"إلا أن يشاء الله"

الجزء الأخير القسم الاول

✒..
"ياستار..شن صارلك..يااختي تسمعي فياا"
دعاء..
واني حاطه يدي ع جبهتي وحاسه بألم وعيوني مغمضتهم بقوة حسيت بدوخه فعلا..نسمع في صوت رجولي يكلم فيا خشت في وذني كلمة"تسمعي فيا!!" وهني فتحت عيوني وشفت قدامي...شي ماعرفتش شن هو بالزبط..حلم ولاعلم..ملك من ملايكة ربي متجسد ع هيئة بني آدم!! في حياتي ماريت راجل بهالجمال فيك ياليبيا..
قعدت نشبحله واني شاده راسي وهو يقولي "تحسي بحاجه" واني وقتها ماكنت حاسة بشي لعند ماسمعت زوز اصوات نسائيه..صوت امي مداخل مع صوت تاني مانعرفاش..
جميله شدت بنتها من ذراعاتها من الخلف وقالت بخوف:خيرك بنتي شن صارلك!؟
رجاء:شن تحسي حبيبتي!؟دايخه!..
فركت دعاء جبهتها وقالت:لالامافي شي..
جمال وهو يشوفلها بضيق قال:اسف جدا ..
دعاء نزلت عيونها لوطا خجلا وقالت:لامافيش مشكله حصل خير..هي تعالي ماما..
ومشت هي وجميله..وقعدوا جمال ورجاء واقفين يشبحولهم..
جمال:عليك موقف..
رجاء بضحكه:عادي تصير..بتكمل دورتك ولاتجي تقعمز...
شبحلها بعدين تنهد بإبتسامه وقال:خلاص معاش فيها دوران نقعمز معاكم وخلاص..
رجاء تعنقت ذراعه وقالت:هي تعالى..
هو احتفظ بإبتسامته ومشي مع اخته للطاوله اللي فيها خواته وقعمزوا..
🌷بينما دعاء وامها مازالو يتمشوا..
جميله:خبطة قوية شكلها جبهتك حمرا..
دعاء حطت يدها عليها وقالت بضحكه:في الاول وجعتني وتوا عادي..
جميله:يمشي بلاعيون..
دعاء:حتى اني كنت لاهيه بتليفوني..
جميله:هو اللي خبطك مش انتي..
دعاء بضحكه:خلاص ياماما ماصار شي..
وكملوا يتمشوا هما الزوز..
جميله كانت تمشي شويه وتقعمز بينما دعاء ماقعمزتش بكل..
استغلت الفرصه وقعدت تقرا في اذكار المساء وبدت تسبح وهي تمشي..
وفي نفس الوقت..
ع طاولة جمال وخواته..
كانوا البنات ياكلوا ويهدرزوا وهما صغارهم..
وجمال يسمع بس..
او في البدايه كان يسمع بس..لكن بعدين حتى بالسمع مش معاهم..
عيونه الخضرا المزرقه كانت تلحق في البنيه اللي كلت منه خبطه قبل شويه..
في شي شده ناحيته من لما جو عيونه فعيونها بعد فتحتهم وشاف فيهم ميزة جذباته هلبه..
بس في الحقيقه اكثر شي لفت انتباه جمال ليها علاقتها بأمها ..ولبسها..وكيف تمشي غاضة البصر وين يفوت جنبها راجل..
شويه وشاف راجل في اواخر الخمسين جاي هو وولد يافع بإتجاهها بعدين شافهم يتكلموا وركز ع الضحكه اللي ارتسمت ع وجهها وكأنها سمعت خبر حلو..
وهالضحكه خلاته تلقائيا يبتسم ابتسامه خفيفه..
بعدها شافهم مشوا التلاته للطاوله اللي مقعمزة عليها امها
ولاحظ الام حتى هي ضحكت بعد كلموها واضح سمعت شي فرحها زي مافرح بنتها..
هام معاهم جمال ونسي روحه هو وين مقعمز ومع مني..
لعند مااستاقظ ع صوت اخته آلاء تقول:جمااال وين رحت!!؟
مرر نظره ع خواته لقاهم يشبحوله ضحك وقال:نفكر في الخدمه اللي بنبدا فيها من غدوة بإذن الله..
نجلاء:بإذن الله موفق حبيبي راك تنسى انك دكتور الله يبارك وواخد الدكتوراه في مجالك في اوكرانيا بلاد طب العيون يعني انت مكسب لأي مكان تخدم فيه..
