဘဲရယ်မောလိုက်သည်။ သူသည် ချင်းမင်သိသွားပါလျှင် ရင်ဆိုင်ရမည့်ပြသနာများကိုတော့ စိုးရိမ်မိ၏။ လူသားများအပေါ်ကြင်နာတတ်သော၊ ဆရာသခင်ကိုချစ်မြတ်နိုးသော ဝမ်ရှန်းကချင်းမင်ကိုသာ နောက်တစ်ကြိမ်ကာကွယ်ပေးပြီး မိစ္ဆာဖြစ်သော သူ့ကိုနောက်တစ်ကြိမ်စွန့်ပစ်မှာစိုးရိမ်မိသည်။ သို့သော်လည်း ကြောက်ရွံ့ခြင်းဆိုသည်မှာတော့ ရှောင်ရှင်းအာဆိုသောသူနှင့်လာလားမျှမသက်ဆိုင်သောအရာသာဖြစ်ချေ၏။ သူဆို သည်မှာကား အသက်ရှင်နေသမျှကာလပတ်လုံးတွင် ဘယ်သူ့ကိုမှဂရုမစိုက်ဘဲ စိတ်ထဲရှိသမျှအရာအားလုံးကိုလုပ်လိုက်မည်။ အကျိူးဆက်က သူ့ကို နာကျင်စေမည်ဆိုပါက သူသည် နာကျင်မှုကိုကျေနပ်စွာခံယူလိုက်မည်ဖြစ်ပြီး သေဆုံးစေမည်ဆိုပါကလည်း နောင်တတရားမရှိဘဲ ခနဲ့ပြုံးတစ်ခုသာချန်ရစ်၍ သေဆုံးပေးလိုက်မည်ဖြစ်သည်။
ရှောင်ရှင်းသည် မျက်စိစုံမှိတ်ကာ အတွေးများကိုရပ်ပစ်လိုက်ပြီး ထထိုင်လိုက်သည်။ ထို့နောက် ဖရိုဖရဲပြေလျော့ကျနေသော ဆံနွယ်ရှည်များကိုဖြေချလိုက်ပြီး သေသေသပ်သပ်ပြန်လည်စည်းနှောင်လျက် အဝတ်အစားသစ်တစ်စုံကိုလဲလှယ်ကာ ဝမ်ရှန်းကိုထားရစ်၍ အခန်းထဲမှ ထွက်သွားပေတော့ သည်။
YOU ARE READING
ပြန်လမ်းကြယ်ဝေ စောင်းကြိုးပြေ (BL OC) Complete
General FictionStarting Date 11Apr 2021 - Ending Date 30Sep 2021 Unicode ရှောင်ရှင်းအာ ဆိုတာကတော့ လူတွေကြားထဲမှာ လူသားဟန်ဆောင်ပြီးလှည့်ပတ်သွားလာနေတဲ့ အရမ်းကိုဆိုးသွမ်းလွန်းတဲ့အမြီးကိုးချောင်းမြေခွေးနီတစ်ကောင်ဖြစ်ပါတယ်။ နှစ်တစ်ထောင်မှာ တစ်ခါသာမွေးဖွားလာနိုင်တဲ့ အဆိ...
Chapter 35
Start from the beginning