ابتسم جمال وخدي من اخته الاء فنجان النسكافيه وقال:إن شاء الله خير..
رشف من النسكافيه ورجع بنظره للمكان اللي فيه العيله..
لقاه فاضي..
مش عارف وقتها علاش حس بضيق في صدره لدرجة ان ابتسامته اختفت..وقعد يشرب من النسكافيه بملامح وجه بادي عليها الضيق..
⚘⚘⚘⚘
كان هداكا اليوم الوحيد اللي رافقت فيه دعاء امها بش تتمشى لانها بدت بعدين في دروس تعلم القياده مع قرايتها معاش لهت بشي تاني وقعد محمد هو اللي يساير في مرته بس..
اما جمال..
فمشي بعدها اكثر من مرة غادي وكان في رغبة شديده في داخله انه يرجع يشوف "الحوراء" زي ماهو سماها كان يشوف في بوها امها يوميا لكن هي لا..وهالشي زاد ضايقه هلبه لهدت معاش بدي يمشي..
وتفرغ تماما لعمله بين مصحه وعياده..ومرة مرة يدير دورة ع رزقه اللي قعد فترة يديرله فيه عمه..
🌻🌻🌻🌻🌻
ومر شهر..
ودعاء دارت امتحاناتها وكملت قرايه خلاص وقعد المشروع اللي كانت تخدم عليه هي والاستاذه اللي اشرفت ع مشروع اختها رويدا..
⚘⚘⚘⚘
في يوم من ايام شهر يناير 2021..
كانوا ملتمين في الحوش..
جايه رويدا وجيتها جت مع حدث صاير في العيله خلال هالشهر..
رويدا:تي والله لما نمشي اني واخده لبس مناسبات ع خاطر عرس صاحب عبدالله خل نضرب عصفورين برشاده..
ضحكوا خواتها..
دعاء: قالوا ازدهار مروحه..
رويدا:طيب فيها..بصراحه صخفتني كل شي فايتها الفرح والحزن راجلها لهالدرجه مايقدرش يسيب خدمته!
وفاق:يقولوا يخدم في منصب مهم غادي مايقدرش يخليه ولايبي يبعتها هي بروحها ليلى تحكي يومها قالت دارتله مرداح بش خدي اجازة ويجوا يحضروا عرس ابراهيم..
مروة:وجعتني الحق الغربه واعره..
تنهدت رويدا وقالت:ايه والله..
ع جية جميله قعمزت حداهم وقالت:توا كانت تكلم فيا ناهد من غدوة بيمشوا غادي..
رويدا :هو عرس صاحب عبدالله في نفس السبوع اني نقسم الايام اللي بنحضر فيهم هني وغادي..
وفاق:محي مش حيخليني نمشي الا يوم الكسوة..
رويدا:شكله واعر محي..
وفاق:هو كويس وحنين لكن في حاجات راسه مصكر فيهم..ويحب كل شي يمشي بالمسطره متعبني شويه..
جميله:معليشي هلبه رجاله هكي..
رويدا:عكس عبدالله فوضوي ولامبالي يحرقلي في دمي من بروده مرات..
مروة:هدا الياس مايعدلش بكل يخش بيدور ع حاجه يقلب الدار كلها ويطلع ويخليني نضم وراه ولما نعارك يقولي خليه تو نضمه اني..
ضحكوا امها وخواتها..
بعدين قالت جميله:كل غزال فيه لولا..
رويدا:ايه صح..
جميله:راك تتحشمي..
ضحكت رويدا وخواتها شدوا ضحكتهم بعدين قالت جميله:ع سيرة الغزال خطر عليا الراجل اللي ضربك نهارها يادعاء..
كلهم بصدمه:ضربها!!
ضحكت دعاء وقالت:خبطني بدون قصد حادث عرضي يعني..
مروة:تي احكولنا فهمونا شن قصته هدا..
وحكت جميله الموقف للبنات وهما يسمعوا ويضحكوا..
جميله بضحكه:لكن عليك شاب الله يبارك ابيض احمر زي التركي والعيون تقولي زرق وطويل ماشاء وعريض..
رويدا بضحكه:كان اني خطفته..
جميله:تحشمي ياحمارة..
ضحكوا البنات..
اما دعاء فكانت مكتفيه بإبتسامه وهي سرحانه بتفكيرها تذكر في هداكا اليوم..
⚘واللي يهدرزوا عليه كان في حوش اخته..
خطم عليها بعد روح من العياده تغدى عندها وبعد الغدي دارتله شاهي وقعدوا يشربوا فيه مع بعض ويهدرزوا..
نجلاء وهي تشرب في الشاهي:شردها مسكينه كان يضرب فيها ويحبس فيها ودار فيها البهادل وقالت بعدين يجي يرضيها بهدايا غاليه وحاله ينقلب فجأة مع الوقت عرفت انه مريض نفسي قعدت تفتش وراه لين عرفت انه فاتح ملف في وحده من المصحات النفسيه..
جمال وهو عاقد حواجبه ومصدوم:وكيف اطلقت منه!؟
نجلاء بحزن:حصلت فرصه حكت فيها لامها اللي صاير معاها كله وامها قريب هبلت خبرت بوها طول وهو وعمامه لموا بعض وسافرولها وخدوها منه بالقانون بعد ممكن عام هكي طلقها..
جمال بأسف:تس تس تس..باهي شن دايره توا..
نجلاء:مسكينه قعدت تعالج عند الطب النفسي حتى هي بعد اللي راته وتوا ولى حالها باهي..بوها فتحلها عياده وبدت تخدم فيها ليها عام ونص نفسيتها مع الخدمه زادت تحسنت..لكن كرهت حاجه سماها رجاله بالمرة ومصكره ع موضوع الزواج بكل..
جمال:عندها الحق اللي راته مش شويه..
نجلاء:ع فكره تسلم عليك..
جمال هز راسه وقال:الله يسلمها..
تنهدت نجلاء وقالت:باهي وانت جملو امتى تنوى؟
عقد حواجبه بإستغراب وقال:ننوى شنو؟!
نجلاء:تتزوج..
حط طاسة الشاهي ع الطاوله وقال؛الحق حاليا مش مفكر في الموضوع نبي ناخد وقت نتعود ع الوضع ونستقر في الخدمه بعدين يصير خير..
نجلاء:ماطولش باهي..
شبحلها برفعة حواجب..
ضحكت وقالت:خاطرنا في عرس..
جمال ضحك وحرك راسه يمين ويسار..
ونجلاء قعدت تصفق وتغني :
ياعندي وخي تقول غزال..نراجي في عرسه مازال..
جبد شنتروا محطوط ع الطاوله وحدفه عليها وهي شداته وتضحك..
⚘⚘⚘⚘
وبدي عرس ابراهيم..
وعيلة محمد كانوا كلهم غادي..
لقاء البنات مع ازدهار كان حميمي هلبه وهي شدتهم وقعدت تهدرز عليهم بالوحده..
ازدهار بضحكه:درتوا زوز زيي..
رويدا:خير وبركه نراجوهم يكبروا وبعدين نزيدوا..
ازدهار:والله نفس تفكيري..
وفاق:اني نراجي نتخرج قبل مانبي شي يوقفتي في اخرها..
ازدهار:تفكير سليم..وانتي دعاء سمعت انك قريب تتخرجي حتى انتي..
دعاء:ايه مناقشي اخر شهر واحد ان شاء الله..
ازدهار:باهي موقفه يارب..
دعاء:امين..تسلمي..
ازدهار:صدقيني البنت شهادتها اهم من كل شي في الدنيا هي  بس اللي تلقاها بعدين كان دارت عليها الدنيا..
دعاء:صدقتي بالذات في وقتنا هدا..
⚘⚘⚘⚘⚘⚘
كانت اجواء عرس ابراهيم حلوة بالمره..
مروة ماحضرتش منه كان يوم سهريه عاديه بدون منظومه واغاني..
اما رويدا حضرت الكسوة والحفله اللي دارها في الصاله..
دعاء..
جاته حفله حلوة هلبه..والعروسه قنينه لكن الحق ياربي اختي رويدا احلى منها..
وصار موقف كان محرج شويه..لما جتنا عمتب عيشه ونوضتنا بش نسلموا عليه..
دعاء:مبارك عليكم ربي يهنيكم ان شاء الله..
ابراهيم ومرته:الله يبارك فيك..
ابراهيم:ان شاء الله نفرحوا بيك بنت عمي..
ابتسمت دعاء وقالت:تسلم..
رويدا؛الف مبروك ربي يهنيكم..
ابراهيم ابتسم وقال:الله يبارك فيك بنت عمي..
العروسه:رويدا صح؟
رويدا شبحت لأبراهيم بعدين شبحتلها وقالت:ايه..
ابتسمت العروسه وقال:الله يبارك فيك..
رويدا ابتسمتلها..
دعاء..
طبعا وفاق ممنوع عليها تتعامل مع ولاد العيله هادي اوامر محي وهي تنفذ وطبعا طاعة الزوج واجبه..بس كل خوفي كان لو تتنازل وفاق هلبه وتخليه يلغي شخصيتها..الحق ماكنتش نحساب محي صعب هكي..بس عادي تمشي الحياة اهم شي ان يحبها وحنين معاها ومامنقص عليها شي..
⚘⚘⚘⚘⚘⚘
وتخرجت وفاق وتخرجها نهي التصادمات اللي بينها وبين راجلها لأن كان غيور هلبه ولانه عطاها كلمه تكمل عنده ماقدرش يولي فيها ويوقفها..
دعاء..
وبعدها ايودي باسبوع تخرج من كلية الاقتصاد قسم المصارف والحمد لله في الحفلة متاعهم ماصارش اللبز اللي يصير للمتخرجين بالعكس انزفوا زي العرسان..
والباين ان مؤيد كان يبي يولي عريس بالحق..
⚘"بنت خالتك نجيمه!!"
مؤيد وهو مبتسم بإحراج:ايه يام نبي نخطبها..
جميله:باهي والشقه متاعك مازال مش كامله..
مؤيد:اني ماقلتش نبي ندير العرس توا نبي يعني نربطها بيا يام..
جميله بضحكه:باهي ياسيدي تو نربطوها بيك..
مؤيد ناض وهو مبتسم بإحراج ومشي طلع من حدا امه وخلاها تضحك وهي اطيب في الغدي..
وشويه وخشت دعاء للحوش مروحه من الكليه..
بدلت..وتوضت وصلت..بعدين خشت ع امها الكوجينه..
خدت تفاحه من جاط الفواكه المحطوط ع الطاوله وقالت لأمها:شن جو ماما؟
جميله:تمام..
دعاء:مافيش اخبار جديده؟
جميله وهي تقرض في المعدنوس:بكري كلمتني وفاق..
دعاء وهي تاكل فالتفاحه:امم..شن جوها..
جميله بضحكه:حامل..
دعاء ضحكت وهي تاكل وقالت:ماشاااااء..الله..هالفزغوله بتولي ام..
وجميله تضحك وهي تحط في المعدنوس في الطنجرة بعدين التفتت لدعاء بتقوللها تمدلها كاشيك لوح..شويه ضيقت عيونها وقالت:عينك اليمين مازال توجع فيك..
دعاء:امم..بس قاعده مستمره ع القطره اللي عطتهالي الدكتورة.
جميله:هالدكتورة نحس في دوتها فاضيه شوفي غيرها..
دعاء:لالا ماما كيف باديه اني تو مع الوقت تتحسن ان شاء الله..
جميله:باهي ع راحتك..جيبيلي كاشيك اللوح ترا..
دعاء:حاضر..
مدتلها كاشيك اللوح خداته جميله وهي تضحك..
دعاء:امم..ضحكيني معاك ماما..
غطت جميلة الطنجرة وحطت كشيك اللوح فوقها وهي تقول: ياحنه مؤيد بكري كلمني قال يبي يخطب بنت خالتك نجيمه..
دعاء:ههههه..والله حسيت في بينه وبين وصال حاجه باهي..لاحظتهم من مشياتنا الأخيره في الصيف..
جميله:الحق وصال هويديه وفالحه هلبه طقاشة ماشاء صح مواليد 2001 لكن تهني..
دعاء:وشن مواليد 2001 صغيرات ياماما كبروا خلاص راهو..
جميله ابتسمت ابتسامه تخفي ضيقها ع حال بنتها اللي قريب تخش 32 عام ولتوا قاعده..والاصغر منها والاكبر منها في العيله كلهم تزوجوا وخطبوا ولاد وبنات وحتى اختها الاصغر منها بستة سنين متزوجه وقريب ادير صغار واهو خوها حتى هو يبي يخطب..
دعاء..
من نظرة عينها ماما نعرفها واكله همي هلبه هلبه..بس بعد اللي صارلي مع رضوان حرمت تفتح معاي سيرة الزواج بكل من خوفها عليا..وفي كل الحالات قاعده تخمم فيا..
ماما برغم وعارتها معاي في هلبه مواقف بس اني متأكده انها تحبني وتخاف بشكل لايوصف..
المهم..
مشينا خطبنا للسي مؤيد اني وياها ومروة وشرقيه..ايه مال شنو حبيبها مؤيد لازم تخشله في حاجه زي هادي..
وطبعا خالتي عطتنا من غير ماتشاور بنتها تي ع اساس ماتعرفش اللي فيها..ههههههه..وشدينا الست وصال لأيودي ع قولت رويدا ههههه..
⚘⚘⚘⚘
في الكليه..
وخرت عن اللاب توب وحكت عينها وهي تقول:تمام هكي خلاص ولا؟.
المشرفه:ايه خلاص واخيرا..ضيقت عيونها وقالت..خيرها عينك دعاء؟!
دعاء:مش عارفه برغم اني مشيت عاينت وعطوني عليها قطرة لكن بلا فايده..
المشرفه:ننصحك تمشي لعيادة ****** التخصصية عندهم دكتور تبارك الله عليه..والكشف عنده مش غالي عاين عندي راجلي المده اللي فاتت ويشكر فيه هلبه..
دعاء:باهي زعمه كان مشيتله بعدين نلقاه؟
المشرفه:اليوم خميس ولا؟ايه موجود موجود الخميس راجلي كان يمشيله كل خميس..
دعاء:خلاص مالا تو نمشيلهم واني مروحه..هي وين بالزبط العياده؟.
المشرفه:في *****..شارع*****
دعاء:باهي مش بعيده هلبه....
المشرفه:تمام هي خل توا نمشوا للدكتور مختار..
دعاء:تمام..
وخدت اللاب متاعها وشنطتها وطلعت مع المشرفه..
⚘⚘⚘⚘⚘⚘
"لا اليوم بنتغدى في حوش عطاء..حلفت"
صوت طقة الباب..
جمال:لحظه ألو...ادخل..
انفتح الباب وخشت الممرضة وقالت:نبدا ندخل الحالات دكتور ..
جمال:قداش في حاله..
الممرضه:لتوا 4..
جمال:لحظه..وجه الكلام لاخته في الهاتف وهو يقول..مشغول توا بعدين نكلمك......وعليكم السلام..
وصكر ونزل التليفون وقال للممرضه:هي ابدي دخلي..
الممرضه بإبتسامه:حاضر دكتور..
وطلعت وصكرت الباب..
ومشت قعمزت ورا مكتبها وشبحت للحالات وقالت:بشير الرياني تفضل..
وناض طول خش للدكتور..
ودعاء تشوف للحالتين اللي قبلها كانوا زوز بنات..
تنهدت بعدين شبحت القدام ومرة مرة تساوي في الكمامه..
ولما طال الأنتظار حست بملل..طلعت مسبحة الألكترونيه وبدت تستغفر..
شويه وطل الراجل وهو مبتسم ودعاء ركزت عليه كان جاي ويبان مهموم وطلع من عند الدكتور بحالة تانيه..ابتسمت تلقائيا..
ونادت الممرضه ع الحاله اللي بعدها..
وخشت البنت...
وكذلك حتى هي بعد بضع دقائق طلعت وهي مبتسمه بس وجهها كان احمر..وهني هي ابتسمت بإستغراب..
ونادت الممرضه ع الحاله اللي قبل دعاء..
ناضت البنت التانيه وخشت..
في اللحظه اللي جو فيها زوز شاب وبنت وحجزوا حتى هما وقعمزوا ع يمينها ويسارها..
ولحظات..
وطلعت البنت وهي مبتسمه وتقول:بارك الله فيك دكتور...
وصكرت الباب ومشت في حالها..
الممرضه:دعاء محمد سالم..
تنهدت دعاء وناضت مشت لباب الحجرة طقت طقة خفيفه وخشت..
كان وقتها مطبس راسها ويكتب..
سمعها قالت..
"السلام عليكم"
رد وهو يكتب :وعليكم السلام..
حط البير وقام عيونه وشافلها...
ارتسمت ع وجهه تلقائيا ملامح المفاجأة وهو مركز بنظره ع عيونها..
اما هي ضيقت عيونها وهي تشوفله..شبهت عليه في البدايه..
بس لفترة ثواني معدودة اسعفتها ذاكرتها طول وذكرتها هي وين شافاته قبل هكي..
توسعوا عيونها بدهشه..
هو استاقظ بعدين قال بشي من الربكه:احمم..تفضلي..
هي نزلت عيونها وع وجهها ابتسامه تفاجئ خفيفه وقعمزت ع الكرسي..
هو لما شاف ابتسامتها اللي بانت برغم لبسها للكمامه ابتسم وشاف للورقه اللي قدامه وقال:دعاء محمد سالم..شبحلها وقال..اسمك هكي صح؟.
هي يدوب شبحتله وقالت:ايه صح..
شبك صوابع ايديه في بعض وحطهم ع الطاوله وقال:باهي احكيلنا يادعاء من شن تشكي!؟
هي نزلت الكمامه وقالت:احم..أ..دكتور اني عندي عيني اليمين ليها فتره هكي ممكن من 4شهور تحرق فيا وادمع بالذات لو قعدت ساعات طويله قدام اللاب توب او نقرا في كتاب وتولي حمرا عاينت قبل والدكتورة قالت حساسيه وعطتني قطره بس للأسف مافيش تحسن..
جمال:انتي علاش تقعدي ساعات طويله ورا اللاب توب؟!
دعاء:نخدم ع مشروع تخرجي..
ابتسم وقال:بالتوفيق ان شاء الله..
دعاء بإبتسامه يشوبها شي من الخجل:ان شاء الله..شكرا..
هو بإبتسامه قال:باهي شن اخبار النظر؟
دعاء:لا نشبح كويس بس لما عيني دمع شويه تتعكر الرؤيه ان صح التعبير وضحكت..
هو ضحك وقال:فاهم عليك..امم..باهي يا..دعاء انتي شن تخصصك؟!.
دعاء قلبها بدي يدق بالقوة جاوباته وقالت:هندسه..
ابتسم وقال:باهي يا باش مهندسه من فضلك نوضي ..
ناضت دعاء...
وجمال مشي بإتجاه جهاز ما وقال:تعالي..
دعاء حطت شنطتها ومشت وقفت وين ماهو اشر بيده..
شبحلها شويه وهو مبتسم بعدين قال:قعمزي..
قعمزت دعاء ووجهها احمر من الخجل وقلبها يدق بقوه..
وهو قعمز وقال..قربي عيونك الصقي فيها بالزبط..
دعاء قربت لين لصقت في الجهاز..
وقعد جمال يشوف في عيونها وهو يقول:ان شاء الله غير مش الخبطه يومها جت في عينك بس..
ضحكت وقالت:لالا .
جمال بإبتسامه؛معناها مذكره؟
دعاء:ايه..
جمال:اممم...
وسكت وهو يشوف في شغله..
شويه وبعد وحرك راسه يمين وشافلها وقال:صارتلك مشكله في عيونك قبل؟!
هي بعدت ودارت زيه وشبحتله وقالت:لالا هادي اول مرة..
جمال قعد مركز ع عيونها..
وهي تحشمت منه هلبه ونزلت عيونها لوطا..
هو انحرج من الحركه اللي دارها وارتبك..مسح بيده ع شعره للخلف بعدين تنحنح وقال:باهي تقدري تنوضي..
ناضت دعاء..
هو اشرلها وقال:تفضلي قعمزي..
مشت قعمزت ع الكرسي اللي قدام المكتب وهي تحاول تغض بصرها عنه..وحتى هو نفس الشي لانه حس روحه مش قادر يتحكم في نظراته لما يشوفلها..
تنحنح وقال:انتي عندك التهاب بسيط العين..
خدي ورقة وصفه...وكتبلها عليها الادويه اللازمه وهو يشرحلها عن حالتها وشن لازم ادير وشن لازم تتجنب وقداش تقعد فتره تاخد الادويه..
ومدلها الورقه وقال:الخميس القادم بإذن الله تعالي مراجعه..
دعاء خدتها من غير ماتشوفله وقالت:ان شاء الله..وناضت وقفت وهي تقول..السلام عليكم...ومشت للباب وهو معاها بعيونه لين طلعت...ولما جت بتسكر الباب جو عيونه فعيونها..
وجهه ولى احمر وابتسم ابتسامه ربكه..
اما هي يدوب ردتها وسكرت الباب..
ومشت وهي تبلع في ريقها وقلبها يدق بقوة ومن الخجل ووجهها مولي سخون وكأنها في عز الصيف وهي في عز الشتي..
⚘⚘⚘⚘⚘
الساعه الخامسه عصرا...
"ايوه دودي"
دعاء:مروة السلام عليكم..
مروة :وعليكم السلام..
دعاء:شن جوك مروة وشن جو ماريه وفاروق..
مروة:اهو مطلعين عقلي..
دعاء بضحكه:سلامتهم..ربي يحفظهم..
مروة بضحكه:آمين..ايه شن جوك انتي وماما وبابا والكل؟
دعاء:الحمد لله كلنا بخير..احمم..ميرو فاضيه توا انتي؟
مروة بإستغراب:ايه فاضيه..علاش ان شاء الله خير؟!
تنهدت دعاء من اعماقها وقالت:مش عارفه شن جاني يامروة..
مروة بخوف:خيرك!
دعاء:ماتخافيش..بس يعني بنحكيلك حاجه صارت معاي قلبتني قلب يامروة..
مروة؛تي احكي يادعاء بسرعه اعصابي تلفت..
⚘⚘⚘⚘⚘
"تغدى جمال"
جمال استاقظ من سرحانه بعدين ابتسم وقال:عطاء..
عطاء بإبتسامه:نعم حبيبي..
جمال حط الكاشيك وقال بشي من الربكه:احمم..بنسألك سؤال جاوبيني بصراحه ارجوك..
عطاء بإستغراب:اسأل باهي..
مسح جمال ع لحيته وقال:يعني اني توا لو فكرت نخطب يرضوا بيا..
عطاء ضحكت بصدمه وقالت؛وبزغروطه من العروسه وامها ونساوين عيلتها كان مش تريسهم معاهم حتى هما..
ضحك جمال وقال:عطاء شن قلت اني!؟
عطاء:هادي عين الحقيقه والصراحه وغير هكي كذب..
جمال:وعمري راهو خشيت40..
عطاء:مواليد 2000 تتمناك انت..
جمال:لالاا شن الفين هادي تشبحي فيا متخلف ورجعي !!؟
عطاء بضحكه:تمانينات تسعينات الفينات كلهم يطيروا من فرحتهم كان خطبتهم..
جمال؛مش حيقولوا كيف وصل لهالعمر وماخداش!؟
عطاء:اضحك حتى انت الناس معاش تفكري هكي توا بكل مايصدقوا يبان عليهم من يخطب يعطوه من غير مايسألوا عليه..
جمال :واني مانبيش وحده ماتصدق يجيها من يخطب..وخدي الكاشيك وبدي ياكل..
وعطاء تشوفله كيف بان على وجهه ملامح الضيق وهو ياكل وفضلت تسكت مابتش تنتاقشه اكثر وتصكرله نيته ع الماكله..
.........
مروة:حبيبتي دعاء بري توا توا توضي وصلي ركعتين وادعي ربي مايعلق قلبك بشي غيره هو..
دعاء بنبرة باكيه:وهدا اللي بيصير..استغفر الله..من بكري واني عقلي مايفكر كان فيه اقسم بالله قلبي وجعني هلبه هلبه..
مروة بضيق:كان تغيريه يكون افضل..
رشفت وقالت:لالا بنقوي روحي ونطرد الافكار الغبيه هادي من راسي ونمشيله المراجعه وبعدها خلاص..
مروة تنهدت وقالت:ربي يريح قلبك حبيبتي ويكفيك بحلاله عن حرامه..
دعاء:يارب..
دعاء..
ماتستغربوش ولاتقولوا مبالغه..اللي يجرب قرب ربي لدرجه ان يحس روحه يشوف فيه لما يرتكب ابسط ذنب يحس في روحه وكأنه اشرك او كفر..واني اكتر شي كان مخوفني ان علاقتي بربي ترجع لحالة الفتور هديكا لو خدتني الدنيا من جديد..وبصراحه الدكتور جمال ربي عطاه كل شي يخلي القلب يزوغ غصب عنه..واني لأني ماجنيتش من الحب اللي من هالنوع غير كل شر خفت هلبه من اللي حسيته واني معاه في العياده..
🌷ليلتها دعاء بعد ماصلت القيام..
قرأت سورة البقرة كامله في جلسة وحده..
بعدين خداها النوم ورقدت..
وتشوف في المنام..
انها لبست ملايه سودا غطت بيها جسمها وشعرها كله..
بعدين مشت لمكان وكأنه مطبخ فتحت التلاجه وطلعت منهم حكاك شاميه"حلاوة طحينيه"..
وقعدت تاكل منهم بشهيه ونهم...
وفي لحظه فاقت..
وهي تستطعم في الشاميه في فمها ناضت من ع حافة المندار وشبحت حواليها استاقظت انها رقدت في مصلاها..
وفجأة..آذن الفجر..
خدت نفس عميق بعدين قالت..
"صدق الحق وزهق الباطل"...
🌻🌻🌻🌻
وتمر الأيام..
وجمال تبدل حاله وتغير هلبه..قعد اغلب وقته يفكر في دعاء وين يغفل شويه تخطر عليه مش عارف علاش انشدلها لهالحد..او مش عارف شن هو السبب الأقوى اللي خلاه ينجذبلها...
اخلاقها ..حشمتها..جمال عيونها الحور..
المهم انها شغلاته والراجل خلاص عزم ع فكرة الزواج..وقرر يدق الحديد وهو حامي ماعنده علاش يطول فيها وهي قصيره..
وخصوصا ان الفرصه الوحيده اللي يقدر يشوفها فيها مرة تانيه هي يوم المراجعه..
⚘وجي يوم المراجعه...
ودعاء تستنى دورها وهي في قمة التوتر..
"دعاء محمد سالم"
ناضت دعاء وهي تتصنع في القوة والجديه..
ومشت طقت ع الباب بعدين فتحاته وخشت وقالت بدون ماتشوفله:السلام عليكم..
هو ابتسم من قلبه ورد:وعليكم السلام تفضلي دعاء..
قلبها دق بقوة وهي اضايقت بسبب هالشعور..
ومشت قعمزت..
جمال:هاه مشينا بالدواء وع النصايح ؟
دعاء بدون ماتشوفله:ايه ..
جمال ابتسم وناض وهو يقول:باهي لو سمحتي تعالي..
هي خدت نفس وناضت...وحطت شنطتها ومشت قعمزت في نفس مكان الجهاز..
وهو مشي قعمز...
وبدي يفحص في عيونها..
والزوز ساكتين بس قلوبهم كانت ادق بقوة..
هو كان مستعجل يبي يفتح معاها الموضوع..
لكن هي كانت مستعجله وتبي تروح في اسرع وقت..
جمال:اممم..تمام..في تحسن واضح..تقدري تنوضي..
ناضت دعاء ومشت طول خدت شنطتها وقالت:نستمر ع الأدويه؟.
جمال وهو ماشي يقعمز ورا مكتبه ؛قعمزي باهي..
دعاء بتوتر:اعذرني مستعجله..
قعد واقف يشبحلها وهو ساكت...
هي استغربت وقامت عيونها وشبحتله..
جمال بجديه:لوسمحتي قعمزي..
قعدت تشبحله وهي ساكته..
جمال:لو سمحتي..
بلعت ريقها وقعمزت بالسيف..
هو مشي من ورا مكتبه وقعمز فث الكرسي اللي قدامها وقال:اسمي جمال عبدالعاطي*****..عمري 39..طبيب عيون زي ماتعرفي..اعزب..
شبحتله بتفنيصه..
ضحك وقال:لالا ماتفهمنيش غلط..ابتسم وكمل يقول..اني قصدي شريف يادعاء..ناوي الحلال..
دعاء حست بنخصه وجعت قلبها ..
حست بخوف مش طبيعي..وصدرها ضاق هلبه..
بلعت ريقها وشبحتله بعيون مليانه دموع..
جمال بإبتسامه؛فيك كل شي يخليني من مرتين بس نشوفك فيهم نفكر في الزواج ونتحمسله زياده..
دعاء:غلط..
تعكرت ابتسامته..
دعاء بشي من الإنفعال:ايه غلط..لانك ماتعرف عني شي..ماتعرفش اني مريت بتجارب فاشله دمرتني..مرة خطبت وفسخت..ومرة انقرت فاتحتي واطلقت قبل العرس..في المرتين اني اللي طلبت الانفصال لان اختياراتي كلها غلط..كرهت سيرة الزواج وصارلي رهاب منه..وانت اصلا بروحك توا بعد عرفت هدا كله حتغض النظر عنه مني اني..
لهدا يادكتور برا شوف وحده تصلح بيك اكثر مني...
وناضت بسرعه ومشت طلعت من الحجرة وصكرت الباب وهي تحاول تشد روحها بقوة بش ماتبكيش..
ومجرد ماوصلت سيارتها وركبت..شغلتها وتحركت طول وانهارت بالبكي...
ومن كثر مانفسيتها تعبت وقتها درست ع تركينه بكت لين عيت...بعدين وقفت بكي وخدت تليفونها فتحت ع القرإن وقرت شويه لين ارتاحت نفسها..ومن ثم شغلت سيارتها وتحركت بطريقها للحوش..

....يتبع....